കൊച്ചി: കേരളത്തിന്റെ ഐടി മേഖലയില്‍ പുതിയൊരു അധ്യായം കുറിച്ച് കൊച്ചി ഇന്‍ഫോപാര്‍ക്ക് മൂന്നാംഘട്ട വികസനത്തിന് തുടക്കം കുറിക്കുന്നു.
നൂതനമായ ലാന്‍ഡ് പൂളിങ് ആഗോള നിലവാരമുള്ള ഇന്റഗ്രേറ്റഡ് എഐ ടൗണ്‍ഷിപ്പ് യാഥാര്‍ത്ഥ്യമാക്കാനാണ് ലക്ഷ്യമിടുന്നതെന്ന് ഇന്‍ഫോപാര്‍ക്ക് സിഇഒ സുശാന്ത് കുറുന്തില്‍, ജിസിഡിഎ ചെയര്‍മാന്‍ കെ. ചന്ദ്രന്‍ പിള്ള എന്നിവര്‍ വാര്‍ത്താസമ്മേളനത്തില്‍ പറഞ്ഞു. സംസ്ഥാന സര്‍ക്കാരിന്റെ പുതിയ ലാന്‍ഡ് പൂളിങ് നിയമപ്രകാരം നടപ്പാക്കുന്ന ഈ പദ്ധതിക്ക് ജിസിഡിഎയും ഇന്‍ഫോപാര്‍ക്കും ഒരുമിച്ചാണ് നേതൃത്വം നല്‍കുന്നത്.
ഇതുസംബന്ധിച്ച് മുഖ്യമന്ത്രിയുടെ സാന്നിധ്യത്തില്‍ ഇന്‍ഫോപാര്‍ക്കും ജിസിഡിഎയും കഴിഞ്ഞദിവസം ധാരണപത്രത്തില്‍ ഒപ്പിട്ടു. ഇന്‍ഫോപാര്‍ക്ക് ഫേസ് 3-ക്ക് വേണ്ടി ലാന്‍ഡ് പൂളിങ്ങിലൂടെ ഭൂമി കണ്ടെത്തേണ്ടത് ജിസിഡിഎയാണ്. അടിസ്ഥാന സൗകര്യങ്ങള്‍ ഇന്‍ഫോപാര്‍ക്ക് ഒരുക്കും. 300 ഏക്കറിലധികം വിസ്തൃതിയില്‍ ഈ പദ്ധതിക്കായി കിഴക്കമ്പലം, കുന്നത്തുനാട് പഞ്ചായത്തുകളിലായി സ്ഥലം കണ്ടെത്താനാണ് ശ്രമിക്കുന്നത്. ഇത് വെറുമൊരു ഐടി പാര്‍ക്ക് വികസനമല്ല, ഇന്റഗ്രേറ്റഡ് എഐ ടൗണ്‍ഷിപ്പ് എന്ന ആഗോള സങ്കല്‍പ്പത്തില്‍ ഒരുങ്ങുന്ന ഒരു സാങ്കേതിക കേന്ദ്രമാണ്. ഏകദേശം 25,000 കോടി രൂപയുടെ നിക്ഷേപമാണ് പ്രതീക്ഷിക്കുന്നത്. ഇതിലുടെ രണ്ട് ലക്ഷം നേരിട്ടുള്ള തൊഴിലവസരങ്ങളും നാല് ലക്ഷം പരോക്ഷ തൊഴിലവസരങ്ങളും സൃഷ്ടിക്കുമെന്ന് പ്രതീക്ഷിക്കുന്നു.
ലാന്‍ഡ് പൂളിങ് എന്നാല്‍
പരമ്പരാഗത ഭൂമി ഏറ്റെടുക്കല്‍ രീതികളിലെ കാലതാമസവും നിയമപ്രശ്‌നങ്ങളും ഒഴിവാക്കി, വികസന പദ്ധതികള്‍ക്ക് ആവശ്യമായ ഭൂമി ലഭ്യമാക്കാന്‍ സര്‍ക്കാര്‍ നടപ്പാക്കുന്ന പുതിയ സമീപനമാണ് ലാന്‍ഡ് പൂളിങ്. ഇതിലൂടെ, ഭൂമി സര്‍ക്കാര്‍ ഏറ്റെടുക്കുന്നതിന് പകരം, സ്വകാര്യ ഭൂവുടമകളുടെ സമ്മതത്തോടെ അവരുടെ ചെറിയതുണ്ട് ഭൂമികള്‍ ഒരുമിപ്പിച്ച് വലിയ പ്ലോട്ടാക്കി മാറ്റുന്നു. ഈ ഭൂമിയില്‍ റോഡുകള്‍, ഐടി പാര്‍ക്കുകള്‍, മറ്റ് പൊതുസൗകര്യങ്ങള്‍ എന്നിവ ഉള്‍പ്പെടുത്തി ആസൂത്രിത വികസനം നടത്തുന്നു. ഇങ്ങനെ വികസിപ്പിച്ച ഭൂമിയുടെ ഒരുഭാഗം അടിസ്ഥാന സൗകര്യങ്ങള്‍ക്കായി ഉപയോഗിച്ച ശേഷം, ബാക്കിയുള്ള ഭാഗം ഭൂമിയുടെ മൂല്യവര്‍ദ്ധനയോടെ ഭൂവുടമകള്‍ക്ക് തിരികെ നല്‍കുന്നു. ഈ പദ്ധതിയുടെ ഏറ്റവും വലിയ ആകര്‍ഷണം വികസിപ്പിച്ച ഭൂമിയുടെ മൂല്യം പല മടങ്ങ് വര്‍ധിക്കുന്നു എന്നതാണ്. ഇത് ഭൂവുടമകള്‍ക്ക് വലിയ സാമ്പത്തിക നേട്ടം നല്‍കുമെന്നാണ് വിലയിരുത്തല്‍.
