കൊച്ചി: വിവാഹവാഗ്ദാനം നല്‍കി 16കാരിയെ രണ്ടുവര്‍ഷത്തോളം പീഡിപ്പിക്കുകയും സ്വകാര്യചിത്രങ്ങള്‍ ഇന്‍സ്റ്റഗ്രാമില്‍ പ്രചരിക്കാനിടയാവുകയും ചെയ്ത കേസില്‍ ഈരാറ്റുപേട്ട സ്വദേശിയായ യുവാവ് അറസ്റ്റില്‍. ഈരാറ്റുപേട്ട വെണ്ണൂര്‍ മാളിയേക്കല്‍ അന്‍സിലിനെയാണ് (19) എറണാകുളം നോര്‍ത്ത് പൊലീസ് അറസ്റ്റു ചെയ്തത്. ഇയാള്‍ക്കെതിരെ പോക്‌സോ വകുപ്പു പ്രകാരമാണ് കേസെടുത്തത്.
എറണാകുളംകാരിയായ പെണ്‍കുട്ടി 16 വയസുള്ളപ്പോള്‍ ഫേസ്ബുക്ക് വഴിയാണ് അന്‍സിലിനെ പരിചയപ്പെട്ടത്. വിവാഹ വാഗ്ദാനം നല്‍കി അന്‍സില്‍ തുടക്കംമുതല്‍ പീഡനത്തിന് ഇരയാക്കി. രണ്ടുവര്‍ഷമായി ഈ ബന്ധം തുടര്‍ന്നു. എന്നാല്‍ അടുത്തിടെ അന്‍സില്‍ ഈ കുട്ടിയുമായി അകലുകയും കോഴിക്കോട് സ്വദേശിനിയായ 16 കാരിയുമായി പ്രണയത്തിലാവുകയും ചെയ്തു. ഇതിനിടെ എറണാകുളം സ്വദേശിനിയായ പെണ്‍കുട്ടിയുടെ സ്വകാര്യചിത്രങ്ങള്‍ അന്‍സില്‍ മൊബൈല്‍ഫോണില്‍ നിന്ന് കോഴിക്കോട് സ്വദേശിനിക്കു കൈമാറി. അത് അമ്മയുടെ സ്മാര്‍ട്ട് ഫോണ്‍ വഴി കോഴിക്കോട് സ്വദേശിനി ഇന്‍സ്റ്റഗ്രാമില്‍ ഇടുകയും ചെയ്തു. ഇതു കാണാനിടയായതോടെയാണ് എറണാകുളം സ്വദേശിനിയായ പെണ്‍കുട്ടി പൊലീസില്‍ പരാതി നല്‍കിയത്. സംഭവത്തില്‍ കോഴിക്കോട് സ്വദേശിനിയെയും പൊലീസ് ചോദ്യം ചെയ്തു.
