ലഖ്നൗ: ഉത്തര്‍പ്രദേശിലെ ബരേലിയില്‍ വെള്ളിയാഴ്ച പള്ളിപ്രാര്‍ത്ഥനയ്‌ക്ക് ശേഷം ‘ഐ ലവ് മുഹമ്മദ്’ എന്ന മുദ്രാവാക്യം മുഴക്കി കലാപം നടത്തിയതിന്റെ പേരില്‍ മതപണ്ഡിതന്‍ തൗഖീര്‍ റാസ ഖാനെ അറസ്റ്റ് ചെയ്ത് ജയിലിലയച്ച് യോഗി ആദിത്യനാഥ്. ഇതിഹാദ് ഇ മിലറ്റ് എന്ന സംഘടനയുടെ നേതാവ് കൂടിയാണ് തൗഖീര്‍ റാസ ഖാന്‍.
‘ഐ ലവ് മുഹമ്മദ്’ (ഞാന്‍ മുഹമ്മദിനെ സ്നേഹിക്കുന്നു) എന്ന പ്രചാരണപരിപാടിയുടെ ഭാഗമായി പ്രതിഷേധിക്കാന്‍ ആഹ്വാനം ചെയ്തതിനാണ് തൗഖീര്‍ റാസ ഖാനെ അറസ്റ്റ് ചെയ്തത്. പൊലീസുകാരും പ്രകടനക്കാരും തമ്മില്‍ ഏറ്റുമുട്ടല്‍ നടന്നിരുന്നു. നിരവധി പേര്‍ക്ക് പരിക്കേറ്റു. പൊലീസിന് നേരെ കല്ലേറും നടന്നു.
തൗഖീര്‍ റാസ ഖാന്‍ ഉള്‍പ്പെടെ ആകെ എട്ട് പേരെ കസ്റ്റഡിയില്‍ എടുത്ത ശേഷം ഇവരെ ജയിലില്‍ അയയ്‌ക്കുകയായിരുന്നു. അക്രമവുമായി ബന്ധപ്പെട്ട് 10 കേസുകള്‍ എടുത്തിട്ടുണ്ട്. ഇതില്‍ ഏഴിലും തൗഖീര്‍ റാസ ഖാന്‍ പ്രതിയാണ്. അക്രമം നടത്തിയവരുടെ സ്വത്ത് പിടിച്ചെടുക്കുന്നതിനെക്കുറിച്ച് ആലോചനയിലുണ്ട്.
ബരേലിയിലെ കോട് വാലി പ്രദേശത്തെ പള്ളിയില്‍ വെള്ളിയാഴ്ച പ്രാര്‍ത്ഥന കഴിഞ്ഞ് പുറത്തിറങ്ങിയവരാണ് ഐ ലവ് മുഹമ്മദ് പ്ലക്കാര്‍ഡും ബാനറും ഉയര്‍ത്തി പ്രകടനം നടത്തുകയും പിന്നീട് അക്രമത്തിലേക്ക് തിരിയുകയും ചെയ്തത്. പ്രകടനം നടത്താന്‍ ഇവര്‍ നേരത്തെ ആസൂത്രണം ചെയ്തിരുന്നെങ്കിലും യുപി സര്‍ക്കാര്‍ അവസാന നിമിഷം ഈ പ്രകടനത്തിന് അനുമതി നിഷേധിക്കുകയായിരുന്നു. ഇതിന് കാരണം ഉത്തര്‍പ്രദേശിലെ വിവിധ നഗരങ്ങളില്‍ ഐ ലവ് മുഹമ്മദ് പ്രകടനങ്ങള്‍ നടന്നതാണ്. ആസൂത്രിതമായ വര്‍ഗ്ഗീയ കലാപശ്രമത്തിന്റെ ഭാഗമാണ് ഇത്തരം ഐ ലവ് മുഹമ്മദ് പ്രകടനങ്ങള്‍ എന്ന് ഇന്‍റലിജന്‍സ് റിപ്പോര്‍ട്ട് കണക്കിലെടുത്താണ് യോഗി സര്‍ക്കാര്‍ അവസാന നിമിഷം ഈ പ്രകടനത്തിന് അനുമതി നിഷേധിച്ചത്. ഇതോടെ നിയമം ലംഘിച്ച് പ്രകടനക്കാര്‍ കലാപത്തിലേക്ക് തിരിയുകയായിരുന്നു.
മറ്റ് 39 പേരെ കൂടി കസ്റ്റഡിയില്‍ എടുത്തിട്ടുണ്ട്. കലാപകാരികളില്‍ നിന്നും തോക്ക്, പെട്രോള്‍ ബോംബ്, ബാറ്റണ്‍ എന്നിവ കണ്ടെടുത്തു. ബാക്കിയുള്ള നിരവധി പേര്‍ക്കെതിരെ നിയമനടപടികള്‍ മുന്നോട്ട് പോകുകയാണ്. മൗലാന തൗഖീര്‍ റാസ ഖാന്‍, സലീമിന്റെ മകന്‍ സര്‍ഫറസ്, സറിഫുദ്ദീന്റെ മകന്‍ മനിഫുദ്ദീന്‍, നസീം അഹമ്മദിന്റെ മകന്‍ അസീം അഹമ്മദ്, മുഹമ്മദ് അഹമ്മദിന്റെ മകന്‍ മുഹമ്മദ് ഷറീഫ്, മുഹമ്മദ് ജായെദിന്റെ മകന്‍ മുഹമ്മദ് അമിര്‍, രാജുവിന്റെ മകന്‍ റിഹാന്‍, ഷമീമിന്റെ മകന്‍ മുഹമ്മദ് സര്‍ഫറസ് എന്നിവരെയാണ് അറസ്റ്റ് ചെയ്ത് ജയിലില്‍ അടച്ചത്.കുറ്റവാളികളോട് യാതൊരു വിട്ടുവീഴ്ചയും ഉണ്ടാകില്ലെന്ന് യോഗി ആദിത്യനാഥ് പറഞ്ഞു.
കഴിഞ്ഞ ദിവസം കാണ്‍പൂര്‍, ലഖ്നൗ, കാശിപൂര്‍, മഹാരാജ് ഗഞ്ച് തുടങ്ങിയ ഇടങ്ങളില്‍ ഐ ലവ് മുഹമ്മദ് പ്രകടനങ്ങള്‍ നടന്നിരുന്നു.
