തിരുവനന്തപുരം: വരുന്ന തദ്ദേശ തെരഞ്ഞെടുപ്പ് ബിജെപിയ്ക്ക് അനുകൂലമായ ജനവികാരം പ്രതിഫലിക്കുമെന്ന് ബിജെപി സംസ്ഥാന ജനറല് സെക്രട്ടറി എം. ടി. രമേശ് പറഞ്ഞു. സംസ്ഥാന പ്രസിഡന്റ് രാജീവ് ചന്ദ്രശേഖറിന്റെ അധ്യക്ഷതയില് കോര്കമ്മറ്റി യോഗം ചേര്ന്നതിന് ശേഷം മാധ്യമ പ്രവര്ത്തകരോട് സംസാരിക്കുകയായിരുന്നു അദ്ദേഹം.
തദ്ദേശ സ്വയംഭരണ തെരഞ്ഞെടുപ്പ് തയ്യാറെടുപ്പുകള് വിലയിരുത്തി രണ്ട് മാസത്തെ പ്രവര്ത്തന പദ്ധതി അവതരിപ്പിച്ചു. മോദി സര്ക്കാരിന്റെ വികസന കാഴ്ചപ്പാടുകള് ജനങ്ങള് സ്വീകരിക്കുന്നു. ബിജെപിക്ക് അനുകൂലമായ ജനവികാരം തെരഞ്ഞെടുപ്പില് പ്രതിഫലിക്കും. തെരഞ്ഞെടുപ്പിനെ അട്ടിമറിക്കാന് കോണ്ഗ്രസ് -സിപിഎം സഖ്യം അണിയറയില് രൂപപ്പെടുന്നു. തിരുവനന്തപുരം, തൃശൂര് നഗരസഭകളില് അവിശുദ്ധ സഖ്യം ഉണ്ട്.
പിന്വാതില് സഖ്യത്തെ ബിജെപി തുറന്നുകാട്ടും. 25 മുതല് ബിജെപി വ്യാപക ഗൃഹ സമ്പര്ക്കം നടത്തി ഇരു മുന്നണികളുടെയും വികസന വിരുദ്ധ രാഷ്ട്രീയം ജനങ്ങള്ക്ക് മുന്നില് എത്തിക്കുമെന്നും എം.ടി രമേശ് പറഞ്ഞു.
