മുംബൈ: ഏറെ പ്രതീക്ഷയോടെ കാത്തിരുന്ന ആപ്പിൾ ഐഫോൺ 17 സീരീസ് പുറത്തിറങ്ങിയതോടെ മുംബൈയിലെ ആപ്പിൾ സ്റ്റോറിന് മുന്നിൽ ആപ്പിൾ ആരാധകരുടെ തമ്മിൽ തല്ല്. സംഘർഷം തടയാൻ പോലീസും പാടുപെട്ടു. ഇന്ത്യയിൽ ഐഫോൺ 17 വിൽപ്പന ഇന്നുമുതലാണ് ആരംഭിക്കുന്നത്. മുംബൈയിലെയും ദൽഹിയിലെയും ആപ്പിളിന്റെ മുൻനിര സ്റ്റോറുകൾക്ക് പുറത്ത് നീണ്ട നിരകളാണ് രൂപപെട്ടിരിക്കുന്നത്.
വെള്ളിയാഴ്ച രാവിലെ മുംബൈയിൽ ബികെസി ജിയോ സെന്ററിലെ ആപ്പിൾ സ്റ്റോറിന് പുറത്താണ് സംഘർഷം പൊട്ടിപ്പുറപ്പെട്ടത്. പുതിയ ഐഫോൺ വാങ്ങാൻ പുലർച്ചെ മുതൽ തന്നെ സ്റ്റോറിന് പുറത്ത് വലിയ ജനക്കൂട്ടം തടിച്ചുകൂടിയതിനാൽ തിരക്ക് അനുഭവപ്പെട്ടു. സംഭവം പെട്ടെന്ന് നിയന്ത്രണവിധേയമാക്കി, ആർക്കും പരുക്കുകളൊന്നും റിപ്പോർട്ട് ചെയ്തിട്ടില്ല.
മുംബൈയിലെ ബാന്ദ്ര കുർള കോംപ്ലക്സ് (ബികെസി) സ്റ്റോറിൽ, പുതിയ ഐഫോണുകൾ വാങ്ങാൻ രാത്രിമുതൽ ജനക്കൂട്ടം എത്തിതുടങ്ങിയിരുന്നു. ബെംഗളൂരുവിലെ ഫീനിക്സ് മാൾ ഓഫ് ഏഷ്യയിലെ ആപ്പിൾ സ്റ്റോറിനു മുന്നിലും നീണ്ട നിര ദൃശ്യമാണ്.
ഇന്ത്യയിൽ ഐഫോൺ 17 ന്റെ വില 82,900 രൂപയിൽ ആരംഭിക്കുന്നു, അൾട്രാ-സ്ലിം ഐഫോൺ എയറിന്റെ വില 1,19,900 രൂപയാണ് . കൂടാതെ, ഐഫോൺ 17 പ്രോയുടെയും ഐഫോൺ 17 പ്രോ മാക്സിന്റെയും വില യഥാക്രമം 1,34,900 രൂപയും 1,49,900 രൂപയുമാണ്.
