കൂത്തുപറമ്പ്: ശ്രീകൃഷ്ണ ജയന്തിയോടനുബന്ധിച്ച്, ചിറ്റാരിപ്പറമ്പില് ബാലഗോകുലത്തിന്റെ ശോഭായാത്രയ്ക്കു നേരേ സിപിഎം കയ്യേറ്റ ശ്രമം. സ്ഥിതി വഷളാക്കാതിരുന്നത് ശോഭാ യാത്ര സംഘാടകരുടെ സംയമനം. ഞായറാഴ്ച വൈകുന്നേരം മണ്ണന്തറയിലായിരുന്നു ശോഭായാത്ര തുടങ്ങാന് തീരുമാനിച്ചത്.
കണ്ണവം പോലീസ് അനുമതി നല്കിയിരുന്നു. ശോഭായാത്രയാരംഭിക്കുന്നതിനു തൊട്ടുമുമ്പ് പ്രദേശത്തെ സിപിഎം ഏരിയ കമ്മിറ്റി അംഗത്തിന്റെ നേതൃത്വത്തില് നൂറോളം പേര് സംഘടിച്ചെത്തി ഓണാഘോഷത്തിന്റെ സമാപന പരിപാടിയെന്നു ചൂണ്ടിക്കാട്ടി കമ്പവലി നടത്തിയായിരുന്നു അതിക്രമത്തിനു തുടക്കം. കണ്ണവം പോലീസ് അവരെ ബലമായി നീക്കി. റോഡിലിട്ട കമ്പക്കയറും പോലീസ് മാറ്റി. ഇതൊക്കെ നടക്കുമ്പോള്, ഒരു ഭാഗത്തു ശോഭായാത്ര തുടങ്ങുന്ന ഒരുക്കങ്ങളായിരുന്നു. മണ്ണന്തറ നിന്നു ശോഭായാത്രയാരംഭിച്ച് 100 മീറ്റര് പോയപ്പോള്, ഇതേ സംഘം റോഡില്ക്കയറി തടസപ്പെടുത്തി.
പരിപാടി അലങ്കോലമാക്കാനുള്ള സിപിഎം ശ്രമം തിരിച്ചറിഞ്ഞ ശോഭാ യാത്രയിലെ ജനങ്ങള് മറ്റൊരു ഭാഗം ചേര്ന്നു നടന്നു. ശോഭായാത്രയില് അണിനിരന്ന ഗോപിക നൃത്തം അവതരിപ്പിക്കുമ്പോള് വീണ്ടും സിപിഎമ്മുകാര് സംഘടിച്ചെത്തി അലങ്കോലപ്പെടുത്താന് ശ്രമിച്ചു. ഘോഷയാത്രയിലെ ആളുകളെ തള്ളി നീക്കി. ഇവരുടെ പ്രകോപനം സഹിക്കാതെ വന്നതോടെ പോലീസ് സിപിഎം അക്രമി സംഘത്തെ പ്രതിരോധിച്ചു. അലങ്കോലപ്പെടുത്താന് വന്ന സിപിഎമ്മുകാരെ റോഡിന്റെ ഒരുഭാഗത്തേക്കു പോലീസ് പൂര്ണമായും മാറ്റി. അക്രമി സംഘത്തോടൊപ്പമെത്തിയ യുവതികളും യുവാക്കളും സ്ത്രീകളും കൂവി വിളിച്ചു ശോഭായാത്രയെ അലങ്കോലമാക്കാന് നോക്കി.
ശോഭായാത്രയില് അണിനിരന്നവര് സംയമനം പാലിച്ചതിനാലാണ് വലിയ സംഘര്ഷമൊഴിവായത്. സിപിഎം ഏരിയ കമ്മിറ്റി ഭാരവാഹികള്, ലോക്കല് കമ്മിറ്റി അംഗങ്ങള്, ചിറ്റാരിപ്പറമ്പ് പഞ്ചായത്ത് വാര്ഡ് മുന് വനിതാ മെംബര് എന്നിവരുടെ നേതൃത്വത്തിലാണ് ശോഭാ യാത്ര അലങ്കോലപ്പെടുത്താന് ശ്രമിച്ചത്. സമാധാനം നിലനില്ക്കുന്ന പ്രദേശത്ത് ബോധപൂര്വം പ്രശ്നങ്ങളുണ്ടാക്കിയ സിപിഎമ്മുകാര്ക്കെതിരേ ശക്തമായ നടപടി സ്വീകരിക്കണമെന്ന് സംഘാടക സമിതിയംഗം എന്. വിജയന് ആവശ്യപ്പെട്ടു. ശോഭാ യാത്ര അലങ്കോലപ്പെടുത്താന് ശ്രമിച്ച സിപിഎമ്മുകാര്ക്കെതിരേ കണ്ണവം പോലീസില് പരാതിപ്പെട്ടതായി അദ്ദേഹം ജന്മഭൂമിയോടു പറഞ്ഞു.
