തിരുവനന്തപുരം:വിതുരയില് കാര് ഇടിച്ചു വയോധികന് കൊല്ലപ്പെട്ട കേസില് വില്ലേജ് ഓഫീസര് സി പ്രമോദിനെ സ്റ്റേഷന് ജാമ്യത്തില് വിട്ടയച്ചു.മനപൂര്വല്ലാത്ത നരഹത്യയ്ക്കാണ് ഇയാള്ക്കെതിരെ കേസെടുത്തിരുന്നത്.റവന്യൂ വകുപ്പിന് വിതുര പൊലീസ് റിപ്പോര്ട്ട് കൈമാറും.
കഴിഞ്ഞ ഒമ്പതാം തീയതി രാത്രിയാണ് പ്രമോദ് ഓടിച്ചിരുന്ന കാര് മണിയന് സ്വാമിയെ വിതുര ജംഗ്ഷനില് വച്ച് ഇടിച്ചത്.കാര് നിര്ത്താതെ പ്രമോദ് ഒളിവില് പോയി. എന്നാല് രണ്ട് ദിവസം മുമ്പ് സ്റ്റേഷന് മുന്നില് നിന്ന് ഉപേക്ഷിച്ച നിലയില് ഈ കാര് കണ്ടെത്തി.
പിന്നാലെ പ്രമോദ് പൊലീസ് സ്റ്റേഷനില് എത്തി കീഴടങ്ങി. അമ്മയ്ക്ക് ഇന്സുലിന് വാങ്ങാന് പോകവെയാണ് അപകടം ഉണ്ടായതെന്നാണ് പ്രമോദ് പൊലീസിന് മൊഴി നല്കിയത്. ആര്യനാട് വില്ലേജ് ഓഫീസറാണ് സി പ്രമോദ്.
മരിച്ച മണിയന് സ്വാമി വിതുര ജംഗ്ഷനിലെ വെയിറ്റിംഗ് ഷെഡിലാണ് രാത്രി ഉറങ്ങുന്നത്. അങ്ങോട്ട് നടന്നു പോകുന്നതിനിടെ പ്രമോദിന്റെ കാര് മണിയന് സ്വാമിയെ ഇടിച്ചു തെറിപ്പിക്കുകയായിരുന്നു.
