കോഴിക്കോട്: ലൈഫ് പദ്ധതിയില് വീട് നിഷേധിക്കപ്പെട്ട നിര്ധന കുടുംബത്തിന് സന്നദ്ധ സംഘടനകള് വഴി നിര്മ്മിച്ച വീടിന്റെ താക്കോല് ദാന ചടങ്ങില് പങ്കെടുത്ത ഗ്രാമപഞ്ചായത്ത് പ്രസിഡന്റിന് സിപിഎമ്മിന്റെ ശിക്ഷ. ഉദ്ഘാടന ചടങ്ങില് ഭാരതാംബയുടെ ചിത്രത്തിന് മുമ്പില് നിലവിളക്ക് കൊളുത്തിയെന്ന ‘കുറ്റത്തിന്’ കോഴിക്കോട് ജില്ലയിലെ തലക്കുളത്തൂര് ഗ്രാമപഞ്ചായത്ത് പ്രസിഡന്റ് കെ.ടി. പ്രമീളയെ ഏരിയ കമ്മിറ്റിയില് നിന്ന് ബ്രാഞ്ചിലേക്ക് തരംതാഴ്ത്തി. തരംതാഴ്ത്തിയതിനെ കുറിച്ച് പ്രതികരിക്കാനില്ലെന്നും എല്ലാം പാര്ട്ടി സെക്രട്ടറിയോട് ചോദിക്കണമെന്നും പ്രമീള ജന്മഭൂമിയോട് പറഞ്ഞു.
പ്രമീള പ്രതിനിധീകരിക്കുന്ന അണ്ടിക്കോട് വാര്ഡിലെ ബാബുരാജ്-ഷൈനി ദമ്പതികള്ക്കാണ് കേന്ദ്രമന്ത്രി സുരേഷ് ഗോപി ഇടപെട്ട് സേവാഭാരതി വഴി വീട് നിര്മ്മിച്ച് നല്കിയത്. സാങ്കേതിക കാരണങ്ങള് പറഞ്ഞ് ഈ കുടുംബത്തിന് ഗ്രാമപഞ്ചായത്ത് ലൈഫ് ആനുകൂല്യം നിഷേധിക്കുകയായിരുന്നു. രണ്ട് പെണ്കുട്ടികളുള്ള കുടുംബം ഫ്ലക്സ് ഷീറ്റ് കൊണ്ട് മറച്ച ഒറ്റമുറി കൂരയിലായിരുന്നു താമസം. തിരുവനന്തപുരത്തെ വേലായുധന്-സരസ്വതി ഫൗണ്ടേഷന്, തലക്കുളത്തൂര് സേവാഭാരതി എന്നീ സംഘടനകള് ചേര്ന്നാണ് രണ്ട് കിടപ്പുമുറികളുള്ള വീട് പണിത് നല്കിയത്.
സപ്തംബര് മൂന്നിന് നടന്ന ചടങ്ങില് സിപിഎം നേതാവും ഗ്രാമപഞ്ചായത്ത് പ്രസിഡന്റുമായ പ്രമീളയാണ് നിലവിളക്ക് കൊളുത്തിയത്. വിശിഷ്ടാതിഥികള്ക്ക് സ്നേഹോപഹാരം നല്കിയതും പ്രമീളയായിരുന്നു. രാജ്യസഭാ അംഗം സി. സദാനന്ദന് മാസ്റ്ററാണ് താക്കോല് ദാന ചടങ്ങ് ഉദ്ഘാടനം ചെയ്തത്. എല്ലാ രാഷ്ട്രീയ പാര്ട്ടി പ്രതിനിധികളെയും ക്ഷണിച്ചിരുന്നുവെന്ന് ഭവനനിര്മ്മാണ സമിതി ചെയര്മാന് എം. സുനില് പറഞ്ഞു. സിപിഎമ്മിന്റെയും സിപിഐയുടെയും പ്രതിനിധികള് ചടങ്ങില് വരാമെന്നേറ്റതാണ്. അടിയന്തര തിരക്കുകള് കാരണം അവര് എത്തില്ലെന്ന് അറിയിച്ചു. കോണ്ഗ്രസ്, മുസ്ലിം ലീഗ്, എന്സിപി, ജനതാദള് തുടങ്ങിയ സംഘടനകളുടെ പ്രാദേശിക നേതാക്കള് ചടങ്ങില് പങ്കെടുത്തു. ചടങ്ങില് പങ്കെടുക്കാമെന്നേറ്റിരുന്ന കെ. സത്യന് കെഎസ്ടിഎയുടെ ജില്ലാ നേതാവും സിപിഎം ഏരിയ കമ്മിറ്റി അംഗവും മുന് ഗ്രാമപഞ്ചായത്ത് പ്രസിഡന്റുമാണ്.
രാഷ്ട്രീയ അയിത്തത്തിന്റെ പേരില് ഗ്രാമപഞ്ചായത്ത് പ്രസിഡന്റിനെതിരേയെടുത്ത നടപടി ജനാധിപത്യ സമൂഹത്തിന് യോജിക്കുന്നതല്ലെന്ന് എം. സുനില് പറഞ്ഞു. പാവപ്പെട്ട കുടുംബത്തിന് ഗ്രാമപഞ്ചായത്ത് വീട് നിഷേധിച്ചത് കൊണ്ടാണ് സന്നദ്ധ സംഘടനകള് വീട് നിര്മാണത്തിന് മുന്നിട്ടിറങ്ങിയത്. ഒരു ഗ്രാമം മുഴുവന് പിന്തുണച്ച ഈ ഉദ്യമത്തെയാണ് സിപിഎം തള്ളിപ്പറഞ്ഞത്, അദ്ദേഹം പറഞ്ഞു.
