ആത്മഹത്യക്ക് ശ്രമിക്കുന്ന ആരും തന്നെ, ജീവിതം അവസാനിപ്പിക്കാന്‍ വേണ്ടിയല്ല, മറിച്ച് ജീവിതത്തില്‍ അവര്‍ നേരിടുന്ന വൈകാരികമായ, വിഷമകരമായ വെല്ലുവിളികളെ അതിജീവിക്കാനുള്ള കഴിവില്ലായ്‌മയില്‍ നിന്നും രക്ഷപ്പെടാനുള്ള ശ്രമം ആണ് അത് എന്ന ബോധ്യം പൊതുസമൂഹത്തിന് ഉണ്ടാകണം.
സാഹസികമായ പ്രവര്‍ത്തികളില്‍ സന്തോഷം കണ്ടെത്തുന്ന കൗമാരപ്രായക്കാരായ ആളുകള്‍ക്ക്, ജീവിതത്തില്‍ നേരിടുന്ന വെല്ലുവിളികളെയും വിഷമഘട്ടങ്ങളെയും സാഹസികമായി പരിഹരിക്കാന്‍ അവര്‍ നടത്തുന്ന ശ്രമമാണ് പലപ്പോഴും ആത്മഹത്യയിലേക്ക് നയിക്കുന്നത്.
കൗമാര പ്രായത്തിലുള്ളവരുടെ മാനസികാവസ്ഥയിലുള്ള, വ്യത്യാസം മുന്‍കൂട്ടി മനസ്സിലാക്കാന്‍ കഴിഞ്ഞാല്‍ അവരെ ഈ വിപത്തില്‍ നിന്ന് രക്ഷപ്പെടുത്തിയെടുക്കാന്‍ ആകും. കൗമാരക്കാരുടെ സാധാരണ മാനസികാവസ്ഥയില്‍ നിന്നുള്ള മാറ്റങ്ങളെയും സാധാരണ നിലയില്‍ കൂടുതലുള്ള ഉത്കണ്ഠയും പൊടുന്നനെ ഉണ്ടാകുന്ന ഭാവ ,സ്വഭാവ വ്യത്യാസങ്ങള്‍, ദിനചര്യകളില്‍ താല്പര്യമില്ലായ്‌മ, ഉറക്കക്കുറവ് എന്നിവ ‘മൂഡ് സ്വിങ്’ ലക്ഷണങ്ങളാണ്.
കുട്ടികളിലെ, വിശേഷിച്ചും കൗമാരക്കാരിലെ ഈ അവസ്ഥ നേരത്തെ തിരിച്ചറിയാനും അവരെ അത് ബോധിപ്പിക്കാനും കഴിഞ്ഞാല്‍ ക്രൂരകൃത്യങ്ങളില്‍ ഏര്‍പ്പെടാനോ നേര്‍ വിപരീതമായി ഡിപ്രഷനിലേക്ക് പോകാനോ, അത് ആത്മഹത്യയിലേക്ക് നയിക്കാനോ ഉള്ള അവരുടെ അവസ്ഥയില്‍ നിന്ന് രക്ഷനേടാനാകും.
മൂന്ന് പ്രധാനപ്പെട്ട കാര്യങ്ങളാണ് മൂഡ് സ്വിങ്ങില്‍ ശ്രദ്ധിക്കേണ്ടത് .
1.തീവ്രത
കൗമാരക്കാരുടെ വിഷാദരോഗത്തിന്റെ ലക്ഷണങ്ങളില്‍ മാനസികാവസ്ഥയിലെ മാറ്റങ്ങള്‍ (കോപം, സങ്കടം, ക്ഷോഭം), പെരുമാറ്റങ്ങള്‍ (സാധാരണയിലും കൂടുതലോ കുറവോ, ഉറങ്ങുകയോ ഭക്ഷണം കഴിക്കുകയോ ചെയ്യുക, മയക്കുമരുന്ന് അല്ലെങ്കില്‍ മദ്യം കഴിക്കുക, അഭിനയിക്കുക; സുഹൃത്തുക്കളില്‍ നിന്നും കുടുംബത്തില്‍ നിന്നും അകന്നു നില്‍ക്കുക), വികാരങ്ങള്‍ (ഏകാന്തത, അരക്ഷിതാവസ്ഥ, നിസ്സംഗത), ചിന്തകള്‍ (പ്രതീക്ഷയില്ലായ്‌മ, വിലകെട്ടതുപോലെയുള്ള പെരുമാറ്റം, ആത്മഹത്യാ ചിന്തകള്‍), ഗ്രഹണപരമായ അസ്വസ്ഥതകള്‍ (വേദന, ഭ്രമാത്മകത) എന്നിവ ഉള്‍പ്പെടുന്നു. ഈ ലക്ഷണങ്ങള്‍ കൂടുതല്‍ വ്യക്തമാകുമ്പോള്‍, പ്രശ്‌നം ഒരു താല്‍ക്കാലിക മാനസികാവസ്ഥയല്ല, മറിച്ച് വിഷാദമോ ക്രൂരമനോഭാവമോ ആകാനുള്ള സാധ്യത കൂടുതലാണ്.
2.ദൈര്‍ഘ്യം
രണ്ടാഴ്ചയോ അതില്‍ കൂടുതലോ ഇടവേളയില്ലാതെ പെരുമാറ്റത്തിലോ മാനസികാവസ്ഥയിലോ ഉണ്ടാകുന്ന ശ്രദ്ധേയമായ ഏതെങ്കിലും തകര്‍ച്ച ഗുരുതരമായ വിഷാദത്തെ സൂചിപ്പിക്കുന്നു. കുട്ടികള്‍ക്കും കൗമാരക്കാര്‍ക്കും മൈനര്‍ ഡിപ്രഷന്‍ അനുഭവപ്പെടാം.
3.മേഖലകള്‍
വീട്ടില്‍, സ്‌കൂളില്‍, സുഹൃത്തുക്കളുമായുള്ള ഇടപെടലുകളില്‍ എന്നിങ്ങനെ ഒരു കൗമാരക്കാരന്റെ പ്രവര്‍ത്തനത്തിന്റെ പല മേഖലകളിലും കാണപ്പെടുന്ന പ്രശ്‌നങ്ങള്‍, ഒരു പ്രത്യേക സാഹചര്യവുമായി ബന്ധപ്പെട്ട മോശം മാനസികാവസ്ഥയെയല്ല, മറിച്ച് ഒരു മാനസികാവസ്ഥയുടെ തകരാറിനെയാണ് സൂചിപ്പിക്കുന്നത് എന്ന് തിരിച്ചറിയാന്‍ കഴിയണം.
‘മൂഡ് സ്വിങ്’ ന്റെ തീവ്രതയും, ദൈര്‍ഘ്യവും കൗമാരപ്രായക്കാരില്‍ ഉണ്ടെന്നു കണ്ടാല്‍ അവരെ അത് ബോധിപ്പിക്കാനും, ആവശ്യമെങ്കില്‍ ചികിത്സ നിര്‍ദേശിക്കാനും രക്ഷിതാക്കളും പൊതുസമൂഹവും ശ്രദ്ധ ചെലുത്തേണ്ടത് അനിവാര്യമാണ്.
(അധ്യാപകനും , സര്‍ട്ടിഫൈഡ് അഡോളസന്‍സ് കൗണ്‍സിലറും, നാഷണല്‍ ബുക്ക് ഓഫ് റെക്കോര്‍ഡ്‌സ് ഭാരത് വിഭൂഷന്‍ അവാര്‍ഡ് ജേതാവും ആണ് ലേഖകന്‍)
ജന്മഭൂമി ഓണ്‍ലൈന്‍