കല്‍പറ്റ: താമരശേരി ചുരത്തില്‍ നിയന്ത്രണം വിട്ട് സംരക്ഷണ വേലി തകര്‍ത്ത കണ്ടെയ്‌നര്‍ ലോറി കൊക്കയില്‍ വീഴാതെ തലനാരിഴയ്ക്ക് രക്ഷപ്പെട്ടു. കര്‍ണാടകയില്‍ നിന്ന് ഇരുചക്രവാഹന ലോഡുമായി വന്ന ലോറിയാണ് വന്‍ അപകടത്തില്‍ നിന്നും രക്ഷപ്പെട്ടത്.
ഒന്‍പതാം വളവില്‍ ഉച്ചയ്‌ക്ക് ഒരുമണിയോടെയാണ് സംഭവം.സുരക്ഷ വേലി തകര്‍ന്ന് ലോറി അല്‍പ്പം മുന്നോട്ട് നീങ്ങിയെങ്കിലും കൊക്കയില്‍ വീണില്ല.
ഡ്രൈവര്‍ കാബിന്‍ പൂര്‍ണമായും ഉയരത്തിലെ റോഡില്‍ നിന്ന് മാറി കൊക്കയ്‌ക്ക് മുകളില്‍ തങ്ങി നില്‍ക്കുകയായിരുന്നു.ലോറിയില്‍ ലോഡുണ്ടായിരുന്നതിനാല്‍ അതിന്റെ ഭാരത്തില്‍ ആ ഭാഗം റോഡില്‍ തന്നെ തങ്ങി നിന്നു.ഡ്രൈവര്‍ മാത്രമായിരുന്നു ലോറിയിലുണ്ടായിരുന്നത്. അപകടം ഉണ്ടായ ഉടനെ ഓടിക്കൂടിയ ചുരം സംരക്ഷണ സമിതി പ്രവര്‍ത്തകരും ചുരം ഗ്രീന്‍ ബ്രിഗേഡ് പ്രവര്‍ത്തകരും മറ്റു വാഹനങ്ങളിലെ യാത്രക്കാരും ചേര്‍ന്ന് കയറിട്ട് കൊടുത്ത് ഡ്രൈവറെ പുറത്തിറക്കി.
പൊലീസും കല്‍പറ്റയില്‍ നിന്നുള്ള അഗ്‌നിരക്ഷ സേനാംഗങ്ങളും അപകടസ്ഥലത്തുണ്ട്. വൈത്തിരിയില്‍ നിന്ന് ക്രെയിന്‍ എത്തിച്ച് ലോറി മാറ്റാനുള്ള നീക്കമാണ് നടത്തുന്നത്. ചുരത്തില്‍ ഒരു ഭാഗത്ത് കൂടെ മറ്റ് വാഹനങ്ങള്‍ കടത്തി വിടുന്നുണ്ട്. അതിനാല്‍ ഗതാഗത തടസം അനുഭവപ്പെടുന്നുണ്ട്.
