ബെംഗളൂരു: ഹിന്ദുത്വത്തെ തകര്ക്കാന് അര്ബന് നക്സലുകളും കമ്മ്യൂണിസ്റ്റുകളും ആസൂത്രണം ചെയ്ത അജണ്ടയുടെ മറ്റൊരു ടൂള്കിറ്റാണ് ഭാനു മുഷ്താഖ് എന്ന എഴുത്തുകാരിയെക്കൊണ്ട് ഹിന്ദുക്കളുടെ ദസറ ഉത്സവം ഉദ്ഘാടനം ചെയ്യിക്കാനുള്ള നീക്കണമെന്ന് ബിജെപി എംപിയും യുവമോര്ച്ച ദേശീയ അധ്യക്ഷനുമായ തേജസ്വി സൂര്യ.
“ഈയിടെ കര്ണ്ണാടക സര്ക്കാര് ഒരു വര്ഗ്ഗീയ വിരുദ്ധ ദൗത്യ സേന രൂപീകരിക്കുമെന്ന് പ്രഖ്യാപിച്ചിരിക്കുന്നു. രാഹുല് ഗാന്ധിയുടെ നിര്ദേശപ്രകാരം രോഹിത് വെമുല ബില് നടപ്പാക്കാന് പോകുന്നു. അതുപോലെ ധര്മ്മസ്ഥലയിലെ പ്രത്യേക അന്വേഷണ സംഘത്തെ ഏര്പ്പെടുത്തിയുള്ള പ്രഹസനം- ഇതെല്ലാം ഹിന്ദുത്വത്തെ ദുര്ബലപ്പെടുത്താനുള്ള കര്ണ്ണാടക സര്ക്കാരിന്റെ നീക്കമാണ്. അതിന്റെ ഒടുവിലുത്തെ സംഭവമാണ് ഭാനു മുഷ്താഖ് എന്ന എഴുത്തുകാരിയെക്കൊണ്ട് ദസറ ഉത്സവം ഉദ്ഘാടനം ചെയ്യിക്കാനുള്ള നീക്കം.ഇത് മാവോയിസ്റ്റ് നക്സലുകളുടെയും മാക്സിസ്റ്റുകളുടെയും അജണ്ടയാണ്. അതിന് സിദ്ധരാമയ്യയും കോണ്ഗ്രസും സകലപിന്തുണയും നല്കുന്നു. ഈ ഗൂഢ അജണ്ട ഞങ്ങള് സര്വ്വശക്തിയുമെടുത്ത് എതിര്ക്കും.”- തേജസ്വി സൂര്യ പറഞ്ഞു.
“നേരത്തെ ഭൂവനേശ്വരി ദേവിയെ അപമാനിച്ച വ്യക്തിയാണ് ഭാനു മുഷ്കാഖ്. കന്നട ഭാഷയെ ഭൂവനേശ്വരി ദേവിയായി കാണുന്ന സങ്കല്പത്തെ എതിര്ത്ത എഴുത്തുകാരിയാണ് ഭാനു മുഷ്താഖ്. അതുപോലെ കന്നഡ കൊടിയിലെ ഹിന്ദു സാംസ്കാരിക പ്രതീകങ്ങളെയും ഭാനു മുഷ്താഖ് എതിര്ത്തിട്ടുള്ളതാണ്. അവരെക്കൊണ്ട് തന്നെ ദസറ ചാമുണ്ഡേശ്വരീ പൂജ ഉദ്ഘാടനം ചെയ്യിക്കാനാണ് അവരുടെ ശ്രമം. ഇത് അവരുടെ രാഷ്ട്രീയ ഗൂഢാലോചനയുടെ ഭാഗമാണ്”- തേജസ്വി സൂര്യ പഞ്ഞു.
എന്താണ് ഭാനു മുഷ്താഖ് പറഞ്ഞത്?
“ക്ഷേത്രത്തിനകത്ത് സ്വര്ണ്ണസിംഹാസനത്തില് ഇരിക്കുന്ന ഭൂവനേശ്വരി ദേവിയുടെ പ്രതീകമായാണ് പലരും കന്നട ഭാഷയെ കാണുന്നത്. ഒരു ന്യൂനപക്ഷ മതത്തിലെ അംഗമെന്ന നിലയില് എനിക്കത് സ്വീകാര്യമല്ല. മഞ്ഞള് നിറത്തിലും കാവി നിറത്തിലുമാണ് നിങ്ങള് ഭൂവനേശ്വരീ ദേവിയെ കാണുന്നത്. അപ്പോള് ന്യൂനപക്ഷാംഗമായ ഞാന് എവിടെ നില്ക്കണം? എന്നെപ്പോലെയുള്ളവരെ പുറത്ത് നിര്ത്താന് തുടങ്ങിയത് ഇന്നല്ല, വളരെക്കാലമായി.”- ഭാനു മുഷ്താഖ് ഒരു ചടങ്ങില് നടത്തിയ വിവാദപ്രസംഗമാണിത്.
കഴിഞ്ഞ വര്ഷം ബുക്കര് സമ്മാനം നേടിയ എഴുത്തുകാരിയാണ്. ഭാനു മുഷ്താഖിന്റെ ചെറുകഥകള് ഇംഗ്ലീഷിലേക്ക് ഹാര്ട് ലാമ്പ് എന്ന പേരില് വിവര്ത്തനം ചെയ്തിരുന്നു. ഈ ഇംഗ്ലീഷ് തര്ജ്ജമാ പുസ്തകത്തിനാണ് ബുക്കര് സമ്മാനം ലഭിച്ചത്. ദീപ ബഷ്ടി എന്ന എഴുത്തുകാരിയായിരുന്നു വിവര്ത്തക. ഹൃദയദീപ എന്ന പേരില് കന്നഡ ഭാഷയില് പ്രസിദ്ധീകരിച്ച പുസ്തകമാണിത്.
