തിരുവനന്തപുരം: മലയാളത്തിന്റെ പ്രിയ കവി വയലാര് രാമവര്മ്മ വിടവാങ്ങിയിട്ട് ഒക്ടോബര് 27ന് അമ്പത് വര്ഷമാകും. വയലാര് രാമവര്മ്മ സാഹിത്യ അവാര്ഡിനും അന്ന് അമ്പതു വയസാകുകയാണ്. ഒക്ടോബര് 27 മുതല് 2026 ഒക്ടോബര് 27 വരെയുള്ള ഒരുവര്ഷം വയലാര് ട്രസ്റ്റിന്റെ ആഭിമുഖ്യത്തില് വയലാര് വര്ഷമായി ആചരിക്കുകയും ഒരു വര്ഷത്തെ പരിപാടികള് സംഘടിപ്പിക്കുകയും ചെയ്യുന്നു.
നാടകം, ചിത്രരചന, കവിതാലാപനം, ഗാനാലാപനം നൃത്താവിഷ്ക്കാരം, ക്വിസ് എന്നിങ്ങനെ കോളജ്, സ്കൂള് വിദ്യാര്ത്ഥികള്ക്കായി മത്സരങ്ങള്, ബിനാലയില് വയലാര് സെഗ്മെന്റ്, സെമിനാറുകള്, സാഹിത്യ സമ്മേളനങ്ങള്, ഡോക്യുമെന്ററി, ഡിജിറ്റല് ലൈബ്രറി, സുവനീര്, കള്ച്ചറല് എക്സ്ചേഞ്ച് പ്രോഗ്രാമുകള് തുടങ്ങി വിപുലമായ പരിപാടികളുമായാണ് വയലാര് വര്ഷം സംഘടിപ്പിക്കുന്നത്.
സംസ്ഥാന സര്ക്കാരിന്റെ വിവിധ വകുപ്പുകളുടെയും വയലാറിനെ സ്നേഹിക്കുന്ന വിവിധ സംഘടനകളുടെയും സഹായത്തോടെയും സഹകരണത്തോടെയും പങ്കാളിത്തത്തോടെയുമാണ് പരിപാടികള് സംഘടിപ്പിക്കുന്നത്.
സാംസ്കാരിക വകുപ്പ്, ടൂറിസം, ധനകാര്യ വകുപ്പ്, ലൈബ്രറി കൗണ്സില്, ബിനാലെ ട്രസ്റ്റ്, സാഹിത്യ അക്കാഡമി, മീഡിയാ അക്കാഡമി, പ്രസ് ക്ലബ്ബ്, വൈലോപ്പിള്ളി സംസ്കൃതി ഭവന്, ഭാരത് ഭവന്, സര്വ്വകലാശാലകള്, പൊതുവിദ്യാഭ്യാസ സംവിധാനം, സ്വകാര്യ ബിസിനസ് സ്ഥാപനങ്ങള് തുടങ്ങി മലയാള ഭാഷയെ സ്നേഹിക്കുന്ന വ്യക്തികളെയും സ്ഥാപനങ്ങളെയും വകുപ്പുകളെയും സമിതികളെയും ചേര്ത്തായിരിക്കും വയലാര് വര്ഷം സംഘടിപ്പിക്കുന്നത്.
ആഘോഷപരിപാടികളില് സഹകരിക്കാനാഗ്രഹിക്കുന്ന സംഘടനകള് ഇനി പറയുന്ന വാട്ട്സ്ആപ്പ് നമ്പരില് ബന്ധപ്പെടേണ്ടതാണ്. 9495047964. വയലാറിന്റെ രചനയെ, പുതിയ തലമുറയിലേക്ക് എത്തിക്കുന്നതിന് വേണ്ടിയാണ് വയലാര് വര്ഷം ആചരിക്കുന്നതെന്ന് തിരുവനന്തപുരത്ത് നടത്തിയ വാര്ത്താ സമ്മേളനത്തില് വയലാര് ട്രസ്റ്റ് അംഗങ്ങള് അറിയിച്ചു. ട്രസ്റ്റ് അംഗങ്ങളായ പ്രഭാവര്മ്മ, സി. ഗൗരിദാസന് നായര്, ഡോക്ടര് വി. രാമന്കുട്ടി, സെക്രട്ടറി ബി. സതീശന് എന്നിവര് പത്രസമ്മേളനത്തില് പങ്കെടുത്തു.
