ബെംഗളൂരു: ധര്‍മ്മസ്ഥല എന്ന ഹിന്ദുദേവാലയത്തെ സ്ത്രീകളെയും പെണ്‍കുട്ടികളെയും ബലാത്സംഗം ചെയ്ത് കൊന്നുതള്ളുന്ന സ്ഥലമാണെന്ന് ചിത്രീകരിച്ച് വ്യാജപ്രചാരണം നടത്താന്‍ എത്തിയത് 9000 യൂട്യൂബര്‍മാര്‍. ഒരു പള്ളിയെയോ ചര്‍ച്ചിനെയോ ഇതുപോലെ തൊടാന്‍ ഒരു മാധ്യമങ്ങളും ധൈര്യപ്പെടില്ലെന്നിരിക്കെ, ധര്‍മ്മസ്ഥലയെ അപകീര്‍ത്തിപ്പെടുത്താന്‍ ഇത്രയും യൂട്യൂബര്‍മാര്‍ രംഗത്തെത്തിയതിന് പിന്നില്‍ ഒരു ഗൂഢാലോചന സംശയിക്കപ്പെടുന്നു.
മിക്കവാറും ഈ യൂട്യൂബര്‍മാര്‍ക്ക് സാമ്പത്തിക സഹായം നല്‍കപ്പെട്ടിരിക്കാമെന്നാണ് സംശയിക്കപ്പെടുന്നത്. 9000 യൂട്യൂബര്‍മാര്‍ ദിവസേനയെന്നോണം ധര്‍മ്മസ്ഥലയ്‌ക്കെതിരെ വീഡിയോകള്‍ ഇറക്കുകയായിരുന്നു. ന്യൂനപക്ഷ സമുദായത്തിലെ ആരാധനാലയങ്ങള്‍ക്കെതിരെ ഇതുപോലുള്ള പല ബലാത്സംഗ, കൊലപാതക ആരോപണങ്ങള്‍ ഉയര്‍ന്നിട്ടും ഇതുപോലെ ഒരു മാധ്യമവിചാരണ നടന്നിട്ടില്ല.
ഉദാഹരണത്തിന് 1992ലെ അജ്മീര്‍ ബലാത്സംഗക്കേസില്‍ ഇരയായത് 250 പെണ്‍കുട്ടികളാണ്. 11നും 20നും ഇടയില്‍ പ്രായമുള്ള പെണ്‍കുട്ടികളാണ് ഒരു ബലാത്സംഗ ഗ്യാങ്ങിന്റെ പിടിയില്‍പ്പെട്ട് ബലാത്സംഗത്തിന് ഇരയായത്. പക്ഷെ ഈ കേസുകള്‍ ഉണ്ടായപ്പോഴൊന്നും ഇത്രയൊന്നും മാധ്യമവിചാരണ ഉണ്ടായില്ല. അജ്മീര്‍ ദര്‍ഗയിലെ കെയര്‍ ടേക്കര്‍ കുടുംബത്തില്‍ ഉള്‍പ്പെട്ടവര്‍ ഈ ബലാത്സംഗഗ്രൂപ്പില്‍ അംഗമായിട്ടും കാര്യമായ മാധ്യമചലനം ഉണ്ടായില്ല. ഒരു ക്രിസ്തീയ ദേവാലയത്തിലെ നൂറുകണക്കിന് ദുരൂഹമരണം നടന്നുവെന്ന ആരോപണത്തെക്കുറിച്ചും ഒരു മാധ്യമവും വിചാരണ ചെയ്യാന്‍ ഒരുമ്പെട്ടില്ല. ഇത്രയും വലിയ ഒരു ഹിന്ദു ദേവാലയത്തിനെതിരെ ഇല്ലാത്ത കൂട്ടക്കൊലപാതകങ്ങള്‍ കൊട്ടിഘോഷിക്കാന്‍ 9000 യൂട്യൂബര്‍മാര്‍ വന്നു എന്നത് അത്ഭുതപ്പെടുത്തുന്നു. അതിന് പിന്നാലെ കേരളത്തിലെ ന്യൂസ് 18 മലയാളം, റിപ്പോര്‍ട്ടര്‍, 24 ന്യൂസ്, മീഡിയവണ്‍ തുടങ്ങിയ ചാനലുകളും കര്‍ണ്ണാടകയിലെ ഒരു ഹിന്ദുക്ഷേത്രത്തെ അപകീര്‍ത്തിപ്പെടുത്താനുള്ള വിചാരണയില്‍ ദിവസങ്ങളോളം ഇല്ലാക്കഥകള്‍ പറയാനുള്ള ഗൂഢാലോചനയില്‍ പങ്കാളിയായതും അത്ഭുതപ്പെടുത്തുന്നു. കേരളത്തിലെ ടിവി ചാനലുകള്‍ മറ്റൊരു സംസ്ഥാനത്തെ ഹിന്ദുദേവാലയത്തെ തകര്‍ക്കാന്‍ വേണ്ടിപ്പോയതിന് പിന്നിലെ പ്രചോദനം എന്താണെന്നത് അജ്ഞാതമാണ്.
ഇത്രയും യൂട്യൂബര്‍മാര്‍ യാദൃച്ഛികമായി പേജ് വ്യൂസ് കിട്ടും എന്നറിഞ്ഞുകൊണ്ട് ആ വാര്‍ത്ത കവര്‍ ചെയ്യാന്‍ എത്തിയതാണോ അതോ അവര്‍ക്ക് ആരെങ്കിലും അതിന് ധനസഹായം നല്‍കിയോ? കേരളത്തില്‍ നിന്നുള്ള മാധ്യമങ്ങളെ ആരാണ് സ്വാധീനിച്ചത്. അവര്‍ സത്യം തേടാന്‍ ചെന്നതാണോ അതോ അവര്‍ക്ക് സാമ്പത്തിക നേട്ടം എന്തെങ്കിലും ഉണ്ടായോ? കേരളത്തില്‍ നിന്നുള്ള ചില ഇടത് നേതാക്കള്‍ ഇതിന് പിന്നില്‍ പ്രവര്‍ത്തിച്ചതായും ആരോപണമുണ്ട്.
അതുപോലെ കര്‍ണ്ണാടകത്തിലെ കോണ്‍ഗ്രസ് സര്‍ക്കാര്‍ ആരോപണം ഉയര്‍ന്നയുടന്‍ കേന്ദ്ര ആഭ്യന്തരമന്ത്രാലയത്തിന്റെപ്പോലും അനുമതിയില്ലാതെ എസ് ഐ ടി രൂപീകരിച്ചതിലും ദുരൂഹതയുണ്ട്. അതായത് കര്‍ണ്ണാടകത്തിലെ കോണ്‍ഗ്രസ് സര്‍ക്കാര്‍ ഇതിന് പിന്നിലുണ്ട് എന്നാണര്‍ത്ഥം. ഇത്രയും ശക്തമായ ധര്‍മ്മസ്ഥല പോലുള്ള ഒരു ക്ഷേത്രത്തിലെ, ഹൈന്ദവസംഘടനകള്‍ക്ക് ഉറച്ച സ്വാധീനമുള്ള ദക്ഷിണ്‍ കന്നഡ ജില്ലയിലെ ഇത്രയും വലിയ തീര്‍ത്ഥാടനകേന്ദ്രത്തിലെ 17 പ്ലോട്ടുകള്‍ എങ്ങിനെ കുഴിച്ചുനോക്കാനായി? ഇതിനായി കര്‍ണ്ണാടക സര്‍ക്കാര്‍ 60 ലക്ഷത്തോളം രൂപയെങ്കിലും ചെലവാക്കി. ഇതിനര്‍ത്ഥം സിദ്ധരാമയ്യ സര്‍ക്കാരിന് കൃത്യമായ രാഷ്‌ട്രീയ ലക്ഷ്യം ഇതിന് പിന്നില്‍ ഉണ്ടെന്നത് തന്നെയാണ്. ഈ ഗൂഢാലോചനയില്‍ ആകെ അറസ്റ്റ് ചെയ്തത് മഹേഷ് ഷെട്ടി തിമ്മറോഡി എന്ന വ്യക്തിയെ മാത്രമാണ്. ഇദ്ദേഹം ഹൈന്ദവ സംഘടനകളില്‍ മുന്‍ കാലങ്ങളില്‍ പ്രവര്‍ത്തിച്ചിരുന്നതായി പറയുന്നു. പിന്നീട് ക്ഷേത്രത്തിന് ചുറ്റുമുള്ള ഭൂമികള്‍ വാങ്ങാനും വില്‍ക്കാനും ശ്രമിച്ചതുമായി ബന്ധപ്പെട്ട് ക്ഷേത്രാധികാരിയുമായി ഇദ്ദേഹം പിണങ്ങിയിരുന്നു. മഹേഷ് തിമ്മരോഡിയെ അറസ്റ്റ് ചെയ്തത് വഴി ധര്‍മ്മസ്ഥല പ്രദേശത്തെ രണ്ട് ഹൈന്ദവ വിഭാഗങ്ങളെ തമ്മിലടിപ്പിക്കാന്‍ സിദ്ധരാമയ്യ സര്‍ക്കാരിന് സാധിച്ചു.
പക്ഷെ ഈ വലിയ ഗൂഢാലോചനയ്‌ക്ക് പിന്നില്‍ മതപരിവര്‍ത്തന ലോബികള്‍, മാവോയിസ്റ്റ് ഗ്രൂപ്പുകള്‍, തീവ്ര ഇടത് മാധ്യമസംഘങ്ങള്‍, ചില ഇസ്ലാമിക സംഘടനകള്‍ എന്നിവരും ഉണ്ടെന്ന ആരോപണമുണ്ട്. അവര്‍ക്കെതിരെ ഒരു നീക്കവും ഇതുവരെയും പൊലീസിന്റെ ഭാഗത്ത് നിന്നും ഉണ്ടായിട്ടില്ലെന്നതും കര്‍ണ്ണാടക സര്‍ക്കാരിന്റെ നടപടിയില്‍ ആശങ്ക ഉളവാക്കുന്നു.
