ന്യൂഡൽഹി : ആർഎസ്എസ് “ഇന്ത്യൻ താലിബാൻ” ആണെന്ന് പ്രസ്താവിച്ച മുതിർന്ന കോൺഗ്രസ് നേതാവ് ബി കെ ഹരിപ്രസാദിനെതിരെ രൂക്ഷവിമർശനം ഉയരുന്നു. കോൺഗ്രസ് എല്ലാ ദേശീയവാദ സംഘടനകളെയും അപമാനിക്കുകയും, പിഎഫ്ഐ, സിമി പോലുള്ള നിരോധിത തീവ്രവാദ സംഘടനകളെ സ്നേഹിക്കുകയുമാണെന്ന് ബിജെപി പറഞ്ഞു.
മുൻ എംപിയും നിലവിൽ കർണാടക ലെജിസ്ലേറ്റീവ് കൗൺസിൽ അംഗവുമായ ഹരിപ്രസാദ്, സ്വാതന്ത്ര്യദിന പ്രസംഗത്തിൽ പ്രധാനമന്ത്രി നരേന്ദ്ര മോദി ആർ എസ് എസിനെ പ്രശംസിച്ചതിനെതിരെയാണ് രംഗത്തെത്തിയത് .
“അവർ (ആർഎസ്എസ്) രാജ്യത്തെ സമാധാനം തകർക്കാൻ ശ്രമിക്കുകയാണ്. ഞാൻ ആർഎസ്എസിനെ താലിബാനുമായി മാത്രമേ താരതമ്യം ചെയ്യൂ, അവർ ഇന്ത്യൻ താലിബാൻ ആണ്, പ്രധാനമന്ത്രി അവരെ ചെങ്കോട്ടയിൽ നിന്ന് അഭിനന്ദിക്കുന്നു . ഏതെങ്കിലും ‘സംഘി’ സ്വാതന്ത്ര്യ സമരത്തിൽ പങ്കെടുത്തിട്ടുണ്ടോ? ആർഎസ്എസ് രജിസ്റ്റർ ചെയ്ത സംഘടനയല്ല എന്നത് ലജ്ജാകരമാണ്. അവർക്ക് എവിടെ നിന്ന് ഫണ്ട് ലഭിക്കുന്നു എന്ന് അറിയണം . രാജ്യത്ത് പ്രവർത്തിക്കാൻ ആഗ്രഹിക്കുന്ന ഏതൊരു എൻജിഒയും ഭരണഘടന പ്രകാരം രജിസ്റ്റർ ചെയ്യണം.
ബിജെപിയും ആർഎസ്എസും “ചരിത്രം വളച്ചൊടിക്കുന്നതിൽ” വിദഗ്ധരാണ് . അവർ ചരിത്രം തിരുത്തിയെഴുതാൻ ശ്രമിക്കുകയാണ്. സ്വാതന്ത്ര്യത്തിന് മുമ്പ് ബംഗാൾ പ്രധാനമന്ത്രിയായിരുന്ന എ കെ ഫസലുൽ ഹഖും (സംഘ് പ്രത്യയശാസ്ത്രജ്ഞൻ) ശ്യാമ പ്രസാദ് മുഖർജിയുമാണ് വിഭജനത്തിനായി ബംഗാളിൽ ആദ്യ പ്രമേയം അവതരിപ്പിച്ചത്. (മുഹമ്മദ് അലി) ജിന്നയും (വിനായക്) സവർക്കറും രണ്ട് മതങ്ങൾക്കും പ്രത്യേക രാഷ്ട്രം ആവശ്യമാണെന്ന് അഭിപ്രായപ്പെട്ടിരുന്നു. അതിന് അവർ കോൺഗ്രസിനെ കുറ്റപ്പെടുത്താൻ ശ്രമിക്കുകയാണ്,” എന്നാണ് ഹരിപ്രസാദ് പറഞ്ഞത്.
അതേസമയം ബിജെപി വക്താവ് ഷെഹ്സാദ് പൂനവല്ല ശ്രീ ഹരിപ്രസാദിനെതിരെ രൂക്ഷമായ വിമർശനവുമായി രംഗത്തെത്തി. ‘ “ കോൺഗ്രസ് ഇന്ത്യൻ സൈന്യത്തെ ഗുണ്ടകളായും, ആർഎസ്എസിനെ താലിബാനായും ഓപ്പറേഷൻ സിന്ദൂറിനെ പരാജയമായുമാണ് കാണുന്നത്. എന്നാൽ പാകിസ്ഥാനെ തങ്ങളുടേ സ്വന്തമായും അവർ കണക്കാക്കുന്നു. ശക്തികളെയും ഭരണഘടനാ സ്ഥാപനങ്ങളെയും സാമൂഹിക സംഘടനകളെയും സനാതനത്തെയും അപമാനിക്കുന്നത് കോൺഗ്രസിന്റെ സ്വത്വമായി മാറിയിരിക്കുന്നു. ദേശീയ സംഘടനകളെ ലക്ഷ്യം വച്ചതിന്റെ പേരിൽ കോടതികൾ അവരെ പലതവണ വിമർശിച്ചിട്ടുണ്ട് . കോൺഗ്രസിന്റെ മാനസികാവസ്ഥ താലിബാനാണ്. മഹാത്മാഗാന്ധിയും ജയപ്രകാശ് നാരായണനും ആർ.എസ്.എസിനെ പ്രശംസിച്ചത് എന്തുകൊണ്ട്? (മുൻ രാഷ്ട്രപതിയും കോൺഗ്രസ് നേതാവുമായ) പരേതനായ പ്രണബ് മുഖർജി എന്തിനാണ് ആർ.എസ്.എസ് ആസ്ഥാനം സന്ദർശിച്ചത്?”ഇതൊക്കെ ഒന്ന് ചിന്തിക്കണം “ – ഷെഹ്സാദ് പൂനവല്ല പറഞ്ഞു.
രാഷ്ട്രത്തിനായുള്ള 100 വർഷത്തെ സേവനം പൂർത്തിയാക്കിയതിനാണ് മോദി രാഷ്ട്രീയ സ്വയംസേവക സംഘത്തെ പ്രശംസിച്ചത്. “ലോകത്തിലെ ഏറ്റവും വലിയ എൻജിഒ” എന്ന് ആർ എസ് എസിനെ വിശേഷിപ്പിക്കുകയും രാഷ്ട്രനിർമ്മാണത്തിനുള്ള അതിന്റെ സംഭാവനയെ പ്രശംസിക്കുകയും ചെയ്തിരുന്നു.
