ചെങ്കോട്ടയില്‍ മുഴങ്ങിയത് ‘സമൃദ്ധ് ഭാരത്’ മന്ത്രം

മെയ്ഡ് ഇന്‍ ഇന്ത്യ

ഓപ്പറേഷന്‍ സിന്ദൂരില്‍ മെയ്ഡ് ഇന്‍ ഇന്ത്യയുടെ അത്ഭുതങ്ങള്‍ നമ്മള്‍ കണ്ടു. നിമിഷങ്ങള്‍ക്കുള്ളില്‍ എതിരാളികളെ നശിപ്പിക്കുന്ന തരത്തിലുള്ള നമ്മുടെ വെടിക്കോപ്പുകള്‍ കണ്ട് ശത്രുക്കള്‍ പോലും ഞെട്ടി. ഈ രംഗത്ത് നമ്മള്‍ സ്വയംപര്യാപ്തരായിരുന്നില്ലെങ്കില്‍, ഇത്രയും ഉയര്‍ന്ന നിലയില്‍ ഓപ്പറേഷന്‍ സിന്ദൂര്‍ നടത്താന്‍ നമുക്ക് കഴിയുമായിരുന്നോ? കഴിഞ്ഞ 10 വര്‍ഷമായി, പ്രതിരോധ മേഖലയില്‍ സ്വയംപര്യാപ്തരാകുക എന്നതാണ് നമ്മുടെ ലക്ഷ്യം, ഇന്ന് നമ്മള്‍ അതിന്റെ ഫലങ്ങള്‍ കാണുന്നു’

മുന്‍കാല സ്ഥിതി

സാങ്കേതികവിദ്യയുടെ വ്യത്യസ്ത വശങ്ങളെക്കുറിച്ച് സംസാരിക്കുമ്പോള്‍, ഒരു ഉദാഹരണമായി സെമി കണ്ടക്ടറുകളുടെ കാര്യത്തിലേക്ക് ഞാന്‍ നിങ്ങളുടെ ശ്രദ്ധ ക്ഷണിക്കുന്നു. ഒരു സര്‍ക്കാരിനെയും ചെങ്കോട്ടയില്‍നിന്നുകൊണ്ട് വിമര്‍ശിക്കാന്‍ എനിക്ക് താല്‍പ്പര്യമില്ല. പക്ഷേ രാജ്യത്തെ യുവാക്കള്‍ ചില ചരിത്രങ്ങള്‍ അറിയണം.

നമ്മുടെ രാജ്യത്ത് സെമി കണ്ടക്ടറുകളെക്കുറിച്ചുള്ള ഫയല്‍ ജോലികള്‍ ആരംഭിച്ചത് 50-60 വര്‍ഷം മുമ്പാണ്. പക്ഷേ ആ ആശയം തുടക്കത്തില്‍ത്തന്നെ കൊല്ലപ്പെട്ടുവെന്ന് അറിയുമ്പോള്‍ നിങ്ങള്‍ അത്ഭുതപ്പെടും. നമുക്ക് 50-60 വര്‍ഷങ്ങള്‍ നഷ്ടപ്പെട്ടു.

ഊര്‍ജ്ജമേഖലയുടെ കാര്യം

നമ്മുടെ ഊര്‍ജ്ജ ആവശ്യങ്ങള്‍ നിറവേറ്റാന്‍ നമ്മള്‍ ഇപ്പോഴും പല രാജ്യങ്ങളെയും ആശ്രയിക്കുന്നു. എന്നാല്‍ യഥാര്‍ത്ഥത്തില്‍ സ്വയംപര്യാപ്തമായ ഒരു ഭാരതം കെട്ടിപ്പടുക്കുന്നതിന്, നാം ഊര്‍ജ്ജ സ്വാതന്ത്ര്യം കൈവരിക്കണം. കഴിഞ്ഞ 11 വര്‍ഷത്തിനുള്ളില്‍, നമ്മുടെ സൗരോര്‍ജ്ജ ശേഷി 30 മടങ്ങ് വര്‍ദ്ധിച്ചു. നമ്മള്‍ പുതിയ അണക്കെട്ടുകള്‍ നിര്‍മിക്കുന്നു. ഭാരതം ഇപ്പോള്‍ ആണവോര്‍ജ്ജത്തില്‍ സജീവമായി ശ്രദ്ധ കേന്ദ്രീകരിക്കുന്നു. ഈ ദിശയില്‍ നമ്മള്‍ ഗണ്യമായ നടപടികള്‍ കൈക്കൊണ്ടിട്ടുണ്ട്, നിലവില്‍ 10 പുതിയ ആണവ റിയാക്ടറുകള്‍ പ്രവര്‍ത്തനക്ഷമമാണ്. ഭാരതം സ്വാതന്ത്ര്യത്തിന്റെ 100 വര്‍ഷം ആഘോഷിക്കുമ്പോഴേക്കും, നമ്മുടെ ആണവോര്‍ജ്ജ ശേഷി പത്തിരട്ടിയായി വര്‍ദ്ധിപ്പിക്കാന്‍ ഈ സര്‍ക്കാര്‍ ലക്ഷ്യമിടുന്നു.’

ജെറ്റ് എന്‍ജിനും മരുന്നു നിര്‍മാണവും

ഇന്ന്, ഭാരതം എല്ലാ മേഖലകളിലും ഒരു ആധുനിക ആവാസവ്യവസ്ഥ കെട്ടിപ്പടുക്കുകയാണ്. യുവാക്കളോടും സര്‍ക്കാരിന്റെ എല്ലാ വകുപ്പുകളോടും എനിക്ക് അഭ്യര്‍ത്ഥിക്കാനുള്ളത് ഇതാണ്: നമ്മുടെ യുദ്ധവിമാനങ്ങള്‍ക്കായി ഭാരതത്തില്‍ നിര്‍മിച്ച ജെറ്റ് എന്‍ജിനുകള്‍ നിര്‍മിക്കാന്‍ നാം പരിശ്രമിക്കണം.

ലോകത്തിന്റെ ഔഷധശാല എന്നാണ് നമ്മള്‍ അറിയപ്പെടുന്നത്, പക്ഷേ ഗവേഷണത്തിലും വികസനത്തിലും കൂടുതല്‍ നിക്ഷേപിക്കേണ്ടത് കാലഘട്ടത്തിന്റെ ആവശ്യമല്ലേ? മനുഷ്യരാശിയുടെ ക്ഷേമത്തിനായി ഏറ്റവും മികച്ചതും താങ്ങാനാവുന്നതുമായ മരുന്നുകള്‍ നല്‍കുന്നത് നമ്മളല്ലേ?’

എണ്ണ കണ്ടെത്തല്‍

നമ്മള്‍ ഇപ്പോള്‍ ‘സമുദ്ര മന്ഥന്‍’ ലക്ഷ്യമാക്കി നീങ്ങുകയാണ്. ഇത് മുന്നോട്ട് കൊണ്ടുപോകുന്നതിനായി, കടലിലെ എണ്ണ, വാതക ശേഖരം കണ്ടെത്തുന്നതിനുള്ള ദൗത്യ മോഡില്‍ പ്രവര്‍ത്തിക്കാന്‍ സര്‍ക്കാര്‍ ആഗ്രഹിക്കുന്നു. അതിനാല്‍, ഭാരതം ദേശീയ ആഴക്കടല്‍ പര്യവേക്ഷണ ദൗത്യം ആരംഭിക്കാന്‍ പോകുന്നു.’

ഓപ്പറേഷന്‍ സിന്ദൂര്‍

ഏപ്രില്‍ 22 ന് പഹല്‍ഗാമില്‍ നടന്ന കൂട്ടക്കൊലയില്‍ ഭാരതം മുഴുവന്‍ പ്രകോപിതരായി, ലോകം മുഴുവന്‍ ഇത്തരമൊരു കൂട്ടക്കൊലയില്‍ ഞെട്ടി. ഭാരതം നടത്തിയ ‘ഓപ്പറേഷന്‍ സിന്ദൂര്‍’ ആ രോഷത്തിന്റെ പ്രകടനമായിരുന്നു. പാകിസ്ഥാനില്‍ അതുമൂലം ഉണ്ടായ നാശം വളരെ വലുതാണ്. ദിവസവും പുതിയ പുതിയ വെളിപ്പെടുത്തലുകള്‍ വരുന്നു, പുതിയ വിവരങ്ങള്‍ പുറത്തുവരുന്നു.

‘ചെങ്കോട്ടയുടെ കൊത്തളങ്ങളില്‍ നിന്ന്, ഓപ്പറേഷന്‍ സിന്ദൂറിന്റെ വീരന്മാരെ അഭിവാദ്യം ചെയ്യാന്‍ എനിക്ക് അവസരം ലഭിക്കുന്നതില്‍ ഞാന്‍ വളരെ അഭിമാനിക്കുന്നു. നമ്മുടെ ധീരരായ ജവാന്മാര്‍ ശത്രുവിനെ സങ്കല്‍പ്പിക്കാവുന്നതിലും അപ്പുറത്തേക്ക് ശിക്ഷിച്ചു. ഏപ്രില്‍ 22 ന് അതിര്‍ത്തിക്കപ്പുറത്തുള്ള തീവ്രവാദികള്‍ പഹല്‍ഗാമിലെത്തി അവിടെയുണ്ടായിരുന്ന വിനോദ സഞ്ചാരികളുടെ മതം ചോദിച്ചറിഞ്ഞ ശേഷം അവരെ കൊലചെയ്തു. ആ രോഷത്തിന്റെ പ്രകടനമാണ് ഓപ്പറേഷന്‍ സിന്ദൂര്‍. 22 ന് ശേഷം, നമ്മുടെ സായുധ സേനയ്‌ക്ക് സര്‍ക്കാര്‍ പൂര്‍ണ്ണ പ്രവര്‍ത്തന സ്വാതന്ത്ര്യം കൊടുത്തു. അവര്‍ തന്ത്രവും ലക്ഷ്യവും സമയവും തീരുമാനിച്ചു. പതിറ്റാണ്ടുകളായി ഒരിക്കലും ചെയ്യാത്തത് നമ്മുടെ സേന ചെയ്തു. നമ്മള്‍ നൂറുകണക്കിന് കിലോമീറ്റര്‍ ശത്രു മണ്ണിലേക്ക് പ്രവേശിച്ച് അവരുടെ ഭീകരപ്രവര്‍ത്തനങ്ങളുടെ ആസ്ഥാനങ്ങള്‍ തകര്‍ത്തു.

വിലകുറയും

‘ആദായനികുതി നിയമങ്ങളില്‍ സര്‍ക്കാര്‍ വലിയ പരിഷ്‌കാരങ്ങള്‍ നടപ്പിലാക്കിയിട്ടുണ്ട്, ചില ആളുകള്‍ക്ക് അതിന്റെ നേട്ടങ്ങള്‍ ബഹളത്തിനിടയില്‍ നഷ്ടമായിട്ടുണ്ടാകാം. കഴിഞ്ഞ പത്തുവര്‍ഷം പരിഷ്‌കരണത്തിന്റെയും, പ്രവര്‍ത്തനത്തിന്റെയും, പരിവര്‍ത്തനത്തിന്റെയും കാലമായിരുന്നു; ഇനി നമ്മള്‍ കൂടുതല്‍ വലിയ ലക്ഷ്യങ്ങളില്‍ ശ്രദ്ധ കേന്ദ്രീകരിക്കണം. നമ്മുടെ വ്യാപാരികളും കടയുടമകളും ‘സ്വദേശി’ ഉല്‍പ്പന്നങ്ങള്‍ക്കായി ബോര്‍ഡുകള്‍ പ്രദര്‍ശിപ്പിക്കണമെന്ന് ആഗ്രഹിക്കുന്നു.
ഈ ദീപാവലി, നിങ്ങള്‍ക്ക് ഞാന്‍ ഇരട്ട ദീപാവലിയാക്കും. എട്ട് വര്‍ഷമായി, ജിഎസ്ടിയില്‍ പ്രധാനപ്പെട്ട ചില പരിഷ്‌കാരം സര്‍ക്കാര്‍ നടപ്പിലാക്കിവരികയാണ്്. അടുത്ത ഘട്ടം ജിഎസ്ടി പരിഷ്‌കാരങ്ങള്‍ ഉടന്‍ വരും. ഇത് രാജ്യത്തുടനീളം നികുതി ഭാരം കുറയ്‌ക്കും.

സംരംഭകത്വം

കഴിഞ്ഞ 11 വര്‍ഷത്തിനിടയില്‍, സംരംഭകത്വം അഭിവൃദ്ധി പ്രാപിച്ചു, നമ്മുടെ സമ്പദ് വ്യവസ്ഥയെ ഉത്തേജിപ്പിക്കാന്‍ ടിയര്‍2, ടിയര്‍3 നഗരങ്ങളില്‍ ലക്ഷക്കണക്കിന് സ്റ്റാര്‍ട്ടപ്പുകള്‍ ഉണ്ട്; മുദ്ര യോജന കോടിക്കണക്കിന് യുവാക്കളെയും സ്ത്രീകളെയും മുദ്ര വായ്‌പകളിലൂടെ സഹായിച്ചിട്ടുണ്ട്.

ആദിവാസികള്‍ക്കൊപ്പം

നുഴഞ്ഞുകയറ്റം മൂലമുണ്ടാകുന്ന ജനസംഖ്യാപരമായ മാറ്റത്തിന്റെ വെല്ലുവിളിയെ നേരിടാന്‍ സര്‍ക്കാര്‍ ഈ രംഗത്ത് ജനസംഖ്യാപരമായ ദൗത്യ ഉന്നതാധികാര സമിതി രൂപീ
കരിക്കും. ഒരു ആശങ്കയെക്കുറിച്ചും വെല്ലുവിളിയെക്കുറിച്ചും രാജ്യത്തെ അറിയിക്കാന്‍ ഞാന്‍ ആഗ്രഹിക്കുന്നു. ചിലര്‍ നന്നായി ആലോചിച്ച് തയ്യാറാക്കിയ ഒരു ഗൂഢാലോചനയുടെ ഫലമായി രാജ്യത്തിന്റെ ജനസംഖ്യാ അനുപാത ശാസ്ത്രം മാറ്റിക്കൊണ്ടിരിക്കുന്നു. ഒരു പുതിയ പ്രതിസന്ധിയുടെ വിത്തുകള്‍ വിതയ്‌ക്കപ്പെടുന്നു. നുഴഞ്ഞുകയറ്റക്കാര്‍ നമ്മുടെ രാജ്യത്തെ യുവാക്കളുടെ ഉപജീവനമാര്‍ഗ്ഗം തട്ടിയെടുക്കുകയാണ്. രാജ്യത്തെ സഹോദരിമാരെയും പെണ്‍മക്കളെയും നുഴഞ്ഞുകയറ്റക്കാര്‍ ലക്ഷ്യമിടുന്നു. ഇത് അനുവദിക്കില്ല.

ഈ നുഴഞ്ഞുകയറ്റക്കാര്‍ നിരപരാധികളായ ആദിവാസികളെ തെറ്റിദ്ധരിപ്പിക്കുകയും അവരുടെ ഭൂമി കൈവശപ്പെടുത്തുകയും ചെയ്യുന്നു. രാജ്യം ഇത് വെച്ചുപൊറുപ്പിക്കില്ല. അതിര്‍ത്തി പ്രദേശങ്ങളില്‍ ജനസംഖ്യാപരമായ മാറ്റം സംഭവിക്കുമ്പോള്‍, അത് ദേശീയ സുരക്ഷയ്‌ക്ക് ഭീഷണിയാകുന്നു. ഒരു രാജ്യത്തിനും അത് അനുവദിക്കാനാവില്ല. അതിനാല്‍, ഈ സര്‍ക്കാര്‍ ഒരു ‘ഹൈ പവര്‍ ഡെമോഗ്രഫി മിഷന്‍’ ആരംഭിക്കാന്‍ തീരുമാനിച്ചു.

കര്‍ഷകര്‍ക്കായി

‘ഇന്ന് ഭാരതം പാല്‍, പയര്‍വര്‍ഗ്ഗങ്ങള്‍, ചണം എന്നിവയുടെ ഉല്‍പാദനത്തില്‍ ലോകത്ത് ഒന്നാം സ്ഥാനത്താണ്. രണ്ടാമത്തെ വലിയ മത്സ്യ ഉല്‍പ്പാദക രാജ്യവുമാണ്. അരി, ഗോതമ്പ്, പഴങ്ങള്‍, പച്ചക്കറികള്‍ എന്നിവയുടെ രണ്ടാമത്തെ വലിയ ഉല്‍പ്പാദക രാജ്യവുമാണ്. 4 ലക്ഷം കോടി രൂപയുടെ കാര്‍ഷികോല്‍പ്പന്നങ്ങളുടെ കയറ്റുമതി നടന്നിട്ടുണ്ട്. അവരെ പിന്തുണയ്‌ക്കാന്‍ നിരവധി പദ്ധതികളുണ്ട്. കര്‍ഷകര്‍ക്ക് സര്‍ക്കാര്‍ ഏര്‍പ്പെടുത്തിയ വിവിധ ഇന്‍ഷുറന്‍സ് പദ്ധതികള്‍ അവര്‍ക്ക് ധൈര്യമേകുന്നു.

സുദര്‍ശന പ്രതിരോധം

നമ്മെ ആക്രമിക്കാനുള്ള ശത്രുക്കളുടെ ഏതൊരു ശ്രമത്തെയും തടയുന്നതിന് ശക്തമായ ആയുധ സംവിധാനം സൃഷ്ടിക്കുന്നതിനായി ‘മിഷന്‍ സുദര്‍ശന്‍ ചക്ര’ ഭാരതം ആവിഷ്‌കരിക്കും.

‘അടുത്ത പത്ത് വര്‍ഷത്തിനുള്ളില്‍, 2035 ആകുമ്പോഴേക്കും, ഈ ‘ദേശീയ സുരക്ഷാ കവചം’ വികസിപ്പിക്കാനും ശക്തിപ്പെടുത്താനും നവീകരിക്കാനും സര്‍ക്കാര്‍ ആഗ്രഹിക്കുന്നു. ഭഗവാന്‍ ശ്രീകൃഷ്ണനില്‍ നിന്ന് പ്രചോദനം ഉള്‍ക്കൊണ്ട്, ഈ സംവിധാനത്തിന് ‘സുദര്‍ശന ചക്ര’ത്തിന്റെ മാതൃകയാണ് തിരഞ്ഞെടുത്തിരിക്കുന്നത്.

‘മരുഭൂമികളിലും ഹിമാലയ ശൃംഗങ്ങളിലും സമുദ്രതീരങ്ങളിലും തിരക്കേറിയ നഗരങ്ങളിലും എന്നുവേണ്ട, രാജ്യമെമ്പാടും മുഴങ്ങുന്ന ഒരേയൊരു ശബ്ദമുണ്ട്: നാമെല്ലാവരും ഭാരതത്തെ നമ്മുടെ ജീവനേക്കാള്‍ സ്നേഹിക്കുന്നു.

75 വര്‍ഷമായി, ഭാരത ഭരണഘടന ഒരു വിളക്കുമാടം പോലെ നമുക്ക് പാത കാണിച്ചുതരുന്നു.

ഭീകരതയുടെ യജമാനന്മാരെ അവരുടെ സങ്കല്‍പ്പത്തിനപ്പുറത്തേക്ക് ശിക്ഷിച്ച നമ്മുടെ ധീരരായ സൈനികരെ ഞാന്‍ അഭിവാദ്യം ചെയ്യുന്നു.

പഹല്‍ഗാം ആക്രമണ ശേഷം, ഭീകരരോട് പ്രതികരിക്കാന്‍ ഞങ്ങള്‍ സായുധ സേനയ്‌ക്ക് പൂര്‍ണ്ണ സ്വാതന്ത്ര്യം നല്‍കി.

രക്തവും വെള്ളവും ഒരുമിച്ച് ഒഴുകില്ലെന്ന് ഭാരതം ഇപ്പോള്‍ തീരുമാനിച്ചു. സിന്ധു നദീജല കരാര്‍ അന്യായമാണെന്ന് നമ്മള്‍ മനസ്സിലാക്കിക്കഴിഞ്ഞു. സിന്ധു നദീജല കരാര്‍ സംവിധാനത്തില്‍ നിന്നുള്ള വെള്ളം ശത്രുക്കളുടെ ഭൂമിയിലേക്ക് ജലസേചനം ചെയ്തുകൊണ്ടിരുന്നു, അതേസമയം നമ്മുടെ സ്വന്തം കര്‍ഷകര്‍ കഷ്ടപ്പെട്ടു. കഴിഞ്ഞ ഏഴ് പതിറ്റാണ്ടുകളായി നമ്മുടെ കര്‍ഷകര്‍ക്ക് ഇത്രയധികം നഷ്ടം വരുത്തിയ ഈ കരാര്‍ എന്തിനാണ്?

അടിമത്തം നമ്മെ ദരിദ്രരാക്കി. അത് നമ്മെ ആശ്രയിക്കുന്നവരാക്കി, കാലക്രമേണ, മറ്റുള്ളവരെ ആശ്രയിക്കുന്ന തോത് വളരുകയേ ചെയ്തുള്ളൂ. എന്നാല്‍ നമ്മുടെ കര്‍ഷകര്‍ നമ്മെ സ്വാശ്രയത്വത്തിലേക്ക് നയിക്കുകയും ഭക്ഷ്യസുരക്ഷ ഉറപ്പാക്കുകയും ചെയ്തു. ഇന്നും, ഒരു രാജ്യത്തിന്റെ യഥാര്‍ത്ഥ അഭിമാനം സ്വാശ്രയത്വത്തിലാണ്, അതാണ് വികസിത് ഭാരതത്തിന്റെ അടിത്തറ. മറ്റുള്ളവരെ ആശ്രയിക്കുന്നത് ഒരു രാജ്യത്തിന്റെ സ്വാതന്ത്ര്യത്തിനുമേല്‍ ചോദ്യങ്ങളുയര്‍ത്തും. ആശ്രയത്വം ശീലമാകുന്നത് നിര്‍ഭാഗ്യകരമാണ്, അപകടകരമാണ്. അതുകൊണ്ടാണ് നാം സ്വാശ്രയത്വം നേടുന്നതില്‍ ബോധവാന്മാരായിരിക്കുകയും പ്രതിജ്ഞാബദ്ധരായിരിക്കുകയും വേണം. സ്വാശ്രയത്വം എന്നത് കയറ്റുമതി, ഇറക്കുമതി, രൂപ അല്ലെങ്കില്‍ ഡോളര്‍ എന്നിവ മാത്രമല്ല. അത് നമ്മുടെ കഴിവുകളെക്കുറിച്ചും സ്വന്തംകാലില്‍ നില്‍ക്കാനുള്ള നമ്മുടെ ശക്തിയാണ്.

ഭാരതം ഗഗന്‍യാന്‍ ദൗത്യത്തില്‍ സജീവമായി പ്രവര്‍ത്തിക്കുകയും സ്വന്തമായി ബഹിരാകാശ നിലയം ആസൂത്രണം ചെയ്യുന്നു. നമ്മുടെ രാജ്യത്തിന്റെ വിധി മാറ്റാന്‍ നമ്മള്‍ ഒന്നിക്കണം. യുവാക്കളോട് ഞാന്‍ അഭ്യര്‍ത്ഥിക്കുന്നു: മുന്നോട്ട് വന്ന് ദേശീയ പരിവര്‍ത്തനത്തിന്റെ ഈ ദൗത്യത്തിന് സംഭാവന നല്‍കുക.

ലോകം ഗുണനിലവാരത്തെ വിലമതിക്കുന്നു, ആഗോള വിപണിയില്‍ ഭാരതത്തിന്റെ പ്രതിച്ഛായ ശക്തിപ്പെടുത്തണമെങ്കില്‍, ഉയര്‍ന്ന നിലവാരമുള്ള ഉല്‍പ്പന്നങ്ങള്‍ നിര്‍മ്മിക്കണം. ‘ദാം കം, ദം സ്യാദ’, (കുറഞ്ഞ ചെലവ്, ഉയര്‍ന്ന മൂല്യം) എന്ന മന്ത്രത്തോടെ നാം പ്രവര്‍ത്തിക്കണം.

നമ്മുടെ സ്വാതന്ത്ര്യം വലിയ ത്യാഗത്തിലൂടെയാണ് ഉണ്ടായത്. ഒരു രാഷ്‌ട്രം മുഴുവന്‍ ജീവിക്കുകയും സ്വാതന്ത്ര്യത്തിനായി പോരാടുകയും ചെയ്ത ആ വര്‍ഷങ്ങളെ ഓര്‍ക്കുക. അവരുടെ സമര്‍പ്പണം നമുക്ക് സ്വാതന്ത്ര്യം നല്‍കി.

ഇന്ന്, നമ്മുടെ മന്ത്രം ‘സമൃദ്ധ് ഭാരത്’, (സമ്പന്നമായ ഭാരതം) എന്നതായിരിക്കണം. നമ്മള്‍ തദ്ദേശീയര്‍ക്ക് വേണ്ടി ശബ്ദമുയര്‍ത്തുന്നത് തുടര്‍ന്നാല്‍, നമ്മള്‍ അഭിവൃദ്ധി കൈവരിക്കും. മുന്‍ തലമുറ നമുക്ക് സ്വാതന്ത്ര്യം നല്‍കി; ഭാരതത്തെ യഥാര്‍ത്ഥത്തില്‍ സമ്പന്നമാക്കാന്‍ ഈ തലമുറ പ്രതിജ്ഞാബദ്ധരാകണം.’

ആഗസ്ത് 15 ന്, ഒരു ലക്ഷം കോടി രൂപയുടെ ഒരു ചരിത്രപ്രധാന പദ്ധതിയായ പ്രധാന്‍മന്ത്രി വീക്ഷിത് ഭാരത് റോജ്ഗര്‍ യോജന സര്‍ക്കാര്‍ ആരംഭിക്കുകയാണ്. ഈ പദ്ധതി പ്രകാരം, സ്വകാര്യ മേഖലയില്‍ ആദ്യമായി ജോലി നേടുന്ന വ്യക്തികള്‍ക്ക് പിന്തുണയായി സര്‍ക്കാര്‍ 15,000 രൂപ നല്‍കും. ഈ സംരംഭം രാജ്യത്തുടനീളം 3.5 കോടി തൊഴിലവസരങ്ങള്‍ സൃഷ്ടിക്കുമെന്ന് പ്രതീക്ഷിക്കുന്നു.