റായ്പൂർ : സ്വാതന്ത്ര്യദിനത്തിൽ ഛത്തീസ്ഗഡിലെ എല്ലാ പള്ളികളിലും ദർഗകളിലും മദ്രസകളിലും ത്രിവർണ്ണ പതാക ഉയർത്തണമെന്നും, ദേശീയഗാനം ആലപിക്കണമെന്നും നിർദേശിച്ച് ഛത്തീസ്ഗഡ് വഖഫ് ബോർഡ് . ദേശീയ ഐക്യവും സാഹോദര്യവും പ്രോത്സാഹിപ്പിക്കുന്നതിനാണ് ഈ തീരുമാനം.
എല്ലാ പള്ളികളുടെയും ദർഗകളുടെയും മദ്രസകളുടെയും പ്രധാന കവാടങ്ങളിൽ തന്നെ ത്രിവർണ്ണ പതാക ഉയർത്താനാണ് വഖഫ് ബോർഡ് നിർദ്ദേശിച്ചിരിക്കുന്നത്. സ്വാതന്ത്ര്യദിനത്തിൽ ദേശീയ പതാക ആദരവോടെ ഉയർത്തണമെന്ന് ആവശ്യപ്പെട്ട് സംസ്ഥാനത്തെ എല്ലാ ഇസ്ലാം പണ്ഡിതർക്കും ബോർഡ് ചെയർമാൻ ഡോ. സലിം രാജ് കത്ത് എഴുതിയിട്ടുണ്ട്. രാജ്യത്തിന്റെ 78-ാമത് സ്വാതന്ത്ര്യദിനം കൂടുതൽ സവിശേഷമാക്കണമെന്നും കത്തിൽ പറയുന്നു.
“നമ്മുടെ രാജ്യം സൂഫി സന്യാസിമാരുടെ രാജ്യമാണ്, ഇവിടെ എല്ലാ മതങ്ങളിലെയും ആളുകൾ ഒരുമിച്ച് താമസിക്കുന്നു. ത്രിവർണ്ണ പതാക ഉയർത്തുന്നത് രാജ്യത്തോടുള്ള സ്നേഹവും കടമയും കാണിക്കുന്നു. ഈ തീരുമാനത്തെ എതിർക്കുന്നവർ രാജ്യദ്രോഹികളാണ് . അത്തരം ആളുകൾക്ക് രാജ്യത്ത് ജീവിക്കാൻ ഒരു അവകാശവും നൽകരുത്.“ – ഡോ. സലിം രാജ് പറഞ്ഞു.
