നെയ്യാറ്റിന്‍കര: നെടിയാംകോട് പാലം പണി പൂര്‍ത്തിയാകാത്തതിനാല്‍ വിദ്യാര്‍ത്ഥികള്‍ക്കും കൂലിപ്പണിചെയ്ത് കുടുംബം പോറ്റാന്‍ പാടുപെടുന്നവര്‍ക്കുമെല്ലാം ഇവിടെ ആശ്രയം കാല്‍നടയാത്ര തന്നെയാണ്. സെപ്തംബര്‍ മാസത്തോടെ നെടിയാംകോട് പാലത്തിന്റെ പണി പൂര്‍ത്തിയാക്കുമെന്ന് പ്രഖ്യാപനം വന്നെങ്കിലും ഇക്കൊല്ലം പണി തീരില്ലെന്നതാണ് അവസ്ഥ. ധനുവച്ചപുരം പാര്‍ക്ക് ജംഗ്ഷനും മണിവിളക്കും ഇടക്കുള്ളവരാണ് ഇതുകാരണം ഏറെ ബുദ്ധിമുട്ടുന്നത്.
ഈ ഭാഗത്ത് കെഎസ്ആര്‍ടിസി സര്‍വീസ് നടത്തുന്നില്ല. എന്നാല്‍ പണി നടക്കുന്ന പാലത്തിന്റെ ഒരുഭാഗത്തുകൂടി ഭാരം കയറ്റിയ ടിപ്പര്‍ ലോറികള്‍ യഥേഷ്ടം കടന്നുപോകുന്നുമുണ്ട്. ഈ വഴി ബസ് പോകില്ലെന്നാണ് അധികൃതരുടെ വിചിത്രവാദം. മണിവിള മുതല്‍ പാര്‍ക്ക് ജംഗ്ഷന്‍ വരെ രാവിലെയും വൈകുന്നേരങ്ങളിലും വിദ്യാര്‍ത്ഥികളുള്‍പ്പെടെയുള്ള നൂറുകണക്കിനുപേരാണ് കാല്‍നടയായി സഞ്ചരിക്കുന്നത്. ഓട്ടോ റിക്ഷകള്‍ ഈ അവസരം മുതലെടുക്കുകയാണെന്ന് നാട്ടുകാര്‍ ആരോപിക്കുന്നു.
നെടിയാംകോട് മുതല്‍ ധനുവച്ചപുരം വരെയെത്താന്‍ തോന്നുംപടിയാണ് ഇവര്‍ ഈടാക്കുന്നത്. രാവിലെ 8 മണിക്ക് ഒരു ബസ് നെടിയാംകോട് വരെ എത്തി നെയ്യാറ്റിന്‍കരക്ക് മടങ്ങും. ഈ ബസ് നിറഞ്ഞുകവിഞ്ഞാണ് യാത്ര തുടങ്ങുന്നത്. ഇത്തരത്തില്‍ മൂന്നോളം സര്‍വീസുകളാണ് നെടിയാംകോട് എത്തുന്നത്. ഇതിനിടയില്‍ ധനുവച്ചപുരത്ത് നിന്ന് നെയ്യാറ്റിന്‍കരയിലേക്ക് സര്‍വീസ് നടത്തിയിരുന്ന കെഎസ്ആര്‍ടിസി ഗ്രാമവണ്ടി നെടിയാംകോട് തുടങ്ങി പാര്‍ക്ക് ജംഗ്ഷന്‍, മഞ്ചവിളാകം വഴി കാരക്കോണത്തേക്ക് ആക്കുകയും ചെയ്തു. ബസ് നെയ്യാറ്റിന്‍കരയിലേക്ക് ആക്കണം എന്നതാണ് നാട്ടുകാരുടെ ആവശ്യം. രാത്രിയായാല്‍ പ്രദേശത്തെ യാത്ര ദുരിതമാണ്. ഒന്‍പതുമണിക്ക് നെയ്യാറ്റിന്‍കരയില്‍ നിന്നാരംഭിക്കുന്ന ബസാണ് അവസാന സര്‍വീസ്. ഇത് പാര്‍ക്ക് ജംഗ്ഷനില്‍ തിരിഞ്ഞ് മഞ്ചവിളാകത്തേക്ക് പോകും. മണിവിളയിലും നെടിയാംകോടും ധനുവച്ചപുരത്തും എത്തേണ്ടവര്‍ക്ക് രാത്രി കാല്‍നട തന്നെ ശരണം.
