തിരുവനന്തപുരം: സ്കൂളുകളില് ലാപ്ടോപ്പും കംപ്യൂട്ടര് അനുബന്ധ ഉപകരണങ്ങളും വാങ്ങിനല്കുന്ന പദ്ധതി ഉള്പ്പെടെ കോര്പ്പറേഷന് പണം ചെലവഴിച്ചത് നിയമങ്ങള് പാലിക്കാതെയെന്ന് ഓഡിറ്റ് റിപ്പോര്ട്ട്. റിപ്പോര്ട്ടിലെ കണ്ടെത്തലിനെത്തുടര്ന്ന് ലാപ്ടോപ് വാങ്ങിയതിലെ അഴിമതി പരിശോധിക്കാന് വിജിലന്സ് ഒരുമാസം മുന്പ് കോര്പ്പറേഷന് ഓഫീസില് മിന്നല്പരിശോധന നടത്തിയിരുന്നു.
2022-23, 2023-24 സാമ്പത്തിക വര്ഷങ്ങളില് വികസന ഫണ്ടില്നിന്ന് 1,35,52,560 രൂപ ചെലവഴിച്ച് നടപ്പാക്കിയ പദ്ധതിയിലാണ് വിജിലന്സ് പരിശോധന തുടരുന്നത്. പദ്ധതിക്കാവശ്യമായ സാധനങ്ങളുടെ സ്പെസിഫിക്കേഷന് തയ്യാറാക്കിയതിലും ടെന്ഡര് നടപടികളിലും അപാകതയുണ്ട്. സര്ക്കാര് സ്കൂളുകള്ക്ക് ഡെസ്ക് ടോപ്പ് കംപ്യൂട്ടറുകള്ക്കു പകരം ലാപ്ടോപ് വാങ്ങണമെന്ന സര്ക്കാര് നിര്ദേശം പാലിച്ചില്ല.
സ്വകാര്യസ്ഥാപനങ്ങളില്നിന്ന് 244 ഡെസ്ക് ടോപ്പുകളും 193 യുപിഎസും വാങ്ങിനല്കിയതുവഴി കോര്പ്പറേഷന് 20,12,827 രൂപ നഷ്ടം സംഭവിച്ചെന്നായിരുന്നു ഓഡിറ്റിലെ കണ്ടെത്തല്. ഇതിനുപുറമേ 14 സ്കൂളുകളില് ഡിജിറ്റല് ലൈബ്രറി തയ്യാറാക്കുന്നതിന് 1,72,63,400 രൂപ ചെലവഴിച്ചതും നിയമങ്ങള് പാലിച്ചല്ലെന്ന് ഓഡിറ്റ് കണ്ടെത്തിയിരുന്നു. ആറുവീതം ഡെസ്ക് ടോപ്പ് കംപ്യൂട്ടറുകള്, മേശകള്, കസേരകള്, ഒരു യുപിഎസ്, രണ്ട് ബാറ്ററികള്, സോഫ്റ്റ്വെയര് എന്നിവ ഉള്പ്പെടുന്ന യൂണിറ്റാണ് ഒരു സ്കൂളില് സ്ഥാപിച്ചിട്ടുള്ളത്.
സര്ക്കാര് വകുപ്പുകളും തദ്ദേശസ്വയംഭരണസ്ഥാപനങ്ങളും ഐടി ഉപകരണങ്ങള് വാങ്ങുന്നതിനു മാര്ഗനിര്ദേശങ്ങളും വിലയും സര്ക്കാര് നിശ്ചയിച്ചിട്ടുണ്ട്. എന്നാല് ഇതൊന്നും കോര്പ്പറേഷന് പാലിച്ചിട്ടില്ല. ഡിജിറ്റല് ലൈബ്രറിക്ക് നല്കിയ ഡിജിറ്റല് കണ്ടന്റിന് എസ്സിഇആര്ടിയുടെയും കൈറ്റിന്റെയും അംഗീകാരം ലഭിച്ചിട്ടില്ല. പദ്ധതിപ്രകാരം വാങ്ങിയ ഉപകരണങ്ങളുടെ സ്റ്റോക്ക് രജിസ്റ്ററും ഹാജരാക്കിയിട്ടില്ല. ആദായനികുതി കുറവുചെയ്യാത്തതിനാല് 2,92,600 രൂപ സര്ക്കാരിനു നഷ്ടമുണ്ടായെന്നും കണ്ടെത്തി. ഓരോന്നിന്റെയും വില പ്രത്യേകമായി രേഖപ്പെടുത്താത്തതിനാല് കംപ്യൂട്ടറുകളുടെ വില അറിയാനാവുന്നില്ലെന്നും ഓഡിറ്റില് പറയുന്നുണ്ട്.
സ്കൂള്കുട്ടികള്ക്ക് ദുരന്തനിവാരണ പരിശീലനം നല്കുന്നതിനുള്ള സുരക്ഷാ പദ്ധതി നടത്തിപ്പിന് 4,69,746 രൂപ ചെലവിട്ടതിലും വ്യക്തതയില്ല. 25 സ്കൂളുകളില് നടപ്പാക്കിയ പദ്ധതിയുടെ നടത്തിപ്പും തുടര്പ്രവര്ത്തന അവലോകനവും സംബന്ധിച്ചുള്ള രേഖകള് ആവശ്യപ്പെട്ടെങ്കിലും കോര്പ്പറേഷന് ഹാജരാക്കിയില്ല. ആദ്യം തിരഞ്ഞെടുത്ത കമ്പനി മാറിയതു സംബന്ധിച്ച രേഖകളില്ലെന്നും ഓഡിറ്റ് റിപ്പോര്ട്ടില് പറയുന്നു.
