റായ്പൂര്: ചത്തീസ്ഗഡില് അറസ്റ്റിലായ കന്യാസ്ത്രീകളുടെ ജാമ്യ ഹര്ജിയില് പ്രോസിക്യൂഷന് നിലപാട് കന്യാസ്ത്രീകള്ക്ക് എതിരല്ലെന്ന് റായ്പൂര് അതിരൂപത. ജാമ്യം ലഭിക്കുമെന്ന് പ്രതീക്ഷിക്കുന്നുവെന്നും റായ്പൂര് അതിരൂപത പ്രതികരിച്ചു.
ജാമ്യാപേക്ഷയെ എതിര്ത്തെങ്കിലും പ്രതിഭാഗം ഉന്നയിച്ച വാദങ്ങള്ക്കതിരായ നിലപാട് പ്രോസിക്യൂഷന് സ്വീകരിച്ചില്ല. ഇത് സ്വാഗതം ചെയ്യുന്നുവെന്നും റായ്പൂര് അതിരൂപത പറയുന്നു.
ശനിയാഴ്ച ജാമ്യപേക്ഷയില് വിധി പറയുമ്പോള് ഇത് അനുകൂലമായി വരുമെന്നാണ് അതിരൂപത കണക്കാക്കുന്നത്. പെണ്കുട്ടികളുടെ പ്രായം തെളിയിക്കുന്ന രേഖകള്, മാതാപിതാക്കളുടെ മൊഴി, മതപരിവര്ത്തന കുറ്റം നിലനില്ക്കില്ല തുടങ്ങിയ വാദങ്ങളാണ് പ്രതിഭാഗം കോടതിയില് ഉന്നയിച്ചത്. ഇതിലൊന്നും പ്രോസിക്യൂഷന് എതിര്പ്പ് രേഖപ്പെടുത്തിയില്ല. കന്യാസ്ത്രീകളെ കസ്റ്റഡിയില് ചോദ്യം ചെയ്യേണ്ട ആവശ്യമുണ്ടോയെന്ന് കോടതി ചോദിച്ചപ്പോള് ഇല്ലായെന്നും പ്രോസിക്യൂഷന് മറുപടി നല്കി.
കഴിഞ്ഞ എട്ട് ദിവസമായി സിസ്റ്റര് പ്രീതി മേരിയും സിസ്റ്റര് വന്ദനാ ഫ്രാന്സിസുമാണ് ഛത്തീസ്ഗഢിലെ ദുര്ഗ് സെന്ട്രല് ജയിലില് കഴിയുന്നത്.
അതേസമയം പ്രോസിക്യൂഷന് കന്യാസ്ത്രീകള്ക്ക് അനുകൂലമായ നിലപാട് സ്വീകരിച്ചിട്ടും കേരളത്തില് കോണ്ഗ്രസ്, സി പി എം നേതാക്കള് വസ്തുതകള് വളച്ചൊടിച്ച് ബി ജെ പിയെ കുറ്റപ്പെടുത്തുകയാണ്. കന്യാസ്ത്രീകള്ക്ക് അനുകൂല നിലപാട് സ്വീകരിക്കാമെന്ന് കേന്ദ്ര ആഭ്യന്തര മന്ത്രി അമിത് കേരളത്തില് നിന്നുളള എം പിമാര്ക്ക് നല്കിയ ഉറപ്പ് പാലിക്കപ്പെട്ടിട്ടില്ലെന്നാണ് വിമര്ശനം.
