കൊല്ലം: കേരള സര്‍വകലാശാലയുടെ ആറുമാസക്കാല കോഴ്‌സുകള്‍ അനിശ്ചിതമായി നീളുന്നു. അഡല്‍റ്റ് ആന്‍ഡ് കണ്ടിന്യൂയിങ് എഡ്യൂക്കേഷന്‍ ആന്‍ഡ് എക്‌സ്‌റ്റെന്‍ഷന് കീഴിലുള്ള കോഴ്‌സും പരീക്ഷകളുമാണ് നീളുന്നത്. സര്‍ട്ടിഫിക്കറ്റ് കോഴ്‌സ് ഇന്‍ ലൈബ്രറി ആന്‍ഡ് ഇന്‍ഫര്‍മേഷന്‍ സയന്‍സിന്റെ യൂണിവേഴ്‌സിറ്റി പരീക്ഷയാണെങ്കില്‍ കോഴ്‌സ് തുടങ്ങി 10 മാസമായിട്ടും നടന്നിട്ടില്ല.
കേരള സര്‍വകലാശാലയുടെ സര്‍ട്ടിഫിക്കറ്റ് കോഴ്‌സ് ഇന്‍ ലൈബ്രറി ആന്‍ഡ് ഇന്‍ഫര്‍മേഷന്‍ സയന്‍സിന്റെ യൂണിവേഴ്‌സിറ്റി പരീക്ഷ അകാരണമായി വൈകുകയാണെന്ന് പണമടച്ച് ഈ കോഴ്‌സ് പഠിക്കാന്‍ തുടങ്ങിയവര്‍ പരാതിപ്പെടുന്നു. കൃത്യമായും സമയബന്ധിതമായും സര്‍വകലാശാല പരീക്ഷ നടത്താത്തതുകാരണം ആയിരക്കണക്കിന് വിദ്യാര്‍ത്ഥികളാണ് വലയുന്നത്. കോഴ്‌സ് കാലാവധി 6 മാസമാണെങ്കിലും കൊല്ലത്തെ അടക്കം തെക്കന്‍ജില്ലകളിലെ പഠനസെന്ററുകളില്‍ അധ്യയനം ആരംഭിച്ചവര്‍ക്കൊന്നും 10 മാസം കഴിഞ്ഞിട്ടും കഴിഞ്ഞ ബാച്ചിന്റെ യൂണിവേഴ്‌സിറ്റി പരീക്ഷ നടന്നിട്ടില്ല. ഈ സെന്ററുകളില്‍ അടുത്ത ബാച്ചും ആരംഭിക്കാന്‍ അകാരണമായി വൈകുകയാണ്. ജൂണ്‍-ജൂലൈ മാസത്തില്‍ സാധാരണ തുടങ്ങേണ്ട കോഴ്‌സ് എല്ലാവര്‍ഷവും ഒക്ടോബറിലാണ് ആരംഭിക്കുന്നത്. ഇതും പരീക്ഷ വൈകുന്നതിന് കാരണമായി. സര്‍വകലാശാലയുടെ തിരുവനന്തപുരത്തെ വികാസ് ഭവനിലെ സെന്റര്‍ ഫോര്‍ അഡല്‍റ്റ് ആന്‍ഡ് കണ്ടിന്യൂയി ങ് എഡ്യൂക്കേഷന്‍ ആന്‍ഡ് എക്‌സ്‌റ്റെന്‍ഷനിലാണ് കോഴ്‌സിന്റെ ഓഫീസ്.
10,000 രൂപയാണ് കോഴ്‌സ് ഫീ. പുറമെ ഇന്റണ്‍ഷിപ്പ് പ്രോജക്ട് സമര്‍പ്പണത്തിന് റിപ്പോര്‍ട്ട് പുറത്ത് ഡിടിപി സെന്ററില്‍നിന്ന് ടൈപ്പ് ചെയ്ത് ബൈന്റ് ചെയ്ത് സമര്‍പ്പിക്കണം. ഇതിന് 1500 രൂപയാകും.
അതിന് ശേഷം പരീക്ഷാഫീസായി 1400 രൂപ ഈടാക്കും. കുട്ടികളെ വിളിച്ച് 6 മാസത്തിനകം പരീക്ഷ നടത്തി സര്‍ട്ടിഫിക്കറ്റ് തരാമെന്ന് പറഞ്ഞിട്ടാണ് കോഴ്‌സ് നടത്തിപ്പില്‍ ഇത്തരത്തില്‍ താളപ്പിഴ സംഭവിച്ചത്. കേരള സര്‍വകലാശാലയില്‍ ഇത്തരത്തിലെ പല കോഴ്‌സുകളും അവയുടെ പരീക്ഷകളും അനന്തമായി നീളുകയാണെന്ന് പരാതിയുണ്ട്. ഉപരി പഠനങ്ങള്‍ക്കോ മറ്റ് ജോലികള്‍ക്കോ പ്രമോഷനുകള്‍ക്കോ ഉള്ള സാധ്യതകളാണ് ഇതുകാരണം നഷ്ടമാകുന്നത്.
