മലപ്പുറം: ഇന്ത്യയിലെ എട്ട് സംസ്ഥാനങ്ങളെക്കാള്‍ ജനം മലപ്പുറം ജില്ലയില്‍ മാത്രം ഉണ്ടെന്നും ജില്ല വിഭജിക്കണമെന്നും തൃണമൂല്‍ കോണ്‍ഗ്രസ് നേതാവ് പി.വി അന്‍വര്‍.തിരുവനന്തപുരം, എറണാകുളം, കോഴിക്കോട് എല്ലാം സമാന പ്രശ്‌നങ്ങള്‍ ഉണ്ട്.ഏറ്റവും കൂടുതല്‍ ബാധിക്കുന്നത് മലബാറിനെയാണ് . മലപ്പുറം ,പാലക്കാട്, കോഴിക്കോട്, എറണാകുളം, തിരുവനന്തപുരം ജില്ലകള്‍ വിഭജിക്കണമെന്നും അന്‍വര്‍ ആവശ്യപ്പെട്ടു.
മലപ്പുറം ജില്ലയില്‍ ജനസംഖ്യ 51 ലക്ഷം കടന്നു.ഇവിടെയുള്ളത് ഒരു കളക്ടറാണ്. എട്ട് ലക്ഷം ജനസംഖ്യ ഉള്ള വയനാട് ഒരു കളക്ടര്‍. ആരോഗ്യ രംഗത്തും വലിയ പ്രതിസന്ധിയാണ്. കോഴിക്കോട് 38 ലക്ഷത്തോളം ജനം ഉണ്ട്. വിദ്യാഭ്യാസ മേഖലയെയും ഇത് വലിയ തോതില്‍ ബാധിക്കുന്നുവെന്നും അന്‍വര്‍ കുറ്റപ്പെടുത്തി.
മലബാറിനോടുള്ള അവഗണനക്ക് എതിരെ പ്രതിഷേധം നടത്തുമെന്നും പി.വി അന്‍വര്‍ പറഞ്ഞു. തൃണമൂലിന്റെ നേതൃത്വത്തില്‍ മലബാര്‍ വികസന മുന്നേറ്റ മുന്നണിയാണ് പ്രതിഷേധം നടത്തുക. 1984 ല്‍ കാസര്‍ഗോഡ് ഉണ്ടായ ശേഷം 40 വര്‍ഷത്തിന് ശേഷവും ഒരു ജില്ലാ രൂപീകരണം നടന്നിട്ടില്ലെന്നും ജനസംഖ്യ ആനുപാതികമായി ജില്ലാ വിഭജനം കേരളത്തില്‍ നടക്കുന്നില്ലെന്നും പി വി അന്‍വര്‍ കുറ്റപ്പെടുത്തി.
1981 ല്‍ 14 ജില്ല ഉണ്ടായിരുന്ന തമിഴ്‌നാട്ടില്‍ ഇപ്പോള്‍ 39 ജില്ല ആയി. ഹരിയാനയില്‍ 12 ജില്ല ഉണ്ടായിരുന്നത് 22 ആയി. ജില്ലാ വിഭജനം നടക്കാത്തത് കേരളത്തില്‍ വലിയ പ്രശ്‌നങ്ങള്‍ സൃഷ്ടിക്കുന്നു.ഇന്ത്യയിലെ മറ്റ് പല സംസ്ഥാനങ്ങളെക്കാള്‍ കൂടുതല്‍ ജനം കേരളത്തില്‍ ഉണ്ട്.
ചുരുങ്ങിയത് രണ്ടോ മൂന്നോ പുതിയ ജില്ലകള്‍ എങ്കിലും രൂപീകരിക്കണം. മലബാര്‍ കേന്ദ്രീകരിച്ച് കോഴിക്കോട് സെമി സെക്രട്ടറിയേറ്റ് വേണം. മറ്റ് പല സംസ്ഥാനങ്ങളിലും സെമി സെക്രട്ടറിയേറ്റ് ഉണ്ട്. കേരളത്തിലും ഇത് ആവശ്യമാണ്. മലബാറില്‍ ഉള്ളവര്‍ക്ക് തിരുവനന്തപുരത്ത് എത്തുക വലിയ പ്രയാസമാണ് ഉണ്ടാക്കുന്നത്. കേരളത്തിലെ താലൂക്കുകളുടെയും വില്ലേജുകളുടെയും എണ്ണം വര്‍ധിപ്പിക്കണം. എന്നാല്‍ ജനങ്ങള്‍ക്ക് കാര്യം എളുപ്പം ആകുമെന്നും പി വി അന്‍വര്‍ പറഞ്ഞു.
