ന്യൂദല്ഹി: ലക്ഷദ്വീപിലെ ബിത്ര ദ്വീപ് നാവിക കേന്ദ്രമാക്കുന്നതിനെതിരെ സേവ് ലക്ഷദ്വീപ് എന്ന പേരില് വീണ്ടും കോണ്ഗ്രസുള്പ്പെടെയുള്ള പാര്ട്ടികളും എംപിമാരും സമരത്തിനൊരുങ്ങുകയാണെങ്കിലും ഇന്ത്യന് നാവിക സേനയ്ക്ക് അവരുടെ നാവികാസ്ഥാനത്തിന് ഇതിനേക്കാള് അനുയോജ്യമായ മറ്റൊരു സ്ഥലമില്ല. വെറും അരകിലോമീറ്റര് നീളവം കാല് കിലോമീറ്റര് മാത്രം വീതിയും ഉള്ള ഈ ചെറിയ ദ്വീപ് പ്രധാന കപ്പല് പാതകളോട് ചേര്ന്ന് കിടക്കുന്ന ഒന്നാണ്. അതുകൊണ്ട് തന്നെ തന്ത്രപരമായ പ്രാധാന്യം ഏറെയാണ് എന്നത് ലക്ഷദ്വീപിലെ ബിത്ര ദ്വീപിന്റെ പ്രാധാന്യം കൂട്ടുന്നു.
ഇന്തോനേഷ്യയുടെ സുമാത്രാ ദ്വീപിനോട് ചേര്ന്ന് കിടക്കുന്ന മലാകാ കടലിടുക്ക്, ഇറാന് നിയന്ത്രണുള്ള ഹോര്മുസ് കടലിടുക്ക് എന്നിവയുമായി ചേര്ന്ന് കിടക്കുന്ന ദ്വീപാണിത്. അതിനാല് ചരക്ക് നീക്കം, നാവിക സുരക്ഷ എന്നീ കാര്യങ്ങളില് ഇന്ത്യയ്ക്ക് കൂടുതല് വ്യക്തതയോടെ നിരീക്ഷിക്കാന് ഇന്ത്യന് നാവികസേനയെ സംബന്ധിച്ചിടത്തോളം ബിത്ര അനുയോജ്യമാണ്. ഇന്ത്യയുടെ അയല്രാജ്യങ്ങളില് നിന്നുള്ള കടല് വഴിയുള്ള ഭീഷണികളെ കാലേക്കൂട്ടി തിരിച്ചറിയാനും ബിത്ര ദ്വീപില് നിന്നുള്ള നാവിക നിരീക്ഷണം സഹായിക്കും.
അറബിക്കടലിലെ അന്താരാഷ്ട്ര കപ്പല് പാതകളോട് ചേര്ന്ന് കിടക്കുന്നതിനാല് സാമുദ്രിക നിരീക്ഷണം, പ്രതിരോധ ശേഷി വര്ധിപ്പിക്കല്, മയക്കമരുന്ന് മാഫിയയ്ക്ക് എതിരെ തന്ത്രപരമായ നീക്കം നടത്തല് എന്നിവയ്ക്ക് ബിത്ര ദ്വീപ് അനുയോജ്യമായതിനാലാണ് കേന്ദ്രസര്ക്കാര് നേവല് ബേസ് സ്ഥാപിക്കാന് ഈ ദ്വീപ് തെരഞ്ഞെടുത്തിരിക്കുന്നത്.
ആന്ഡമാന് നിക്കോബാര് ദ്വീപസമൂഹത്തിലെന്നപോലെ ലക്ഷദ്വീപിലും ഒരു നാവിക ആസ്ഥാനം എന്നത് ഇന്ത്യയുടെ പ്രതിരോധ, സാമുദ്രിക കരുത്ത് വര്ധിപ്പിക്കും. മാത്രമല്ല, ലക്ഷദ്വീപിലെ മറ്റ് ദ്വീപുകളിലെ നേവല് ബേസുകള്ക്കൊപ്പം ബിത്ര ദ്വീപില് കൂടുതല് നേവല് ബേസ് വരുന്നത് ഇന്ത്യയുടെ പ്രതിരോധക്കരുത്തും ഈ പ്രദേശകങ്ങളിലെ സുരക്ഷയും വര്ധിപ്പിക്കും. ലക്ഷദ്വീപില് തന്നെ മിനിക്കോയ് ദ്വീപിലും കവരത്തിയിലും നേവല് ബേസുകള്ക്കൊപ്പം ബിത്ര കൂടി നേവല് ബേസാകുന്നതോടെ നാവികസേനയുടെ കരുത്ത് ഇരട്ടിയാകും.
അറബിക്കടലിലെ മയക്കമരുന്ന് കടത്തിന്റെ റൂട്ട്
അറബിക്കടല് വഴിയുള്ള മയക്കമരുന്ന് നടക്കുന്ന ഒരു പ്രധാനറൂട്ട് ബിത്രയ്ക്ക് മുന്നിലൂടെയാണ് കടന്നുപോകുന്നത്. ഇന്ത്യന് സുരക്ഷാസേനയുടെ ഏറ്റവും വലിയ തലവേദനയാണ് മയക്കമരുന്ന് ലോബി. അതിനാല് ഇന്ത്യയെ മയക്കമരുന്ന് കേന്ദ്രമാക്കാന് ശ്രമിക്കുന്ന മാഫിയകള്ക്കെതിരായ പോരാട്ടം ശക്തമാക്കാന് ബിത്രയിലെ നാവികസാന്നിധ്യം സഹായിക്കും.
പ്രതിരോധ സുരക്ഷ
ബിത്ര ദ്വീപിന്റെ തന്ത്രപരമായ സ്ഥാനം അറബിക്കടലില് ശത്രുക്കളെ നിരീക്ഷിക്കാന് കൂടുതല് കരുത്ത് പകരും. അതുവഴി ഇന്ത്യയുടെ സുരക്ഷ വര്ധിപ്പിക്കാനും സാധിക്കും.
സാമൂഹ്യ ആഘാത വിലയിരുത്തലിന്റെ (സോഷ്യല് ഇംപാക്ട് അസസ്മെന്റ്) ഭാഗമായി ജൂലായ് 11ന് ലക്ഷദ്വീപ് റവന്യൂ വകുപ്പ് ഉത്തരവ് പുറപ്പെടുവിച്ചു കഴിഞ്ഞു. ദേശീയ സുരക്ഷാപ്രാധാന്യം, തന്ത്രപരമായ ഭൂപ്രദേശം എന്നിവ കണക്കിലെടുത്താണ് ബിത്ര ദ്വീപിനെ നേവല് ബേസ് ആക്കിമാറ്റുന്നതെന്നും ഈഉ ഉത്തരവില് പറയുന്നു. ഇവിടെ 105 കുടുംബങ്ങള് ഉണ്ട്. ഇവരെ ഒഴിപ്പിക്കേണ്ടതായി വരും.
