ന്യൂദല്‍ഹി: പഹല്‍ഗാം ഭീകരാക്രമണത്തെ തുടര്‍ന്ന് പാകിസ്ഥാന്‍ വിമാനങ്ങള്‍ ഇന്ത്യന്‍ വ്യോമാതിര്‍ത്തിയില്‍ പ്രവേശിക്കുന്നതിന് ഏര്‍പ്പെടുത്തിയ വിലക്ക് ഇന്ത്യ വീണ്ടും നീട്ടി. നിലവില്‍ ജൂലായ് 23 വരെയായിരുന്നു വിലക്കിയിരുന്നത്. അതാണിപ്പോള്‍ നീട്ടിയത്. ദേശീയ സുരക്ഷാ പരിഗണനകള്‍ കണക്കിലെടുത്താണ് ഇതെന്ന് സിവില്‍ വ്യോമയാന സഹമന്ത്രി മുരളീധര്‍ മോഹോള്‍ പറഞ്ഞു.
സൈനിക വിമാനങ്ങള്‍ ഉള്‍പ്പെടെ പാകിസ്ഥാന്‍ വിമാനക്കമ്പനികളുടെ ഉടമസ്ഥതയിലുള്ളതോ പ്രവര്‍ത്തിപ്പിക്കുന്നതോ പാട്ടത്തിനെടുത്തതോ ആയ എല്ലാ വിമാനങ്ങള്‍ക്കും വിലക്ക് ബാധകമാണ്. ഏപ്രില്‍ 22 ന് ജമ്മു കശ്മീരിലെ പഹല്‍ഗാമില്‍ 26 പേര്‍ കൊല്ലപ്പെട്ട ഭീകരാക്രമണത്തിന് മറുപടിയായി ഇന്ത്യന്‍ സര്‍ക്കാര്‍ സ്വീകരിച്ച നിരവധി നടപടികളില്‍ ഒന്നായിരുന്നു വ്യോമപാത വിലക്ക് .
