ന്യൂദല്ഹി: ഡിആര്ഡിഒ വികസിപ്പിച്ച ഇന്ത്യയുടെ നിര്ഭയ് എന്ന ക്രൂസ് മിസൈലിന്റെ വീര്യം കൂടിയ പുതിയ പതിപ്പില് ഭീതി പ്രകടിപ്പിച്ച് തുര്ക്കിയിലെ മാധ്യമങ്ങള്. ഈ ക്രൂസ് മിസൈല് ഗ്രീസിന് കിട്ടിയാല് പല രീതികളില് തുര്ക്കിക്ക് പണിയാകുമെന്നാണ് ഈ ലേഖനങ്ങളില് പറഞ്ഞിരിക്കുന്നത്.
തുര്ക്കി വ്യോമപ്രതിരോധത്തിന് ആശ്രയിക്കുന്നത് റഷ്യയുടെ എസ് 400 തന്നെയാണ്. പക്ഷെ നിര്ഭയിന്റെ പുതിയ പതിപ്പിന് എസ് 400ന്റെ കണ്ണ് വെട്ടിക്കാനാവും. കാരണം ഇത് കരയില് നിന്നും മൊബൈല് ലോഞ്ചര് ഉപയോഗിച്ച് വിക്ഷേപിക്കാനാവും. അതുപോലെ കപ്പലില് നിന്നും തൊടുക്കാം. ഇത് എസ് 400 എന്ന വ്യോമപ്രതിരോധസംവിധാനത്തിന് പിടിക്കാന് ബുദ്ധിമുട്ടായിരിക്കും.
ഈ ലോംഗ് റേഞ്ച് മിസൈലിന്റെ ദൂരപരിധി 1000 മുതല് 1500 കിലോമീറ്ററോളം ഉള്ളതിനാല് തുര്ക്കിയിലെ ഏത് സൈനിക വിമാനത്താവളങ്ങളും തകര്ക്കാനാവും. തുര്ക്കിയുടെ റഡാര് സംവിധാനങ്ങള്, പ്രതിരോധ സംവിധാനങ്ങള്, മറ്റ് ഉയര്ന്ന മൂല്യങ്ങളുടെ ലക്ഷ്യകേന്ദ്രങ്ങള് എന്നിവ കൃത്യതയോടെ തകര്ക്കാന് ഈ നിര്ഭയ് മിസൈലിനാകും. ലോംഗ് റേഞ്ച്- ലാന്റ് അറ്റാക് ക്രൂയിസ് മിസൈലിന് (എല്ആര്- എല്എസിഎം) ആണവായുധവും വഹിക്കാനുള്ള ശേഷിയുണ്ട്. ഇത് ഈ ക്രൂയിസ് മിസൈലിന്റെ സംഹാരശേഷി വര്ധിപ്പിക്കുന്നു.
ഗ്രീസിലെ ആതന്സില് നടന്ന പ്രതിരോധ ആയുധങ്ങളുടെ പ്രദര്ശനമായ ഡിഇഎഫ് എ 2025ല് ഇന്ത്യ ഈ എല്ആര്-എല്എസിഎം പ്രദര്ശിപ്പിച്ചിരുന്നു. ഇന്ത്യയുടെ ഈ മിസൈല് തുര്ക്കിക്ക് തന്ത്രപരമായ ഭീഷണി തന്നെയാണെന്നും തുര്ക്കി മാധ്യമങ്ങള് എഴുതിയിട്ടുണ്ട്. ഈ പ്രദേശത്തെ സൈനികബലാബലം മാറ്റിമറിയ്ക്കാന് ശേഷിയുള്ളതാണ് ഇന്ത്യയുടെ ഈ മിസൈല് എന്നും ചില തുര്ക്കി മാധ്യമങ്ങള് അഭിപ്രായപ്പെട്ടിട്ടണ്ട്. ഇന്ത്യ ഈ മിസൈല് ഗ്രീസിന് വാഗ്ദാനം ചെയ്തിട്ടുണ്ടെന്ന് വരെ ടിആര് ഹാബര് എന്ന തുര്ക്കി മാധ്യമസ്ഥാപനം അഭിപ്രായപ്പെട്ടിട്ടുണ്ട്.
എന്തായാലും ഇന്ത്യയും ഗ്രീസും തമ്മില് വിവിധ സൈനികമേധാവികള് തമ്മിലുള്ള ആദ്യ റൗണ്ട് ചര്ച്ചകള് നടത്തിക്കഴിഞ്ഞു. വൈകാതെ ആയുധക്കരാര് ഒപ്പിടാന് സാധ്യതയുണ്ടെന്ന് അറിയുന്നു.
