കൊച്ചി : സൂംബ വിവാദത്തെ തുടര്‍ന്ന് അധ്യാപകന്‍ ടികെ അഷ്റഫിനെ സസ്പന്‍ഡ് ചെയ്ത നടപടി റദ്ദാക്കി ഹൈക്കോടതി. സൂംബ വിവാദത്തില്‍ ഫേസ്ബുക്കില്‍ പ്രതികരണം നടത്തിയതിന് പിന്നാലെ വിദ്യാഭ്യാസ വകുപ്പിന്റെ നിര്‍ദ്ദേശാനുസരണം മാനേജ്മെന്റ് തീരുമാനിച്ച അച്ചടക്ക നടപടിയാണ് കോടതി റദ്ദാക്കിയത്. നടപടി പുനഃപരിശോധിക്കണമെന്നും അധ്യാപകന്റെ മറുപടി കേള്‍ക്കണമെന്നും മാനേജ്മെന്റിന് കോടതി നിര്‍ദേശം നല്‍കി.
വിസ്ഡം സംസ്ഥാന സെക്രട്ടറി കൂടിയാണ് ടികെ അഷ്റഫ്. സ്‌കൂളുകളിലെ സൂംബ ഡാന്‍സിനെതിരെ സാമൂഹ്യ മാധ്യമത്തിലൂടെ ശക്തമായ ക്യാമ്പെയിനാണ് അഷ്റഫ് നടത്തിയത്. താനും കുടുംബവും സൂംബയില്‍ നിന്ന് വിട്ടുനില്‍ക്കുമെന്ന് പരസ്യമായി പ്രസ്താവിക്കുകയും ചെയ്തിരുന്നു.
ആണും പെണ്ണും കൂടിക്കലര്‍ന്ന് അല്പവസ്ത്രം ധരിച്ച് സംഗീതത്തിന്റെ താളത്തില്‍ തുള്ളുന്ന സംസ്‌കാരം പഠിക്കാനല്ല താന്‍ തന്റെ കുട്ടിയെ സ്‌കൂളില്‍ വിടുന്നത് എന്നും ടികെ അഷ്റഫ് പറഞ്ഞിരുന്നു. പോസ്റ്റുകള്‍ വ്യാപക ചര്‍ച്ചയായതിന് പിന്നാലെയാണ് അഷ്റഫിനെ സ്‌കൂള്‍ മാനേജ്മെന്റ് സസ്പെന്ഡ് ചെയ്തത്.
Show തനിക്ക് മാനേജ്മെന്റ് കാരണം കാണിക്കല്‍ നോട്ടീസ് നല്‍കിയെന്നും എന്നാല്‍ താന്‍ മറുപടി നല്‍കുന്നതിന് മുന്‍പ് തന്നെ സസ്പെന്ഡ് ചെയ്തുവെന്നുമായിരുന്നു കോടതിയില്‍ അഷ്റഫിന്റെ പ്രധാന വാദം. കാരണം കാണിക്കല്‍ നോട്ടീസിന് മൂന്ന് ദിവസത്തിനുള്ളില്‍ മറുപടി നല്‍കണമെന്നായിരുന്നു നിര്‍ദേശം. എന്നാല്‍ നോട്ടീസ് നല്‍കി പിറ്റേന്ന് തന്നെ സസ്പെന്ഷന് ഉത്തരവ് ഉണ്ടായെന്ന് അധ്യാപകന്‍ കോടതിയെ അറിയിച്ചു.
