കോട്ടയം: ജനരോഷം ഭയന്ന് ആരോഗ്യമന്ത്രി വീണ ജോര്ജ് മെഡിക്കല് കോളേജ് അപകടത്തില് മരിച്ച ബിന്ദുവിന്റെ വീട്ടിലെത്തിയത് സ്വകാര്യ വാഹനത്തില്. അതും ഇരുട്ടു വീണ ശേഷം. തലയോലപ്പറമ്പ് ആശുപത്രി കവലയ്ക്ക് സമീപമുള്ള ഒരു വീട്ടിലെത്തി സ്ഥിതിഗതികള് വിലയിരുത്തിയ ശേഷമാണ് മന്ത്രിയുടെ സന്ദര്ശന വിവരം പോലീസിനെ പോലും അറിയിച്ചത്. പോലീസുകാര് പാഞ്ഞെത്തും മുമ്പ് പാര്ട്ടിപ്രവര്ത്തകരുടെ അകമ്പടിയില് സുഹൃത്തിന്റെ കാറില് മന്ത്രി ബിന്ദുവിന്റെ വീട്ടിലെത്തി. മന്ത്രിയുടെ സന്ദര്ശനം വിവരം അയല്ക്കാര് പോലും അറിയാഞ്ഞതിനാല് വലിയ പ്രതിഷേധമുണ്ടായില്ല. മന്ത്രിയുടെ ഔദ്യോഗിക വാഹനം അല്പസമയം കഴിഞ്ഞാണ് എത്തിച്ചത്. അപ്പോഴാണ് നാട്ടുകാര് കാര്യമറിയുന്നത്. പൊലീസും പിന്നാലെ എത്തി. ബിജെപി, കോണ്ഗ്രസ് പ്രവര്ത്തകര് പ്രതിഷേധം സംഘടിപ്പിക്കാനുള്ള നീക്കം മുന്കൂട്ടി അറിഞ്ഞാണ് മന്ത്രി രഹസ്യ സന്ദര്ശനം നടത്തിയത്. പ്രവര്ത്തകര് വിവരമറിഞ്ഞ് എത്തിയപ്പോഴേക്കും മന്ത്രി മടങ്ങിയിരുന്നു.
പകല്വെളിച്ചത്തില് വീണ ജോര്ജ്ജിന് ബിന്ദുവിന്റെ വീട്ടില് പോകാന് ആകില്ലെന്നും ഇതേക്കുറിച്ച് മുന് പ്രതിപക്ഷ നേതാവ് രമേശ് ചെന്നിത്തല പരിഹസിച്ചു.
