ഇസ്ലാമബാദ് : ഭീകരവാദികളായ മസൂദ് അസറിനെയും ഹഫീസ് സയിദിനെയും വിട്ടുതരാന്‍ തയ്യാറാണെന്ന ബിലാവല്‍ ഭൂട്ടോയുടെ പ്രസ്താവന മറ്റൊരു ചതിയാണെന്ന് വിലയിരുത്തല്‍. പാകിസ്ഥാന് സൈന്യത്തിന്റെ നിര്‍ദേശപ്രകാരമാണ് ബിലാവല്‍ ഭൂട്ടോ ഇത്തരം പ്രസ്താവന നടത്തുന്നതെന്നും നാളെ പിന്‍വലിക്കാന്‍ വേണ്ടി മാത്രമുള്ള ഒരു പ്രസ്താവന മാത്രമാണിതെന്നും റിട്ട. മേജന്‍ ഗൗരവ് ആര്യയെപ്പോലുള്ളവര്‍ പറയുന്നു.
“ഇത്തരം പ്രസ്താവനകള്‍ നടത്താന്‍ ബിലാവല്‍ ഭൂട്ടോയ്‌ക്ക് യാതൊരു നിയമപരമായ അവകാശവുമില്ല. അദ്ദേഹം പാക് സൈന്യത്തിന്റെ മന്ത്രിസഭയില്‍ പോലും അംഗമല്ല. അദ്ദേഹം പാകിസ്ഥാനിലെ പ്രസിഡന്‍റായ അലി സര്‍ദാര്‍ ഭൂട്ടോയുടെ മകനാണ് എന്നത് മാത്രമേയുള്ളൂ. പക്ഷെ നാളെ പിന്‍വലിക്കാന്‍ വേണ്ടി മാത്രമാണ് ഇന്ന് ബിലാവല്‍ ഭൂട്ടോയുടെ പേരില്‍ ഇത്തരമൊരു പ്രസ്താവന നടത്തിക്കുന്നത്. പാകിസ്ഥാന് സൈന്യമാണ് ഇതിന് പിന്നില്‍”- റിട്ട. മേജര്‍ ഗൗരവ് ആര്യ പറയുന്നു.
വാസ്തവത്തില്‍ സിന്ധുനദീജലം ലഭിക്കാതെ സിന്ധ് പ്രവിശ്യയില്‍ ഉള്‍പ്പെടെ കര്‍ഷകര്‍ കലാപം കൂട്ടുന്ന സ്ഥിതിവിശേഷമുണ്ട്. കാരണം പാകിസ്ഥാനിലെ കര്‍ഷകര്‍ ആവശ്യമായ 90 ശതമാനം ജലവും വരുന്നത് ഇന്ത്യയില്‍ നിന്നൊഴുകുന്ന സിന്ധൂനദീജലമാണ്. അത് ലഭിക്കാതെ വന്നാല്‍ അവിടുത്തെ കൃഷി നശിക്കും. ഈ സാഹചര്യത്തിലാണ് ആദ്യമൊക്കെ സിന്ധൂനദീജലം നല്‍കിയില്ലെങ്കില്‍ ആ നദിയില്‍ ഇന്ത്യക്കാരുടെ രക്തമൊഴുക്കും എന്ന് വെല്ലുവിളിച്ച ബിലാവല്‍ ഭൂട്ടോ പൊടുന്നനെ സമവായത്തിന്റെ ഭാഷ സംസാരിക്കുന്നതില്‍ സംശയം ഉയരുന്നുണ്ട്.
എന്തായാലും പാക് അധീനകശ്മീര്‍ ഇന്ത്യയ്‌ക്ക് വിട്ടുതരികയും ഇന്ത്യ ആവശ്യപ്പെടുന്ന പാക് ഭീകരരെ വിട്ടുതരികയും ചെയ്താല്‍ മാത്രമാണ് സിന്ധൂനദീജലക്കരാര്‍ സംബന്ധിച്ച ചര്‍ച്ച തന്നെ നടക്കൂ എന്ന നിലപാടാണ് കേന്ദ്ര ആഭ്യന്തരമന്ത്രി അമിത് ഷാ പ്രഖ്യാപിച്ചിട്ടുള്ളത്. ഇതേ അഭിപ്രായം തന്നെയാണ് പ്രധാനമന്ത്രി മോദിയും ആവര്‍ത്തിച്ചത്. ഉയരത്തില്‍ കിടക്കുന്ന ഇന്ത്യന്‍ ഭൂപ്രദേശത്ത് നിന്നൊഴുകുന്ന സിന്ധൂനദിയില്‍ നിന്നും ജലം പാകിസ്ഥാന് ലഭിക്കണമെങ്കില്‍ ഇന്ത്യ വിചാരിക്കണം. ഇനി ഈ നദിയിലെ ജലം ഇന്ത്യയുടെ ആവശ്യങ്ങള്‍ക്ക് മാത്രമേ ഉപയോഗിക്കൂ എന്ന് മോദി പറയുന്നു.
ഭീകരവാദം നിര്‍ത്തണമെന്ന ഇന്ത്യയുടെ ആവശ്യം പാകിസ്ഥാന് അംഗീകരിച്ചിട്ടില്ല. ഓപ്പറേഷന്‍ സിന്ദൂറില്‍ ഇന്ത്യ തകര്‍ത്ത ഭീകരപരിശീലനകേന്ദ്രങ്ങള്‍ വീണ്ടും തുറന്നിരിക്കുകയാണ് പാകിസ്ഥാന്. ഐഎംഎഫ് പോലുള്ള അന്താരാഷ്‌ട്ര ധനസ്ഥാപനങ്ങള്‍ നല്‍കിയ വന്‍ധനസഹായതുകകള്‍ ആയുധങ്ങള്‍ വാങ്ങാനാണ് പാകിസ്ഥാന് ഉപയോഗിക്കുന്നത് എന്നതിനര്‍ത്ഥം ഇന്ത്യയുമായി ഇനിയും യുദ്ധത്തിന് തന്നെയാണ് പാകിസ്ഥാന് ഒരുങ്ങുന്നത് എന്നാണ് വിലയിരുത്തപ്പെടുന്നത്.
“ബിലാവല്‍ ഭൂട്ടോയെക്കൊണ്ട് പാകിസ്ഥാന് സൈന്യം വെറുതെ സമാധാനത്തിന്റെ ഒരു ഒലീവ് ചില്ല നീട്ടുകയാണ് ചെയ്യുന്നത്. അതാണ് മസൂദ് അസറിനെ വിട്ടുതരാമെന്ന പ്രസ്താവനയ്‌ക്ക് പിന്നില്‍. പക്ഷെ ബിലാവല്‍ ഭൂട്ടോയുടെ പ്രസ്താവന പാകിസ്ഥാന് പിന്‍വലിക്കുന്നു. കാരണം ഇത്തരം കാര്യങ്ങള്‍ സംസാരിക്കാന്‍ ബിലാവല്‍ ഭൂട്ടോയ്‌ക്ക് യാതൊരു അവകാശവുമില്ല എന്ന് നാളെ പാക് സൈന്യം പറയുമെന്ന് ഉറപ്പാണ്.” – റിട്ട. മേജര്‍ ഗൗരവ് ആര്യ പറയുന്നു.
