തിരുവനന്തപുരം:തകരാറിനെ തുടര്‍ന്ന് അന്താരാഷ്‌ട്ര വിമാനത്താവളത്തില്‍ 20 ദിവസമായി തുടരുന്ന അമേരിക്കന്‍ നിര്‍മ്മിത ബ്രിട്ടീഷ് യുദ്ധവിമാനം തിരികെ കൊണ്ടുപോകാന്‍ ബ്രിട്ടനില്‍ നിന്നുള്ള കൂറ്റന്‍ ചരക്ക് വിമാനം എയര്‍ബസ് അറ്റ്‌ലസ് എത്തി.ബ്രിട്ടീഷ് വ്യോമസേനയിലെ പതിനേഴ് സാങ്കേതിക വിദഗ്ധര്‍ ഇവിടെ എത്തിയിട്ടുണ്ട്. സാങ്കേതിക പ്രശ്നം പരിഹരിക്കാനായില്ലെങ്കില്‍ വിമാനം ഘടകങ്ങളാക്കി അഴിച്ച് മാറ്റി ചരക്ക് വിമാനത്തില്‍ കൊണ്ടുപോകും.
ചാക്കയിലെ എയര്‍ ഇന്ത്യ ഹാംഗറില്‍ വിമാനമെത്തിച്ച് തകരാര്‍ പരിഹരിക്കാനുള്ള ശ്രമം നടത്തുമെന്നാണ് വിവരം.ഇതിന് കഴിഞ്ഞില്ലെങ്കില്‍ ചിറകുകളടക്കം അഴിച്ചു മാറ്റി ചരക്ക് വിമാനത്തില്‍ തിരികെ കൊണ്ടുപോകും.
ലോകത്തിലെ ഏറ്റവും വിലയേറിയതും അത്യാധുനികവുമായ പോര്‍ വിമാനമാണ് എ35.കേരളതീരത്ത് നിന്ന് 100 നോട്ടിക്കല്‍ മൈല്‍ അകലെ വിമാനവാഹിനി കപ്പലില്‍ നിന്ന് പറന്നുയര്‍ന്ന യുദ്ധവിമാനം പരിശീലന പറക്കലിനിടെ തകരാര്‍ കണ്ടതിനെ തുടര്‍ന്ന് അടിയന്തരമായി തിരുവനന്തപുരം വിമാനത്താവളത്തിലിറക്കുകയായിരുന്നു.
ഇന്ത്യന്‍ പ്രതിരോധ വകുപ്പിന്റെ അനുമതിയോടെയാണ് തിരുവനന്തപുരം അന്താരാഷ്‌ട്ര വിമാനത്താവളത്തില്‍ അടിയന്തരമായി ഇറക്കിയത്. വിമാനത്തിന്റെ തകരാര്‍ പരിഹരിച്ചു തിരികെ കൊണ്ടു പോകാന്‍ ബ്രിട്ടീഷ് കപ്പലില്‍ നിന്ന് സൈനിക ഹെലികോപ്റ്ററും സാങ്കേതിക സംഘവും എത്തിയെങ്കിലും ഫലമുണ്ടായിരുന്നില്ല.
