മുംബൈ: ജപ്പാനിലെ സുമിടോമോ മിത് സൂയി ഇന്ത്യയിലെ യെസ് ബാങ്കിന്റെ 20 ശതമാനം ഓഹരി വാങ്ങാന്‍ ഒരുങ്ങുന്നു. ഇതിനായി വ്യാപാരനിയന്ത്രണ ഏജന്‍സിയായ സിസിഐയോട് (കോംപറ്റീഷന്‍ കമ്മീഷന്‍ ഓഫ് ഇന്ത്യ) അനുമതി തേടിയിരിക്കുകയാണ് ജപ്പാനിലെ ബാങ്ക്.
സുമിടോമോ മിത്സൂയി ഫിനാന്‍ഷ്യല്‍ കോര്‍പറേഷന്റെ നിയന്ത്രണത്തിലുള്ള ബഹുരാഷ്‌ട്ര ബാങ്കാണ് സുമിടോമോ മിത് സൂയി ബാങ്ക്. ഇതിനെ എസ് എംബിസി ഗ്രൂപ്പ് എന്നും വിളിക്കും. ജപ്പാനിലെ ടോക്യോയിലെ ചിയോഡയിലാണ് എസ്എംബിസിയുടെ ആസ്ഥാനം. ജപ്പാനിലെ രണ്ടാമത്തെ ഏറ്റവും വലിയ ബാങ്കിംഗ് ഗ്രൂപ്പായ എസ് എംബിസിയ്‌ക്ക് 2024 ഡിസംബറിലെ കണക്ക് പ്രകാരം 2 ലക്ഷം കോടി ഡോളര്‍ ആസ്തിയുണ്ട്.
യെസ് ബാങ്ക് സാമ്പത്തിക പ്രതിസന്ധിയില്‍ അകപ്പെട്ടപ്പോള്‍ സ്റ്റേറ്റ് ബാങ്ക് ഓഫ് ഇന്ത്യയും മറ്റ് ഏഴ് ബാങ്കുകളും 20 ശതമാനത്തോളം ഓഹരികള്‍ വാങ്ങിയിരുന്നു. ഈ ഓഹരികള്‍ എല്ലാം കൂടി 13,483 കോടി രൂപയ്‌ക്ക് വില്‍ക്കാന്‍ ഒരുക്കമാണെന്ന് സ്റ്റേറ്റ് ബാങ്കുള്‍പ്പെടെ റിസര്‍വ്വ് ബാങ്കിനെ അറിയിച്ചിരുന്നു. ഈ ഡീല്‍ നടന്നാല്‍ ഇന്ത്യയുടെ ബാങ്കിംഗ് രംഗത്തേക്ക് അതിര്‍ത്തിക്കപ്പുറത്തുനിന്നും എത്തുന്ന ഏറ്റവും വലിയ നിക്ഷേപമായി അത് മാറും.
യെസ് ബാങ്കിന്റെ ഓഹരി വാങ്ങുന്നതോടൊപ്പം ബാങ്കിന്റെ ഡയറക്ടര്‍ ബോര്‍ഡില്‍ വോട്ടിംഗ് അവകാശവും എസ് എംബിസിയ്‌ക്ക് ലഭിക്കും. ഇന്ത്യയില്‍ ഇപ്പോഴേ എസ് എംബിസി പ്രവ‍ര്‍ത്തിക്കുന്നുണ്ട്. ഇന്ത്യയിലെ ഏറ്റവും വലിയ വിദേശബാങ്കാണ് എസ് എംബിസി.
സുമിടോമോ മിത് സൂയി ഫിനാന്‍ഷ്യല്‍ ഗ്രൂപ്പിന്റെ സബ്സിഡിയറിയായ എസ് എം എഫ് ജി ഇന്ത്യാ ക്രെഡിറ്റ് കമ്പനി ഇന്ത്യയിലെ വൈവിധ്യവല്‍ക്കരിക്കപ്പെട്ട ഏറ്റവും വലിയ ബാങ്കിംഗ് ഇതര ധനകാര്യസ്ഥാപനമാണ്. യെസ് ബാങ്കിന്റെ ഓഹരികള്‍ വാങ്ങാനുള്ള അപേക്ഷ കോംപറ്റീഷന്‍ കമ്മീഷന്‍ ഓഫ് ഇന്ത്യ തള്ളിക്കളയാന്‍ സാധ്യതയില്ല. കാരണം ഈ ഏറ്റെടുക്കലില്‍ മത്സരക്ഷമത എന്ന കാര്യം ഉടലെടുക്കുന്നില്ല. കൂടുതല്‍ വിശദാംശങ്ങള്‍ നല്‍കുന്നതിന്റെ ഭാഗമായ എസ് എംഎഫ് ജി ഗ്രൂപ്പ് ഏര്‍പ്പെട്ടിരിക്കുന്ന വിവിധ ധനഇടപാടുകളെക്കുറിച്ചും വിശദീകരിച്ചിട്ടുണ്ട്. ഇതില്‍ വായ്‌പനല്‍കല്‍, ഡിജിറ്റല്‍ പേമെന്‍റ്, നിക്ഷേപം സ്വീകരിക്കല്‍, വിദേശനാണ്യ സേവനം, സെക്യൂരിറ്റികള്‍ക്കെതിരായി വായ്‌പ നല്‍കല്‍, ക്യാഷ് മാനേജ് മെന്‍റ് എന്നിവ ഉള്‍പ്പെടുന്നു.
ഈ ഇടപാട് പൂര്‍ത്തിയായിക്കഴിഞ്ഞാല്‍ സുമിടോമൊ മിത് സൂയി ബാങ്കിംഗ് കോര്‍പറേഷന്‍ മുംബൈ ആസ്ഥാനമായ യെസ് ബാങ്കിന്റെ ഏറ്റവും വലിയ ഒറ്റയ്‌ക്കുള്ള നിക്ഷേപകര്‍ ആയി മാറും. സ്റ്റേറ്റ് ബാങ്ക് ഓഫ് ഇന്ത്യയുടെ കൈവശം 13.81 ശതമാനം ഓഹരികള്‍ ആണുള്ളത്. ഇതിന് 8889 കോടി രൂപയാണ് നല്‍കുക. ബാക്കി 6.81 ശതമാനം ആക്സിസ് ബാങ്ക്, ബന്ധന്‍ ബാങ്ക്, ഫെഡറല്‍ ബാങ്ക്, എച്ച് ഡി എഫ് സി ബാങ്ക്, ഐസിഐസിഐ ബാങ്ക്, ഐഡിഎഫ് സി ഫസ്റ്റ് ബാങ്ക്, കൊടക് മഹീന്ദ്ര ബാങ്ക് എന്നിവയുടെ കൈവശമാണുള്ളത്. ഈ 6.81 ശതമാനം ഓഹരികള്‍ക്ക് 4,594 കോടി രൂപയും നല്‍കും. 2024-25 സാമ്പത്തിക വര്‍ഷത്തില്‍ 2406 കോടി രൂപയാണ് യെസ് ബാങ്കിന്റെ ലാഭം.
