ടെഹ്റാൻ : യുഎസ് വ്യോമാക്രമണത്തിന് ശേഷം ഇസ്ഫഹാൻ, ഫോർഡോ, നതാൻസ് എന്നിവിടങ്ങളിലെ ആണവ കേന്ദ്രങ്ങളിൽ വികിരണ ചോർച്ചയുടെ ലക്ഷണങ്ങളൊന്നും കണ്ടെത്തിയിട്ടില്ലെന്ന് ഇറാൻ. ഇറാന്റെ ദേശീയ ആണവ സുരക്ഷാ കേന്ദ്രമാണ് ഇക്കാര്യം ഔദ്യോഗികമായി അറിയിച്ചത്.
ആക്രമണങ്ങൾക്ക് ശേഷം റേഡിയേഷൻ കണ്ടെത്തൽ ഉപകരണങ്ങൾ ഒരു റേഡിയോ ആക്ടീവ് വികിരണങ്ങളെയും കണ്ടെത്തിയിട്ടില്ലെന്ന് ഇറാന്റെ ദേശീയ ആണവ സുരക്ഷാ കേന്ദ്രത്തിന്റെ പ്രസ്താവനയെ ഉദ്ധരിച്ച് ഇറാന്റെ സ്റ്റേറ്റ് മീഡിയ റിപ്പോർട്ട് ചെയ്തു. ഇതോടൊപ്പം ഈ സ്ഥലങ്ങൾക്ക് ചുറ്റും താമസിക്കുന്ന ആളുകൾക്ക് ഒരു അപകടവുമില്ലെന്നും പ്രസ്താവനയിൽ പറയുന്നു.
നേരത്തെ ആണവ കേന്ദ്രങ്ങൾക്ക് നേരെ ഇസ്രായേൽ നടത്തിയ ആക്രമണത്തിന് ശേഷം ആണവ കേന്ദ്രങ്ങൾക്ക് ചുറ്റും റേഡിയോ ആക്ടീവ് വികിരണം സംബന്ധിച്ച കേസൊന്നും റിപ്പോർട്ട് ചെയ്തിട്ടില്ലെന്ന് അന്താരാഷ്‌ട്ര ആണവോർജ്ജ ഏജൻസി പറഞ്ഞിരുന്നു.
