കണ്ണൂര്‍: മണിക്കൂറുകളോളം നഗരത്തെ വിറപ്പിച്ച തെരുവുനായയെ ചത്ത നിലയില്‍ കണ്ടെത്തി. താവക്കര പുതിയ ബസ് സ്റ്റാന്‍ഡ് പരിസരത്തുണ്ടായ തെരുവുനായ ആക്രമണത്തില്‍ 56 പേര്‍ക്ക് ആണ് കടിയേറ്റത്. പരിക്കേറ്റവര്‍ ആശുപത്രികളില്‍ ചികിത്സതേടി.
ഗുരുതര പരിക്കേറ്റ നാല് പേര്‍ പരിയാരം മെഡിക്കല്‍ കോളജ് ആശുപത്രിയില്‍ ചികിത്സയിലാണ്. രാവിലെത്തെ ആക്രമണത്തിന് പിന്നാലെ വൈകുന്നേരം സ്റ്റേറ്റ് ബാങ്ക് പരിസരത്തുവെച്ചും തെരുവുനായ ആക്രമണമുണ്ടായി. നടന്നുപോയവര്‍, ബസ് കാത്തു നിന്നവര്‍ തുടങ്ങി കണ്ണില്‍ കണ്ടവരെയൊക്കെ നായ കടിച്ചു.വൈകുന്നേരം നടത്തിയ തെരച്ചിലിലാണ് നായയെ ചത്തനിലയില്‍ കണ്ടെത്തിയത്.
നായ മറ്റ് മൃഗങ്ങളെ ആക്രമിച്ചിട്ടുണ്ടോയെന്നും സംശയമുണ്ട്. പ്രദേശത്ത് തെരുവുനായ ശല്യം രൂക്ഷമാണെന്നും അധികൃതര്‍ യാതൊരു നടപടിയും സ്വീകരിക്കുന്നില്ലെന്നും പ്രദേശവാസികള്‍ കുറ്റപ്പെടുത്തി.
