മലപ്പുറം: മലപ്പുറം കാളികാവ് അടക്കാക്കുണ്ടില് യുവാവിനെ കടിച്ചു കൊന്ന നരഭോജി കടുവ കരുവാരക്കുണ്ടില് തന്നെ ഉണ്ടെന്ന് സ്ഥിരീകരിച്ചു. കരുവാരകുണ്ട് സുല്ത്താന എസ്റ്റേറ്റ് ഭാഗത്ത് സ്ഥാപിച്ചിട്ടുള്ള ക്യാമറയില് കടുവയുടെ ദൃശ്യങ്ങള് പതിഞ്ഞു കടുവയെ പിടികൂടുന്നതിനായി വനംവകുപ്പ് പ്രദേശത്ത് ഒരു കൂട് കൂടി സ്ഥാപിച്ചു.
കഴിഞ്ഞ മാസം 15 ന് ആണ് കാളികാവില് ടാപ്പിംഗ് തൊഴിലാളി ഗഫൂര് അലിയെ (44) കടുവ കൊന്നത്. സുഹൃത്തായ അബ്ദുല് സമദ് കണ്ടുനില്ക്കേയാണ് കടുവ ഗഫൂറിനു മേല് ചാടിവീണ് കഴുത്തിനു പിന്നില് കടിച്ച് വലിച്ചിഴച്ചു കൊണ്ടുപോയത്. ഇതോടെ കടുവയെ പിടികൂടാന് പ്രദേശത്ത് 20 അംഗങ്ങള് വീതമുള്ള മൂന്ന് ആര്ആര്ട്ടി സംഘങ്ങളായി തെരച്ചില് തുടരുകയും കടുവയെ പിടികൂടാന് കൂട് സ്ഥാപിക്കുകയും ചെയ്തു. എന്നാല് കടുവ കെണിയിലായില്ല.
അതിനിടെ കടുവയെ പിടികൂടുന്നതിനായി സ്ഥാപിച്ച കൂട്ടില് പുലി കുടുങ്ങി. കേരള എസ്റ്റേറ്റ് സി വണ് ഡിവിഷനില് സ്ഥാപിച്ച കൂട്ടിലാണ് മേയ് 30 ന് പുലി കുടുങ്ങിയത്.
