തിരുവനന്തപുരം: കിളിമാനൂർ വെള്ളല്ലൂർ ഗവ എൽ.പി സ്കൂളിലെ മിനി ബസ് വയലിലേക്ക് മറിഞ്ഞു. ഇന്ന് രാവിലെ ഒമ്പതരയോടെയാണ് അപകടം. കുട്ടികളുമായി സ്കൂളിലേക്ക് വരുമ്പോഴായിരുന്നു അപകടം. ഇരുപതോളം കുട്ടികൾ ബസ്സിൽ ഉണ്ടായിരുന്നു. രണ്ട് കുട്ടികൾക്ക് പരിക്കേറ്റു. ഒരു കുട്ടിയുടെ കൈ ബസിനടിയിൽ കുടുങ്ങുകയായിരുന്നു. മറ്റ് കുട്ടികൾക്ക് നിസ്സാര പരിക്കേറ്റു.
പരിക്കേറ്റ കുട്ടികളെ കേശവപുരം സി എച്ച് സി ആശുപത്രിയിൽ പ്രവേശിപ്പിച്ചു. കേശവപുരം ആശുപത്രിക്ക് സമീപം വയൽവാരം റോഡിലാണ് അപകടം ഉണ്ടായത്. കുട്ടികൾ ഭയന്ന് നിലവിളിച്ചതോടെ നാട്ടുകാർ എത്തിയാണ് കുട്ടികളെ രക്ഷപ്പെടുത്തിയത്.
റോഡിന് വീതികുറഞ്ഞ ഭാഗമാണെന്നും നനവുണ്ടായിരുന്നുവെന്നും നഗരൂർ പഞ്ചായത്തംഗം എം രഘു പറഞ്ഞു. മഴ കാരണം റോഡിലെ ചെളിയിൽ വാഹനം തെന്നി നീങ്ങിയതാണ് അപകടകാരണമെന്നും റോഡിലെ പ്രശ്നം പരിഹരിക്കുമെന്നും രഘു വ്യക്തമാക്കി.
