തിരുവനന്തപുരം: സി പി എം സംസ്ഥാന സമിതി അംഗം എ പ്രദീപ് കുമാര്‍ മുഖ്യമന്ത്രിയുടെ പുതിയ പ്രൈവറ്റ് സെക്രട്ടറി. കോഴിക്കോട് നോര്‍ത്ത് മുന്‍ എം എല്‍ എയാണ്.
നിയമന ഉത്തരവ് ഉടന്‍ പുറത്തിറങ്ങും. കെ കെ രാഗേഷ് സിപിഎം കണ്ണൂര്‍ ജില്ലാ സെക്രട്ടറിയായതിനെ തുടര്‍ന്നാണ് എ പ്രദീപ് കുമാറിനെ ഈ പദവിയില്‍ നിയമിച്ചത്. കഴിഞ്ഞ ദിവസം ചേര്‍ന്ന സിപിഎം സംസ്ഥാന സെക്രട്ടേറിയറ്റ് യോഗത്തിലാണ് തീരുമാനം.
വിവരം മുഖ്യമന്ത്രി തന്നെ അറിയിച്ചെന്ന് പ്രദീപ് കുമാര്‍ പറഞ്ഞു.പാര്‍ട്ടി വലിയ ഉത്തരവാദിത്വമാണ് ഏല്‍പ്പിച്ചിരിക്കുന്നതെന്നും സ്ഥാന ലബ്ധി അല്ലെന്നും ചുമതലയാണെന്നും അദ്ദേഹം പറഞ്ഞു. മികച്ച രീതിയില്‍ ചുമതല നിര്‍വഹിക്കാനുള്ള ശ്രമം നടത്തുമെന്നും അദ്ദേഹം വ്യക്തമാക്കി.
ഈ മാസം 21 ന് ചുമതല ഏല്‍ക്കും.
