ന്യൂദല്ഹി: ലോകമെമ്പാടും നഴ്സുമാര് പ്രതിസന്ധി ഘട്ടത്തിലേക്ക് നീങ്ങുകയാണെന്ന് ഇന്റര്നാഷണല് കൗണ്സില് ഓഫ് നഴ്സസ് (ഐസിഎന്) പ്രസിഡന്റ് പമേല സിപ്രിയാനോ പറയുന്നു. മെയ് 12 ന് ലോകം അന്താരാഷ്ട്ര നഴ്സസ് ദിനം ആഘോഷിക്കുമ്പോള്, ആഗോള നഴ്സിംഗ് തൊഴില് മേഖല നേരിടുന്ന ‘അഭൂതപൂര്വമായ പ്രതിസന്ധി’യെക്കുറിച്ച് മുന്നറിയിപ്പ് നല്കുകയായിരുന്നു അവര്. ‘നമ്മുടെ നഴ്സുമാര്. നമ്മുടെ ഭാവി. നഴ്സുമാരെ പരിപാലിക്കുന്നത് ആരോഗ്യ സംവിധാനങ്ങളെയും സമ്പദ്വ്യവസ്ഥയെയും ശക്തിപ്പെടുത്തുന്നു’ എന്നതാണ് ഈ നഴ്സിംഗ് ദിനത്തിന്റെ പ്രമേയമെന്ന് അവര് പറഞ്ഞു.
ലോകമെമ്പാടുമുള്ള ആരോഗ്യസംരക്ഷണ സംവിധാനങ്ങളുടെ നട്ടെല്ലായ നഴ്സുമാര് ശാരീരികവും മാനസികവും വൈകാരികവുമായ വലിയ സമ്മര്ദ്ദങ്ങള്ക്ക് ഇന്ന് വിധേയരാകുന്നു. കുറഞ്ഞ വേതനം, അസ്വീകാര്യമായ തൊഴില് സാഹചര്യങ്ങള്, പരിമിതമായ നഷ്ടപരിഹാരം, ജോലിസ്ഥലത്തെ അക്രമങ്ങളില് നിന്നുള്ള സംരക്ഷണമില്ലായ്മ, പരിശീലനത്തിനുള്ള പരിമിതമായ അവസരങ്ങള് എന്നിവയാണ് പ്രതിസന്ധിക്ക് ആക്കം കൂട്ടുന്നത്’ പമേല അഭിപ്രായപ്പെട്ടു.
‘അവര് അമിതമായി ജോലി ചെയ്യുന്നു, പിന്തുണ കുറവാണ്, കൂടാതെ കൂടുതല് കൂടുതല് ഈ തൊഴില് ഉപേക്ഷിക്കുന്നു,’ ലോകാരോഗ്യ സംഘടനയുടെ ആഫ്രിക്കയുടെ ആക്ടിംഗ് റീജിയണല് ഡയറക്ടര് ചിക്വെ ഇഹെക്വാസു പറഞ്ഞു.’ഈ പ്രതിസന്ധിയെ ലോകത്തിന് ഇനി അവഗണിക്കാന് കഴിയില്ല, കാരണം ഈ പ്രവണത നമ്മുടെ ആരോഗ്യ സംവിധാനങ്ങളെ ബാധിച്ചേക്കാം’ അദ്ദേഹം അഭിപ്രായപ്പെട്ടു.
