കണ്ണൂര്: ബിസിഎ ആറാം സെമസ്റ്റര് ചോദ്യ പേപ്പര് ചോര്ച്ചയുമായി ബന്ധപ്പെട്ട സംഭവത്തില് കാസര്കോട് പാലക്കുന്ന് ഗ്രീന്വുഡ്സ് കോളേജിന്റെ അഫിലിയേഷന് റദ്ദാക്കാന് കണ്ണൂര് സര്വകലാശാല തീരുമാനം. സംഭവത്തെ തുടര്ന്ന് സിന്ഡിക്കേറ്റ് ഉപസമിതി സമര്പ്പിച്ച അന്വേഷണ റിപ്പോര്ട്ടിന് സര്വകലാശാല അംഗീകാരം നല്കി.കോളേജിന് പിഴ ചുമത്താനും തീരുമാനിച്ചു.
ചോദ്യ പേപ്പര് ചോര്ച്ചയില് ഗ്രീന്വുഡ്സ് കോളേജ് പ്രിന്സിപ്പല് ഇന് ചാര്ജ് പി. അജീഷിനെ കഴിഞ്ഞ മാസം മാനേജ്മെന്റ് സസ്പെന്ഡ് ചെയ്തിരുന്നു.സംഭവത്തില് പ്രിന്സിപ്പാളിനെതിരെ പൊലീസ് നേരത്തെ കേസെടുത്തിരുന്നു. ചോദ്യക്കടലാസ് ചോര്ത്തിയത് പ്രിന്സിപ്പാള് തന്നെയാണെന്ന് സിന്ഡിക്കേറ്റ് ഉപസമിതിയും കണ്ടെത്തി.
കണ്ണൂര് സര്വകലാശാലയില് നിന്ന് പരീക്ഷയ്ക്ക് രണ്ടു മണിക്കൂര് മുന്പ് കാസര്കോട് പാലക്കുന്ന് ഗ്രീന്വുഡ്സ് ആര്ട്സ് ആന്ഡ് സയന്സ് കോളേജ് പ്രിന്സിപ്പലിന്റെ ഇ-മെയില് ഐഡിയിലേക്ക് അയച്ച ബിസിഎ ആറാം സെമസ്റ്റര് ചോദ്യപ്പേപ്പര് ചോരുകയായിരുന്നു. ഇത് വിദ്യാര്ഥികള്ക്ക് വാട്സാപ്പ് വഴി ഉള്പ്പെടെ ലഭ്യമായെന്നാണ് സര്വകലാശാലയുടെ കണ്ടെത്തല്.
സര്വകലാശാല രണ്ടുമണിക്കൂര് മുന്പ് മെയില് ചെയ്യുന്ന ചോദ്യക്കടലാസ് തുറക്കാനുള്ള പാസ് വേഡ് ഒരുമണിക്കൂര് മുന്പാണ് നല്കുക. പാസ് വേഡ് കിട്ടിയയുടന് പ്രിന്സിപ്പല് കുറച്ച് ചോദ്യങ്ങള് വിദ്യാര്ഥികളുടെ വാട്സാപ്പ് ഗ്രൂപ്പിലേക്ക് അയച്ചുവെന്ന് വിദ്യാര്ഥി തെളിവുസഹിതം സമ്മതിച്ചിരുന്നു.
എന്നാല്, ചോദ്യപേപ്പര് വാട്സ്ആപ്പ് വഴി ചോര്ത്തിയിട്ടില്ലെന്നാണ് ഗ്രീന്വുഡ്സ് കോളേജ് പ്രിന്സിപ്പല് ഇന് ചാര്ജ് അജീഷ് പറഞ്ഞത്. മുന്വര്ഷങ്ങളിലെ ബിസിഎ ചോദ്യപേപ്പറുകളും വരാന് സാധ്യതയുള്ള ചോദ്യങ്ങളും അധ്യാപകര് വിദ്യാര്ത്ഥികള്ക്ക് നല്കാറുണ്ട്. അക്കൂട്ടത്തില് ചിലപ്പോള് ഇത്തവണത്തെ ചോദ്യപേപ്പറുകളും ഉള്പ്പെട്ടതാകാമെന്നാണ് അദ്ദേഹം പറഞ്ഞത്.ഒരു കുട്ടി കോപ്പിയടിച്ചിരുന്നു. കുട്ടിയുടെ കൈയ്യില് നിന്ന് പിടിച്ചെടുത്ത കുറിപ്പുമായി ബന്ധപ്പെട്ട ചോദ്യം ചോദ്യപേപ്പറിലും ഉണ്ടായിരുന്നു. കുട്ടി സര്വകലാശാലയില് നിന്നുള്ള സ്ക്വാഡ് അംഗങ്ങളോട് പറഞ്ഞ മൊഴി തെറ്റിദ്ധരിക്കപ്പെട്ടതാവാമെന്നായിരുന്നു പ്രിന്സിപ്പാള് പറഞ്ഞത്.
