വാഷിങ്ടണ്: ശതകോടീശ്വരന് ഇലോണ് മസ്കിന് പതിനാലാമത്തെ കുട്ടി പിറന്നു. മസ്കിന്റെ പങ്കാളിയും ന്യൂറാലിങ്ക് എക്സിക്യൂട്ടീവുമായ ഷിവോണ് സിലിസാണ് കുട്ടിക്ക് ജന്മം നല്കിയത്. മസ്സ് ഇക്കാര്യം എക്സിലൂടെ സ്ഥിരീകരിച്ചു. സെല്ഡന് ലൈക്കര്ഗസ് എന്നാണ് കുട്ടിക്ക് പേര് നല്കിയിരിക്കുന്നത്. മസ്കിനു ഷിവോണ് സിലിസുമായുള്ള ബന്ധത്തില് നാലാമത്തെ കുഞ്ഞാണിത്. 2024ല് ജനിച്ച അര്ക്കേഡിയയുടെ പിറന്നാള് ദിവസം തന്നെ നാലാമത്തെ കുട്ടി ജനിച്ചതിന്റെ സന്തോഷം ഷിവോണ് എക്സിലൂടെ പങ്കുവച്ചു.
ആദ്യ ഭാര്യയായ ജസ്റ്റിന് വില്സണില് ആറ് കുട്ടികളും കനേഡിയന് ഗായികയായ ഗ്രിംസില് മൂന്ന് കുട്ടികളുണ്ട്. ജസ്റ്റിന് വില്സണില് ജനിച്ച ആദ്യ കുട്ടി മരിച്ചിരുന്നു. അടുത്തിടെ തന്റെ കുട്ടികള്ക്കും അവരുടെ അമ്മമാര്ക്കുമായി ടെക്സസില് 295 കോടി രൂപ വിലമതിക്കുന്ന ആഡംബര ബംഗ്ലാവ് മസ്ക് വാങ്ങിയിരുന്നു. മസ്കിന്റെ കുഞ്ഞിന്റെ അമ്മയാണെന്ന് അവകാശപ്പെട്ട് എഴുത്തുകാരിയും ഇന്ഫഌവന്സറുമായ ആഷ്ലി സെയ്ന്റ് ക്ലയര് രംഗത്തെത്തിയത് ചര്ച്ചയായിരുന്നു. എന്നാല് ആഷ്ലിയുടെ വാദത്തെ മസ്ക് അംഗീകരിക്കുകയോ തള്ളുകയോ ചെയ്തിട്ടില്ല.
