കേരളത്തിലെ യുവ സംരംഭകരുടെ വളർച്ചയ്‌ക്കും പുതിയ സംരംഭങ്ങളുടെ പ്രോത്സാഹനത്തിനുമായി അസാപ് കേരള, സംസ്ഥാന വ്യവസായ വികസന കോർപ്പറേഷന്റെ (KSIDC) സഹകരണത്തോടെ “ഡ്രീംവെസ്റ്റർ 2.0 ” പദ്ധതി സംഘടിപ്പിക്കുന്നു. ഈ പദ്ധതി വഴി വിദ്യാർത്ഥികൾക്ക് സ്വന്തം ആശയങ്ങളെ സംരംഭങ്ങളായി മാറ്റാനുള്ള അവസരവും സാമ്പത്തിക പിന്തുണയും നൽകുകയാണ് ലക്ഷ്യം. ശില്പശാലകൾ, ഡിസൈൻ തിങ്കിങ് വർക്ഷോപ്പ്, ഐഡിയത്തോൺ മത്സരം എന്നീ മൂന്ന് ഘട്ടങ്ങളായാണ് പദ്ധതി നടപ്പാക്കുക.
എല്ലാ ജില്ലകളിലും രണ്ടു ഘട്ടങ്ങളിലായി സംഘടിപ്പിക്കുന്ന ഏകദിന ശില്പശാലകളിലൂടെ ഒരു ആശയം എങ്ങനെ രൂപീകരിക്കാമെന്നും കേരളത്തിൽ ഒരു സംരംഭം തുടങ്ങുന്നതിന്റെ ഗുണങ്ങളെ കുറിച്ചും സാധ്യതകളെ കുറിച്ചും വിശദീകരിക്കുകയുമാണ് ചെയ്യുന്നത്. തിരുവനന്തപുരം ജില്ലയിലെ വിദ്യാർത്ഥികൾക്കായി ട്രിനിറ്റി കോളേജ് ഓഫ് എൻജിനിയറിങ് കോളേജിൽ Dec 14, 19 തീയതികളിൽ ശില്പശാലകൾ സംഘടിപ്പിച്ചു.
ആദ്യ ഘട്ട ശില്പശാലകൾക്ക് ശേഷം ആശയങ്ങൾ സമർപ്പിക്കാൻ താല്പര്യമുള്ള വിദ്യാർത്ഥികൾക്ക് 3 മുതൽ 5 പേര് അടങ്ങുന്ന ടീമായി തങ്ങളുടെ പേര് ഐഡിയത്തോൺ മത്സരത്തിനായി രജിസ്റ്റർ ചെയ്യാവുന്നതാണ്. രജിസ്റ്റർ ചെയ്യുന്ന ടീമുകൾക്ക് വേണ്ടി രണ്ടാം ഘട്ടത്തിൽ ഒരു ഡിസൈൻ തിങ്കിങ് വർക്ഷോപ് സംഘടിപ്പിക്കും. ഈ വർക്ഷോപ്പിലൂടെ ഒരു ആശയത്തെ എങ്ങനെ വികസിപ്പിക്കാമെന്നും അവയെ ഒരു ബിസിനസ് ആയി എങ്ങനെ മാറ്റാമെന്നുമുള്ള വിശദമായ പരിശീലനം എല്ലാ താല്പര്യമുള്ള രജിസ്റ്റർ ചെയ്ത വിദ്യാർത്ഥികൾക്കും ലഭിക്കും.
അവസാനമായി ജില്ലാ തലത്തിൽ സംഘടിപ്പിക്കുന്ന ഐഡിയത്തോൺ മത്സരത്തിലൂടെ തിരഞ്ഞെടുക്കപ്പെടുന്ന 28 ആശയങ്ങൾ സംസ്ഥാന തലത്തിൽ മാറ്റുരയ്‌ക്കുകയും അതിൽ നിന്നും തിരഞ്ഞെടുക്കപ്പെടുന്ന മികച്ച 10 ആശയങ്ങൾക്ക് അംഗീകാരവും സാമ്പത്തിക സഹായവും ലഭ്യമാക്കാനും ഉതകുന്ന നിലയിലാണ് പദ്ധതി വിഭാവനം ചെയ്തിരിക്കുന്നത്. മികച്ച ആശയങ്ങൾ കൈവശമുള്ള പ്രീ ഫൈനൽ, ഫൈനൽ ഇയർ വിദ്യാർത്ഥികൾക്ക് https://connect.asapkerala.gov.in/events/12582 എന്ന ലിങ്ക് വഴി അപേക്ഷിക്കാം. രജിസ്‌ട്രേഷൻ സൗജന്യമാണ്.
