വിശദവിവരങ്ങളടങ്ങിയ വിജ്ഞാപനം www.joinindiannavy.gov.in- ല്
ഡിസംബര് 20 വരെ ഓണ്ലൈനായി അപേക്ഷിക്കാം
സെലക്ഷന് ജെഇഇ മെയിന് 2024 റാങ്ക്, എസ്എസ്ബി
ഇന്റര്വ്യു അടിസ്ഥാനത്തില്
അവസരം 36 പേര്ക്ക്; കോഴ്സ് 2025 ജൂലൈയില് ആരംഭിക്കും
നാവികസേനയില് 10+2 (ബിടെക്) കേഡറ്റ് എന്ട്രി സ്കീമിലൂടെ സൗജന്യമായി ബിടെക് പഠിച്ച് ഓഫീസറായി ജോലി നേടാം. ഏഴിമല നാവിക അക്കാഡമിയില് 2025 ജൂലൈയില് കോഴ്സ് തുടങ്ങും. 36 പേര്ക്കാണ് പ്രവേശനം. ഏഴ് ഒഴിവുകളില് പെണ്കുട്ടികളെ പരിഗണിക്കും. അവിവാഹിതരായ പുരുഷന്മാര്ക്കും വനിതകള്ക്കും അപേക്ഷിക്കാം. വിശദവിവരങ്ങളടങ്ങിയ വിജ്ഞാപനം www.joinindiannavy.gov.in ല്നിന്നും ഡൗണ്ലോഡ് ചെയ്യാം. ഭാരത പൗരന്മാര്ക്കാണ് അവസരം.
യോഗ്യത: ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങള്ക്ക് മൊത്തം 70 ശതമാനം മാര്ക്കില് കുറയാതെ ഹയര് സെക്കന്ററി/പ്ലസ്ടു/തത്തുല്യ ബോര്ഡ് പരീക്ഷ പാസായിരിക്കണം. പത്ത് അല്ലെങ്കില് പന്ത്രണ്ട് ക്ലാസ് പരീക്ഷയില് ഇംഗ്ലീഷിന് 50 ശതമാനം മാര്ക്കില് കുറയാതെയുണ്ടാകണം.
2006 ജനുവരി 2 നും 2008 ജൂലൈ ഒന്നിനും മധ്യേ ജനിച്ചവരാകണം. ബിഇ/ബിടെക് പ്രവേശനത്തിനായുള്ള ജെഇഇ മെയിന്-2024 പേപ്പര് ഒന്ന് പരീക്ഷ അഭിമുഖീകരിച്ചിരിക്കണം. മെഡിക്കല്, ഫിസിക്കല് ഫിറ്റ്നസുണ്ടായിരിക്കണം. വൈകല്യങ്ങള് പാടില്ല. യോഗ്യരായ ഉദ്യോഗാര്ത്ഥികള്ക്ക് ഡിസംബര് 20 വരെ ഓണ്ലൈനായി അപേക്ഷിക്കാം.
സെലക്ഷന്: ജെഇഇ മെയിന് 2024 റാങ്കടിസ്ഥാനത്തില് അപേക്ഷകരുടെ ചുരുക്കപ്പട്ടിക തയ്യാറാക്കി സര്വ്വീസസ് സെലക്ഷന് ബോര്ഡ് (എസ്എസ്ബി) മുമ്പാകെ ബാംഗ്ലൂര്, വിശാഖപട്ടണം, ഭോപാല്, കൊല്ക്കത്ത എന്നിവിടങ്ങളിലായി 5 ദിവസത്തോളം നീണ്ട ടെസ്റ്റ്/ഇന്റര്വ്യുവിന് ക്ഷണിക്കും. ആദ്യമായി ഇന്റര്വ്യുവിന് ഹാജരാകുന്നവര്ക്ക് എസി-3 ടയര് റെയില്വേ യാത്രാക്കൂലി അനുവദിക്കും. ഇന്റര്വ്യുവില് യോഗ്യത നേടുന്നവരെ വൈദ്യപരിശോധന നടത്തി മെരിറ്റ് ലിസ്റ്റ് തയ്യാറാക്കിയാണ് നിയമനം.
ബിടെക് പഠന-പരിശീലന ചെലവുകള് നാവികസേന വഹിക്കും. അപ്ലൈഡ് ഇലക്ട്രോണിക്സ് ആന്റ് കമ്മ്യൂണിക്കേഷന്, മെക്കാനിക്കല്, ഇലക്ട്രോണിക്സ് ആന്റ് കമ്മ്യൂണിക്കേഷന് എന്ജിനീയറിങ് ശാഖകളിലാണ് ബിടെക് പഠനാവസരം. വിജയികള്ക്ക് ജെഎന്യു ബിരുദം സമ്മാനിക്കും. വിജയകരമായി പരിശീലനം പൂര്ത്തിയാക്കുന്നവരെ എക്സിക്യൂട്ടീവ്, ടെക്നിക്കല് ബ്രാഞ്ചുകളില് കമ്മീഷന്ഡ് ഒാഫീസറായി നിയമിക്കും. ശമ്പളം, ആനുകൂല്യങ്ങള്, ഉദ്യോഗക്കയറ്റം ഉള്പ്പെടെയുള്ള സമഗ്രവിവരങ്ങള് വെബ്സൈറ്റില് ലഭിക്കും.
