ദുബായ് : യുഎഇയുടെ അമ്പത്തിമൂന്നാമത് ദേശീയദിനത്തിന്റെ (ഈദ് അൽ ഇത്തിഹാദ്) ഭാഗമായുള്ള ഔദ്യോഗിക പൊതു ആഘോഷപരിപാടികൾ ഡിസംബർ 2-ന് അൽ ഐനിൽ വെച്ച് സംഘടിപ്പിച്ചു. അൽ ഐനിലെ ജെബേൽ ഹഫീത് നാഷണൽ പാർക്കിൽ വെച്ചായിരുന്നു ഈ പൊതു ആഘോഷപരിപാടികൾ സംഘടിപ്പിച്ചത്.
യുഎഇ പ്രസിഡന്റ് ഉൾപ്പടെയുള്ള നേതാക്കൾ ആഘോഷപരിപാടികളിൽ പങ്കെടുത്തു. യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ, ദുബായ് ഭരണാധികാരി ഷെയ്ഖ് മുഹമ്മദ് ബിൻ റാഷിദ് അൽ മക്തൂം, വിവിധ എമിറേറ്റുകളിലെ ഭരണാധികാരികൾ, കിരീടാവകാശികൾ, മറ്റു നേതാക്കൾ, വിശിഷ്ടാതിഥികൾ തുടങ്ങിയവർ ഈ ഔദ്യോഗിക പരിപാടിയിൽ പങ്കെടുത്തു.
യുഎഇ എന്ന രാജ്യത്തിന്റെ ഒത്തൊരുമ, കൂട്ടായ പ്രവർത്തനം, സ്ഥാപക പിതാക്കളുടെ ദർശനങ്ങൾ, സുസ്ഥിരതയിലൂന്നിയുള്ള രാജ്യത്തിന്റെ ഇതുവരെയുള്ള പ്രയാണം എന്നിവ എടുത്ത് കാട്ടുന്ന രീതിയിലാണ് ഈ ഈദ് അൽ എത്തിഹാദ് ഔദ്യോഗിക ചടങ്ങ് സംഘടിപ്പിച്ചത്. നൂതന സാങ്കേതികവിദ്യകളുടെ സഹായത്തോടെ യുഎഇ എന്ന രാജ്യത്തിൻറെ ചരിത്രം പുനരാവിഷ്കരിക്കുന്ന ആഖ്യാനങ്ങളോടെയാണ് ഈ പരിപാടി ഒരുക്കിയിരുന്നത്. കൂടാതെ യുഎഇയുടെ യാത്രയെയും സ്ഥാപക പിതാക്കന്മാരുടെ പൈതൃകത്തെയും ആദരിക്കുന്നതിലാണ് ഇത്തവണത്തെ ഈദ് അൽ ഇത്തിഹാദ് ആഘോഷ ചടങ്ങ് ഊന്നൽ നൽകിയത്.
അതേ സമയം ചരിത്രപരമായ പ്രാധാന്യമുള്ള അൽ ഐൻ സിറ്റി, ഷെയ്ഖ് സായിദ് മുന്നോട്ട് വെച്ച ഐക്യത്തിന്റെയും സമൃദ്ധിയുടെയും ദർശനങ്ങളുടെ പ്രതീകമാണ്. ഇക്കാരണങ്ങൾ കൊണ്ടാണ് ഇത്തവണ അൽ ഐൻ സിറ്റി ആഘോഷങ്ങൾക്ക് വേദിയായത്.
അൽ ഐൻ സിറ്റിയുടെ പ്രകൃതി പരിസ്ഥിതിയും ചരിത്രപരമായ അടയാളങ്ങളും എമിറാത്തി പൈതൃകത്തിന്റെ നിധികളാണ്. പാരിസ്ഥിതികവും ചരിത്രപരവുമായ പ്രാധാന്യം ഉയർത്തിക്കാട്ടിക്കൊണ്ട് അൽ ഐൻ യുനെസ്കോയുടെ ലോക പൈതൃക സൈറ്റായി അംഗീകരിക്കപ്പെട്ടിരിക്കുന്നു.
ജന്മഭൂമി ഓണ്‍ലൈന്‍