കൊല്ലം: കരുനാഗപ്പള്ളി കുലശേഖരപുരത്ത് സിപിഎം ലോക്കല്‍ സമ്മേളനം നടക്കുന്നതിനിടെ സംസ്ഥാന കമ്മിറ്റി അംഗങ്ങളെ പൂട്ടിയിട്ടു. ലോക്കല്‍ കമ്മിറ്റി തെരഞ്ഞെടുപ്പുമായി ബന്ധപ്പെട്ട തര്‍ക്കത്തെ തുടര്‍ന്നാണ് സംസ്ഥാന കമ്മിറ്റി അംഗങ്ങളായ സോമപ്രസാദിനെയും കെ രാജഗോപാലിനെയും പൂട്ടിയിട്ടത്.
കുലശേഖരപുരം ലോക്കല്‍ സമ്മേളനത്തിനിടെയാണ് സംഭവം. നേരത്തെ ലോക്കല്‍ സമ്മേളനം സംസ്ഥാന നേതൃത്വം നിര്‍ത്തിവെച്ചിരുന്നു. തീയതി പുനഃക്രമീകരിച്ച് വ്യാഴാഴ്ച സമ്മേളനം നടത്താന്‍ തീരുമാനിച്ചിരുന്നു. ഇതിനിടെയാണ് തര്‍ക്കം രൂക്ഷമായത്. രണ്ട് മണിക്കൂറിലേറെയായി നേതാക്കളെ പൂട്ടിയിട്ടു. പുറത്തു നിന്ന് പ്രവര്‍ത്തകര്‍ എത്തി ഗേറ്റ് തകര്‍ത്ത് അകത്തേക്ക് കയറി. പ്രവര്‍ത്തകര്‍ തമ്മില്‍ ചേരിതിരിഞ്ഞ് ഏറ്റുമുട്ടി. ദൃശ്യങ്ങള്‍ പകര്‍ത്താന്‍ ശ്രമിച്ച മാധ്യമപ്രവര്‍ത്തകരെ പ്രവര്‍ത്തകര്‍ക്ക് നേരെ കയ്യേറ്റ ശ്രമം നടന്നു.
പ്രവര്‍ത്തകര്‍ മാധ്യമ പ്രവര്‍ത്തകരെ ഭീഷണിപ്പെടുത്തി.കഴിഞ്ഞദിവസം കൊല്ലം സിപിഎം തൊടിയൂര്‍ ലോക്കല്‍ സമ്മേളനത്തില്‍ കയ്യാങ്കളി നടന്നിരുന്നു. ലോക്കല്‍ കമ്മിറ്റിയിലേക്ക് മത്സരം വേണമെന്ന ആവശ്യമുയര്‍ന്നതോടെയാണ് തര്‍ക്കമുണ്ടായത്. മത്സരം നടന്നാല്‍ ഔദ്യോഗിക പാനല്‍ പരാജയപെടുമെന്ന് ബോധ്യപ്പെട്ടതോടെ നേതൃത്വം മത്സരം തടയാന്‍ ശ്രമിച്ചു. ഇതോടെയാണ് കയ്യാങ്കളി നടന്നത്.
