ആലപ്പുഴ:പ്രായപൂര്‍ത്തിയാകാത്ത വിദ്യാര്‍ത്ഥിനിയെ പീഡിപ്പിക്കാന്‍ ശ്രമിച്ച കേസില്‍ കായിക അധ്യാപകനെ പൊലീസ് അറസ്റ്റ് ചെയ്തു. മാന്നാര്‍ കുട്ടംപേരൂര്‍ എസ് എന്‍ സദനം വീട്ടില്‍ എസ് സുരേഷ് കുമാറിനെ (കുമാര്‍ 43) യാണ് പോക്‌സോ വകുപ്പ് ചുമത്തി മാന്നാര്‍ പൊലീസ് അറസ്റ്റ് ചെയ്തത്.
മാന്നാറിന്റെ സമീപ പ്രദേശങ്ങളിലെ ചില സ്‌കൂളുകളില്‍ താല്‍ക്കാലിക കായിക അധ്യാപകനായി ജോലിചെയ്ത് വരികയായിരുന്നു ഇയാള്‍. കുട്ടികള്‍ക്ക് കായിക പരിശീലനം നല്‍കുന്നതിനിടെയാണ് സുരേഷ് കുമാര്‍ വിദ്യാര്‍ത്ഥിനിയോട് അപമര്യാദയായി പെരുമാറുകയും പീഡിപ്പിക്കാന്‍ ശ്രമിക്കുകയും ചെയ്തത്.
വിദ്യാര്‍ത്ഥിനി സംഭവം വീട്ടിലറിയിച്ചു. തുടര്‍ന്ന് രക്ഷാകര്‍ത്താക്കള്‍ മാന്നാര്‍ പൊലീസില്‍ പരാതി നല്‍കി. കേസെടുത്തതോടെ സുരേഷ് കുമാര്‍ ഒളിവില്‍ പോയി. ഒരാഴ്ചയായി പലയിടങ്ങളിലായി ഒളിവില്‍ കഴിഞ്ഞു വന്നിരുന്ന പ്രതിയെ മാന്നാര്‍ പൊലീസ് നടത്തിയ അന്വേഷണത്തിലാണ് പിടികൂടിയത്.
