തിരുവനന്തപുരം: എബിസി സെന്ററുകള്‍ പ്രവൃത്തിക്കുന്നതിനാവശ്യമായ ഫണ്ട് തദ്ദേശസ്വയംഭരണവകുപ്പിന്റെ ജില്ലാ ആസൂത്രണ യോഗത്തില്‍ നീക്കിവയ്‌ക്കണമെന്നും തെരുവു നായ്‌ക്കളുടെ വന്ധീകരണം ഫലപ്രദമായി നടത്തുന്നതിനു മൃഗസംരക്ഷണ വകുപ്പിലെ ഉദ്യോഗസ്ഥരുടെ പങ്കാളിത്തം ഉറപ്പുവരുത്തണമെന്നും മൃഗസംരക്ഷണ വകപ്പ് മന്ത്രി ജെ ചിഞ്ചുറാണി നിര്‍ദേശിച്ചു.
എറണാകുളം ജില്ലയിലെ തെരുവുനായ നിര്‍മ്മാര്‍ജ്ജനവുമായി ബന്ധപ്പെട്ടു ജില്ലാ പഞ്ചായത്ത് പ്രസിഡന്റ്, സെക്രട്ടറി, പിറവം നഗരസഭാ ചെയര്‍പേഴ്സണ്‍, മൃഗസംരക്ഷണ വകുപ്പിലെ നിര്‍വ്വഹണ ഉദ്യോഗസ്ഥര്‍ എന്നിവരുടെ യോഗത്തില്‍ കോലഞ്ചേരി, മുളന്തുരുത്തി എന്നിവിടങ്ങളിലെ എബിസി സെന്ററുകളുടെ പ്രവര്‍ത്തനം വിലയിരുത്തി.
അതത് പഞ്ചായത്തുകളില്‍ നായകളെ പിടിക്കുന്നതിനായുള്ള ട്രാന്‍സ്പോര്‍ട്ടേഷന്‍ പ്രതിഫലം 200 രൂപയായി നിലനിര്‍ത്താനും പഞ്ചായത്തിനു പുറത്തു നായകളെ പിടിക്കുമ്പോള്‍ അത് 400 രൂപയായി ഉയര്‍ത്തണമെന്നും യോഗം ശുപാര്‍ശ ചെയ്തു.
