കോട്ടയം: നവകേരള സദസിനിടെ മുഖ്യമന്ത്രിയുടെ ഗണ്മാന്റെ നേതൃത്വത്തില് കോണ്ഗ്രസ് പ്രവര്ത്തകരെ മര്ദ്ദിച്ച കേസ് ഇനി പുതിയ സംഘം അന്വേഷിച്ചേക്കും. സര്ക്കാരിനെ സഹായിക്കാനായി മര്ദ്ദനക്കേസില് തെളിവില്ലെന്ന് സത്യവാങ്മൂലം നല്കിയ ക്രൈംബ്രാഞ്ച് സംഘം കോടതിക്കു മുന്നില് നാണംകെട്ടതോടെയാണിത്. മുഖം രക്ഷിക്കാനായി പുതിയ സംഘത്തെ നിയോഗിക്കാനാണ് സാധ്യത.
മര്ദ്ദിച്ചതിന് തെളിവില്ലെന്ന ന്യായവുമായി കോടതിയിലെത്തിയ പോലീസിനോട് തെളിവുകള് തങ്ങള് നല്കാമെന്നാണ് കോടതി പറഞ്ഞത്. നാട്ടുകാര്ക്കും മാധ്യമ ക്യാമറകള്ക്കും മുന്നില്വച്ച് അടികൊടുത്തിട്ടും അതിന് തെളിവില്ലെന്ന ന്യായം നിരത്തിയ പോലീസിന് വലിയ തിരിച്ചടിയായി ഇത്. പരാതി വീണ്ടും അന്വേഷിക്കണമെന്നും തെളിവ് പകല്പോലെ വ്യക്തമാണെന്നും ആണ് കോടതി നിരീക്ഷിച്ചത്. പോലീസിന്റെ കയ്യില് തെളിവില്ലെങ്കില് തങ്ങള് നല്കാമെന്നും കോടതി പറഞ്ഞു. പോലീസ് ഫോട്ടോഗ്രാഫര് പകര്ത്തിയ ദൃശ്യങ്ങള് കോടതിയില് നല്കിയിരുന്നു. മാത്രമല്ല മര്ദ്ദനത്തിന്റെ ദൃശ്യങ്ങള് പരാതിക്കാരന് തന്നെ കോടതിയില് ഹാജരാക്കുകയും ചെയ്തു. ഈ തെളിവുകളാണ് കോടതി പോലീസിന് കൈമാറാമെന്ന് അറിയിച്ചത്.
