പത്തനംതിട്ട:പാലക്കാട്ടെ യുഡിഎഫ് സ്ഥാനാര്ത്ഥിക്ക് സിപിഎം പത്തനംതിട്ട ജില്ലാ ഘടകം പിന്തുണ നല്കിയത് ഡീലിന്റെ തെളിവെന്ന് ബിജെപി സംസ്ഥാന അദ്ധ്യക്ഷന് കെ.സുരേന്ദ്രന്. ഇത് പാലക്കാട്ടുകാര് തിരിച്ചറിയുമെന്ന് അദ്ദേഹം പറഞ്ഞു. കോണ്ഗ്രസും സിപിഎമ്മും ആയിട്ടുള്ള അന്തര്ധാര ഉച്ചസ്ഥായിയിലാണെന്നതിന്റെ ഉദാഹരണമാണ് പത്തനംതിട്ട സിപിഎം പേജില് വന്ന രാഹുലിനെ വിജയിപ്പിക്കണമെന്ന പോസ്റ്റെന്നും സുരേന്ദ്രന് .
ഇന്ഡി മുന്നണി ഇവിടെ യാഥാര്ത്ഥ്യമായി. പരസ്പരം സഹായിച്ചാണ് ഇവര് എല്ലാകാലത്തും മത്സരിക്കുന്നത്. ഇത്തവണ സിപിഎം ജില്ലാ കമ്മിറ്റി തന്നെ അത് വെളിവാക്കി. പത്തനംതിട്ടക്കാരനാണ് രാഹുല്. അദ്ദേഹത്തെ പത്തനംതിട്ടയിലെ സിപിഎം പിന്തുണയ്ക്കുന്നത് പ്രാദേശിക വികാരമാണ്. പാലക്കാട്ടെ വോട്ടര്മാര് പാലക്കാട്ടുകാരനായ കൃഷ്ണകുമാറിന് മാത്രമേ വോട്ട് ചെയ്യൂവെന്നും സുരേന്ദ്രന് പറഞ്ഞു. സിപിഎം വോട്ട് മറിച്ചാലും കഴിഞ്ഞ തവണത്തെ അനുഭവം ജനങ്ങള്ക്ക് മുന്നിലുണ്ട്.
മുനമ്പം പോലെയുള്ള വിഷയങ്ങള് ജനങ്ങള് ചര്ച്ച ചെയ്യും. എന്ഡിഎ സ്ഥാനാര്ഥി കൃഷ്ണകുമാര് മുനമ്പത്ത് പോയി പാവപ്പെട്ട മത്സ്യത്തൊഴിലാളികള്ക്ക് ഐക്യദാര്ഢ്യം പ്രഖ്യാപിച്ചിട്ടുണ്ട്. ഇത് മുനമ്പത്ത് മാത്രമുള്ള പ്രശ്നമല്ല. നൂറണിയിലും കല്പ്പാത്തിയിലും എല്ലാം വഖഫ് ഭീഷണിയുണ്ട്. തളിപ്പറമ്പ് രാജരാജേശ്വരി ക്ഷേത്രത്തിന് സമീപം 600 ഓളം വീടുകളെ ബാധിക്കുന്ന തരത്തില് വഖഫ് ഭീഷണി ഉയര്ന്നുവന്നിട്ടുണ്ട്. എന്ഡിഎ യും സ്ഥാനാര്ത്ഥി സി.കൃഷ്ണകുമാറും ഇരകള്ക്കൊപ്പം നില്ക്കും. യുഡിഎഫ് -എല്ഡിഎഫ് സ്ഥാനാര്ത്ഥികള് ഈ വിഷയത്തില് നിന്നും ഒളിച്ചോടുന്നു.അവര് വോട്ട് ബാങ്ക് രാഷ്ട്രീയം കളിക്കുകയാണെന്നും കെ.സുരേന്ദ്രന് ചൂണ്ടിക്കാട്ടി.
പത്തനംതിട്ട സി പി എം എന്ന ഫേസ്ബുക്ക് പേജിലാണ് രാഹുല് മാങ്കൂട്ടത്തിലിന്റെ പ്രചാരണ വീഡിയോ വന്നത്. വിവാദമായതോടെ പിന്വലിച്ചു.
