ന്യൂഡൽഹി ; വൈദികരുടെയും കന്യാസ്ത്രീകളുടെയും ശമ്പളത്തിൽ നിന്ന് ആദായനികുതി പിടിക്കാമെന്ന് സുപ്രീം കോടതി. സർക്കാർ, എയ്ഡഡ് വിദ്യാഭ്യാസ സ്ഥാപനങ്ങളിൽ അധ്യാപകരായ വൈദികരുടെയും കന്യാസ്ത്രീകളുടെയും ശമ്പളത്തിൽ നിന്നു നികുതി ഈടാക്കുന്നതിനെതിരായ 93 അപ്പീലുകൾ തള്ളിക്കൊണ്ടാണ് ചീഫ് ജസ്റ്റിസ് ഡി.വൈ.ചന്ദ്രചൂഡ് അധ്യക്ഷനായ മൂന്നംഗ ബെഞ്ചിന്റെ നടപടി.
നിയമം എല്ലാവര്ക്കും ഒരു പോലെയാണ് . ഒരു സ്ഥാപനം ശമ്പളം നല്കുമ്പോള് അത് ആ വ്യക്തി എടുത്താലും രൂപതയ്ക്കോ മറ്റെവിടെയെങ്കിലും നല്കിയാലും നികുതി ഈടാക്കുന്നതിന് തടസ്സമില്ലെന്നും കോടതി വ്യക്തമാക്കി.
ദാരിദ്ര്യത്തിൽ ജീവിക്കാമെന്നു വ്രതമെടുത്തവരാണ് വൈദികരും കന്യാസ്ത്രീകളുമെന്നും അവരുടെ ശമ്പളം രൂപതയ്ക്കും കോൺവെന്റുകൾക്കുമായി നൽകുകയാണ് ചെയ്യുന്നതെന്നും ഹർജിക്കാർ വാദിച്ചു. അതുകൊണ്ട് അവരുടെ ശമ്പളത്തെ വ്യക്തിഗതമായി കാണാൻ കഴിയില്ലെന്നായിരുന്നു പ്രധാന ഹർജിക്കാരായ ഇൻസ്റ്റിറ്റ്യൂട്ട് ഓഫ് ദ് ഫ്രാൻസിസ്കൻ മിഷനറീസ് ഓഫ് മേരീസ് ഉൾപ്പെടെയുള്ളവരുടെ വാദം.
അനുസരണം, ദാരിദ്ര്യം, ബ്രഹ്മചര്യം എന്നീ പ്രതിജ്ഞകള് പാലിച്ചാണ് തങ്ങള് ജീവിക്കുന്നതെന്നും അവര് കൂട്ടിച്ചേര്ത്തു. വസ്തുവകകള് കൈവശം വയ്ക്കാനോ വിവാഹം കഴിക്കാനോ കഴിയില്ല. അതിനാല് തങ്ങള് സമ്പാദിക്കുന്ന പണം അതാത് സന്യാസ സഭകള്ക്കാണ് നല്കുന്നത്. അതിനാല്, ആദായനികുതി റിട്ടേണ്സ് നല്കുന്നത് നിര്ബന്ധമല്ലെന്ന് അവര് വാദിച്ചു.
‘തൊഴിലുണ്ടായിരിക്കുകയും അതിനു ശമ്പളം കിട്ടുകയും ചെയ്യുന്നുണ്ടെങ്കിൽ നികുതി നൽകാൻ ബാധ്യതയുണ്ട്. ഹൈന്ദവ പൂജാരി തനിക്കു കിട്ടുന്ന വേതനം ഒരു സംഘടനയ്ക്ക് പൂജയ്ക്കായി നൽകുന്നുവെന്നും നികുതി നൽകാനാകില്ലെന്നും പറയുന്നത് എങ്ങനെയാണ്. ശമ്പളം കിട്ടുന്നുണ്ടെങ്കിൽ അതിനു നികുതിയും നൽകണം. നിയമം എല്ലാവർക്കും ഒരുപോലെയാണ്. – ചീഫ് ജസ്റ്റിസ് പറഞ്ഞു.
