തിരുവനന്തപുരം: കണ്ണൂര്‍ കണ്ണാടിപ്പറമ്പ് ഗവ. ഹയര്‍സെക്കന്ററി സ്‌കൂളിലെ എട്ടാം ക്ലാസ് വിദ്യാര്‍ഥിനി തന്മയ വരച്ച ചിത്രമാണ് ഇത്തവണ ശിശുദിന സ്റ്റാമ്പായി എത്തുന്നത്. ‘ബാലസൗഹൃദ കേരളം’ എന്ന വിഷയത്തെ അടിസ്ഥാനമാക്കി സംസ്ഥാന ശിശുക്ഷേമ സമിതി സംഘടിപ്പിച്ച കുട്ടികള്‍ക്കായുള്ള ചിത്രരചനാ മത്സരത്തില്‍ പങ്കെടുത്ത 339 മത്സരാര്‍ത്ഥികളുടെ ‘വര’കളില്‍ നിന്നാണ് തന്മയയുടെ ചിത്രം തെരഞ്ഞെടുത്തത്.
14ന് തിരുവനന്തപുരത്ത് നടക്കുന്ന പൊതുസമ്മേളനത്തില്‍ മുഖ്യമന്ത്രി പിണറായി വിജയന്‍, മന്ത്രിമാരായ വീണാ ജോര്‍ജ്, വി. ശിവന്‍കുട്ടി എന്നിവരുടെ സാന്നിധ്യത്തില്‍ ശിശുദിന സ്റ്റാമ്പ് പ്രകാശനം ചെയ്യും. തന്മയയ്‌ക്കും പഠിക്കുന്ന സ്‌കൂളിനുമുള്ള എവര്‍റോളിങ് ട്രോഫിയും യോഗത്തില്‍ സമ്മാനിക്കും.
കണ്ണാടിപ്പറമ്പ് കടുവാന്‍ ഹൗസില്‍ വി. അശോകന്റെയും കെ.ചിത്രയുടെയും ഏക മകളായ തന്മയ ചിത്രരചനാ മത്സങ്ങളില്‍ നിരവധി സമ്മാനങ്ങള്‍ നേടിയിട്ടുണ്ട്. 2024 ല്‍ ഊര്‍ജസംരക്ഷണവകുപ്പ് നടത്തിയ മത്സരത്തില്‍ ജലച്ചായം വിഭാഗത്തില്‍ സംസ്ഥാനതലത്തില്‍ ഒന്നാംസ്ഥാനവും സബ്ജില്ലാ കലോത്സവത്തില്‍ എ ഗ്രേഡും നേടിയിട്ടുണ്ട്. ഇപ്പോള്‍ മാതുലനായ കടുവന്‍ പ്രമോദിന്റെ ശിക്ഷണത്തില്‍ ചിത്രരചന അഭ്യസിക്കുന്നു.
