കോതമംഗലം: സംസ്ഥാനസ്‌കൂള്‍ കായികമേളയിലെ ജൂനിയര്‍ പെണ്‍കുട്ടികളുടെ 100 മീറ്റര്‍ ബാക്ക് സ്ട്രോക്കില്‍ 23 വര്‍ഷം പഴക്കമുള്ള റിക്കാര്‍ഡ് തിരുത്തി കെ. ദേവിക. 2001-02 വര്‍ഷം ഇതേ ഇനത്തില്‍ സ്ഥാപിക്കപ്പെട്ട നേട്ടമാണ് ഇന്നലത്തെ ദേവികയുടെ പ്രകടനത്തോടെ പഴങ്കഥയായത്. അന്ന് സോണി സിറിയക്ക് സ്ഥാപിച്ച 1:15.19 മിനിറ്റ് നേരീയ വ്യത്യാസത്തില്‍ ദേവിക മറികടന്നു. 1:15.16 മിനിറ്റ് ആണ് ഈ ഇനത്തിലെ പുതിയ റിക്കാഡ് നേരം.
തുടരെ രണ്ടാം വര്‍ഷവും ദേവികയ്‌ക്ക് റിക്കാര്‍ഡ് സ്ഥാപിക്കാനായെന്ന പ്രത്യേകതകൂടി ഈ നേട്ടത്തിനൊപ്പമുണ്ട്. കോഴിക്കോട് പ്രൊവിഡന്‍സ് ഗേള്‍സ് എച്ച്.എസ്.എസിലെ വിദ്യാര്‍ഥിയായ ദേവിക കഴിഞ്ഞ വര്‍ഷം 50 മീറ്റര്‍ ബാക്ക് സ്ട്രോക്കില്‍ റിക്കാഡിട്ടിരുന്നു.
