തിരുവനന്തപുരം: മൃഗശാലയില്‍ വിവിധങ്ങളായ പുതിയ പക്ഷി മൃഗാദികളെ എത്തിക്കാന്‍ നടപടി സ്വീകരിക്കുമെന്ന് ക്ഷീരവികസന, മൃഗസംരക്ഷണ മന്ത്രി ജെ ചിഞ്ചുറാണി പറഞ്ഞു. തിരുവനന്തപുരം മൃഗശാലയില്‍ നിര്‍മാണം പൂര്‍ത്തീകരിച്ച കരപക്ഷികളുടെ പരിബന്ധനത്തിന്റെയും, ക്വാറന്റൈന്‍ കേന്ദ്രത്തിന്റെയും ഉദ്ഘാടനം നിര്‍വഹിക്കുകയായിരുന്നു മന്ത്രി.
കേരളത്തിലെ ഏറ്റവും പ്രധാനപ്പെട്ട മൃഗശാലയാണ് തിരുവനന്തപുരം മൃഗശാല. പ്രതിദിനം കേരളത്തിനകത്തും പുറത്തുമുള്ള ആയിരക്കണക്കിന് ആളുകളാണ് മൃഗശാല സന്ദര്‍ശിക്കുന്നത്. മുന്‍പുണ്ടായിരുന്ന ജിറാഫടക്കമുള്ള മൃഗങ്ങള്‍ ഇല്ലാതായ സാഹചര്യത്തിലും പുതിയ നിരവധി മൃഗങ്ങളെ ഇവിടെ എത്തിക്കാന്‍ കഴിഞ്ഞു. നമുക്ക് കൂടുതല്‍ ഉള്ള മൃഗങ്ങളെ മറ്റ് മൃഗശാലകളിലേക്ക് കൈമാറ്റം ചെയ്തിട്ടാണ് നമുക്കാവശ്യമുള്ള മൃഗങ്ങളെ സ്വീകരിക്കുന്നത് സമയ ബന്ധിതമായി ആഹാരം ,വെള്ളം, മരുന്ന് എന്നിവ നല്‍കി മൃഗപരിപാലനത്തില്‍ രാജ്യത്തിന് മാതൃകയാണ് തിരുവനന്തപുരം മൃഗശാല.
മക്കാവു ഉള്‍പ്പെടെയുള്ള പക്ഷികള്‍ മൃഗശാലയില്‍ ഇന്നെത്തിയ സാഹചര്യത്തിലാണ് കരപക്ഷികള്‍ക്കുള്ള പരിബന്ധനം സജ്ജീകരിച്ചത്. ആധുനിക സൗകര്യങ്ങളോടുകൂടി ശസ്ത്രക്രിയ അടക്കം ചെയ്യാന്‍ കഴിയുന്ന മൃഗാശുപത്രി, മൃഗങ്ങളെയും പക്ഷികളെയും താല്‍ക്കാലികമായി പാര്‍പ്പിച്ച് നിരീക്ഷിക്കുന്നതിനുള്ള ക്വാറന്റെന്‍ കേന്ദ്രം എന്നിവ സംസ്ഥാന സര്‍ക്കാര്‍ ഇവിടെ സ്ഥാപിച്ചിരിക്കുകയാണ്. പുതിയ പക്ഷി മൃഗാദികളെ എത്തിക്കുമ്പോള്‍ ഒരു മാസമെങ്കിലും മാറ്റിനിര്‍ത്തി അസുഖം സാധ്യത നിരീക്ഷിക്കുന്നതിനാണ് ക്വാറന്റെന്‍ കേന്ദ്രം സജ്ജീകരിച്ചത്. സര്‍ക്കാരിന്റെ നൂറുദിന കര്‍മ പരിപാടിയുടെ ഭാഗമായുള്ള ഈ പദ്ധതികള്‍ തിരുവനന്തപുരം മൃഗശാലയുടെ ആധുനീകരണത്തില്‍ നിര്‍ണായക പങ്കു വഹിക്കുമെന്നും മന്ത്രി പറഞ്ഞു.
വി കെ പ്രശാന്ത് എം എല്‍ എ അധ്യക്ഷനായി. വൈല്‍ഡ് ലൈഫ് വാര്‍ഡന്‍ വിനോദ് .എസ്.വി, വെറ്റിനറി സര്‍ജന്‍ ഡോ. നികേഷ് കിരണ്‍, മൃഗശാല സൂപ്രണ്ട് വി.രാജേഷ് എന്നിവര്‍ സംസാരിച്ചു.
