പാലക്കാട്: എഡിഎം നവീന്‍ ബാബുവിന്റെ കുടുംബത്തെ സർക്കാരും മുഖ്യമന്ത്രിയും പരിഹസിക്കുകയാണെന്ന് ബിജെപി സംസ്ഥാന അധ്യക്ഷൻ കെ. സുരേന്ദ്രൻ. മരണത്തിന് ഉത്തരവാദിയായ പി.പി.ദിവ്യയെ അറസ്റ്റ് ചെയ്യാത്തത് എന്തുകൊണ്ടാണെന്ന് ചോദിച്ച സുരേന്ദ്രൻ ദിവ്യയെ സംരക്ഷിക്കുന്നത് ആരെന്ന് മുഖ്യമന്ത്രി തുറന്നു പറയണമെന്നും ആവശ്യപ്പെട്ടു.
ഉപതെരഞ്ഞെടുപ്പ് മുന്നില്‍ കണ്ടു ജനങ്ങളുടെ കണ്ണില്‍ പൊടി ഇടാനുള്ള നീക്കമാണ് നടക്കുന്നത്. ദിവ്യയെ സംരക്ഷിക്കില്ലെന്ന മുഖ്യമന്ത്രിയുടെ പ്രസ്താവന ആത്മാര്‍ത്ഥതയില്ലാത്തതാണ്. ദിവ്യയ്‌ക്കെതിരേ ഒരു നടപടിയും എടുക്കാന്‍ സര്‍ക്കാര്‍ ആഗ്രഹിക്കുന്നില്ല. അവരെ ഒളിവില്‍ പോകാന്‍ സഹായിച്ചത് ആരാണെന്നും സുരേന്ദ്രന്‍ ചോദിച്ചു. പോലീസും പാര്‍ട്ടിയും സംരക്ഷിക്കുന്നില്ലെങ്കില്‍ പിന്നെയാരാണ് ദിവ്യയെ സംരക്ഷിക്കുന്നത്. പി.പി ദിവ്യയ്‌ക്കെതിരെ എന്തുകൊണ്ട് സര്‍ക്കാര്‍ ലുക്ക് ഔട്ട് നോട്ടീസ് ഇറക്കുന്നില്ലെന്നും സുരേന്ദ്രൻ ചോദിച്ചു.
മുഖ്യമന്തിയുടെ നടപടി നവീന്റെ കുടുംബത്തെ അവഹേളിക്കുന്നതിന് തുല്യമാണ്. പി.പി.ദിവ്യയെ അറസ്റ്റ് ചെയ്യും വരെ സമരം തുടരുമെന്നും സുരേന്ദ്രന്‍ പറഞ്ഞു.
ബിജെപിയില്‍ ഭിന്നതയുണ്ടോ എന്നത് 23ന് ശേഷം അറിയാം. ശോഭാ സുരേന്ദ്രന്റെ പോസ്റ്റര്‍ കത്തിച്ചത് മാനസികരോഗിയാണെന്നും സുരേന്ദ്രന്‍ പറഞ്ഞു.
പ്രതികരിക്കാൻ ഇവിടെ എഴുതുക